1 ሽን ነኖ ያቆባ ኔና መꬌዳዎ፥ ነኖ እስራኤልያዉ፥ ኔና ጊግሴዳ መꬍና ጎዳይ ሀዋዳን ያጌ፤ “ታን ኔና ዎዜዳ ድራዉ ያዮፓ። ታን ኔና ነ ሱንꬃን ጼሳድ፤ ኔን ታዋ። 2 ኔን ሃꬃ ግዱዋና ፕንያ ዎደ፥ ታን ኔናና ግዳና። ኔን ሻፋቱዋ ግዱዋና ፕንያ ዎደካ ኡንቱንቱ ኔና ሙክክኖ። ኔን ታማ ግዶና አꬍያ ዎደ፥ ጹገታካ፤ ላጩካ ኔና ሜና። 3 አያዉ ጎፐ፥ ታን ኔና አሽያ እስራኤልያ ጌሻ፥ መꬍና ጎዳ ነ ጾሳ። ታን ግብጼ ነዉ ዎዞ ኦꬃደ፥ ቶጵያነ ሳባ ነ ላምያ ኦꬃደ እማና። 4 ኔን ታ ስንꬃን አልአነ ቦንቾ ግድያ ድራዉነ፥ ታንካ ኔና ሲቅያ ድራዉ፥ ነ ላምያዉ አሳ፥ ነ ሸምፑዋ ላምያዉካ ካዉተꬃቱዋ እማና።

5 “ታን ኔናና ደእያ ድራዉ ያዮፓ፤ ታን ነ ዘረꬃቱዋ ዉላሃፐነ ዶላሃፐ ሺሻደ አሀና። 6 ታን ሁጲሳ ባጋ፥ ‘ኡንቱንታ ዛራደ አሀ!’ ያጋና። ገድሳ ባጋካ፥ ‘ኡንቱንታ ተኦፓ’ ያጋና። ታ አቱማ ናናቱዋ ሃኩዋፐ፥ ታ ማጫ ናናቱዋካ ሳኣ ጋጻፐ አሀና፤ 7 ታ ሱንꬃን ጼገቴዳ ኡባቱዋ፥ ታን ታ ቦንቾ መꬌዳዋንታ፥ ታን ጊግሴዳዋንታነ ኦꬄዳዋንታ ሀምተ” ያጋና።

8 አይፊ ደእሽን ቆቄዳ አሳቱዋ፥ ሀይꬃይካ ደእሽን ቱሌዳዋንታ ከሳ፤ 9 ካዉተꬃቱ ኡባይ እትፐ ሺቅኖ፤ አሳይካ ሺቁዋ ኡቶ። ኡንቱንቱ ግዶፐ ሀዋ ኦዳናዉነ ካሰ አꬌዳ የዎቱዋ ኑና በሳናዉ ዳንዳይያዌ ኦኔ? ሀራ አሳይካ ስሲደ፥ “ሀዌ ቱማ” ያጋና ማላ፥ ኡንቱንቱ ልከ ግድያዋ በሳናዉ ባረንቱ ማርካቱዋ አይኖ።

10 መꬍና ጎዳይ ሀዋዳን ያጌ፤ “ህንተ ታ ማርካቱዋ፤ ህንተ ታና ኤራና ማላነ አማናና ማላ፥ ቃይ ታን ጾሳ ግድያዋ አኬካና ማላ፥ ታን ዶሬዳ ታ ቆማቱ ህንተና። ታፐ ካሰ ሀራ ጾስ መትቤና፤ ዎይ ታፐ ጉይያንካ ሀራ ጾስ ደኤና።

11 “ታናቴ፤ ታን መꬍና ጎዳ። ታፐ አትና፥ ሀራ አሽያዌ ባዋ። 12 ታን ኦዳድ፥ አሻድነ አዋያድ። ህንተ ግዶን ሀራ አላጋ ጾስ ደእቤና። ታን መꬍና ጎዳ ግድያዎ ታዉ ህንተ ማርካቱዋ። 13 ታን ጾሳ፤ ጻጱዋፐ ዶማደካ ታን ታናቴ። ታ ኩሽያፐ ኦንነ አሸና፤ ታን ኦꬄዳዋ ላማናዉ ዳንዳይያዌ ባዋ” ያጌ።

14 መꬍና ጎዳይ፥ ህንተና ዎዝያዌ፥ እስራኤልያ ጌሻይ ሀዋዳን ያጌ፤ “ህንተ ድራዉ፥ ባብሎነ ቦላ ኦላንቻቱዋ ኪታደ ባብሎናቱዋ ኡንቱንቱ ጬቀትያ ማርካብያና በትሳና። 15 ታን መꬍና ጎዳ፥ ህንተ ጌሻ፥ እስራኤልያ መꬌዳዋ፥ ህንተ ካትያ” ያጌ።

16 መꬍና ጎዳይ ሀዋዳን ያጌ፥ አባ ግዶን ኦግያ፥ ዎልቃማ ሃꬃቱዋ ግዶፐካ ሎሱዋ ከሲደ፥ 17 ፓራ ጋረቱዋነ ፓራቱዋ፥ ኦላንቻቱዋነ ምኖ አሳቱዋ አባዉ አሂደ፥ ኡንቱንቱ ደንደናዳን ዛቁልሴዳ መꬍና ጎዳይ፥ ቃይ ኡንቱንቱ ሙቃዳ ላጩዋዳን ቶይሴዳ ያጌ 18 “ካሰ የዎቱዋ ሃሳዮፕተ፤ በንዋካ ቆፖፕተ። 19 በእተ፥ ሀእ ታን ኦራꬃባ ኦꬃይ፤ እካ ሀእ ሞኬ። ህንተ ሄዋ ኤርክቴየ? ታን ባዙዋን ኦግያ፥ መላ ቢታንካ ሻፋቱዋ ከሳና። 20-21 ዎራ ዶአቱ፥ ዎራካናቱነ ሳጎናቱ ታና ቦንቻና። አያዉ ጎፐ፥ ታ ጋላታ አዋያና ማላ፥ ታ ጊግሴዳነ ዶሬዳ ታ አሳዉ ታን ባዙዋን ሃꬃ፥ መላ ቢታንካ ሻፋቱዋ እማይ።

22 “ሽን ነኖ ያቆባ፥ ኔን ታ ሱንꬃ ጼሳባካ፤ ነኖ እስራኤልያዉ፥ ኔንካ ታና ሳለታዳ። 23 ኔን ታዉ ጹግያ ያርሾ ዶርሳ አሀባካ፤ ዎይ ሀራ ያርሾቱዋንካ ታና ቦንቻበይካ። ታን ኔና ካꬃ ያርሹዋ እማ ጋደ ዋይሳበይከ፤ ዎይ ቃይ እጻና እማ ጋደ ዳቡርሳበይከ። 24 ኔን ታዉ እጻና ሻሉዋን ሻማባካ፤ ዎይ ነ መህያ ያርሹዋ ሞꬉዋን ታና ካልሳባካ። ሽን ኔን ነ ናጋራን ታና ዋይሳዳ፤ ነ ናቁዋንካ ታና ዳቡርሳዳ።

25 “ታና፥ ነ ባይዙዋ ታ ድራዉ ጋደ ቁጭያዌ ታናቴ፤ ነ ናጋራካ ዛረꬃደ ሃሳይከ። 26 ታና ሀሳይሳ፤ አነ እትፐ ሀ የዉዋ ሞተቶይተ። ኔን ጽሉዋ ግድያዋ በአናዉ አነ ነ የዉዋ ብዳ። 27 ነ ኮይሮ አዉ ናጋራ ኦꬄዳ፤ ኔና ታማርስያዋንቱካ ታና ናቄድኖ። 28 ሄዋ ድራዉ፥ ታን ጌሻ ማቅዳስያ ካፓቱዋ ቱንሳድ፤ ያቆባ ባሻዉ፥ እስራኤልያካ ሸቃዉ አꬃደ እማድ” ያጌ።

<- ኢስያሳ 42ኢስያሳ 44 ->