1 ኔኖ፥ ኔና ꬋይሰናን ደእሽን ꬋይስያዎ፥ ነዉ አየ አና! ኔኖ፥ ኔና አꬅ እመናን ደእሽን፥ አꬃ እምያዎ፥ ነዉ አየ አና! ኔን ꬋይሱዋ አጌዳ ዎደ ኔና ꬋይሳና፤ ኔን አꬃ እሙዋ አጌዳ ዎደ ኔና አꬅ እማና።

2 አቤት መꬍና ጎዳዉ፥ ኑና ማራ፤ ኑን ኔና ናጌቶ፤ ዎንታ ዎንታ ኑዉ ዎልቃ ግዳ፤ መቱዋ ዎደካ ኑና አሽያዋ ግዳ። 3 ነ ኮሻይ ጉጉንꬃዳን ጉምያ ዎደ አሳይ ባቃቴ፤ ኔን ኑና ማዳናዉ ደንዳ ኤቂያ ዎደ፥ ካዉተꬃቱ ላለቲኖ። 4 ጎንዱ ሺቅያዋዳን፥ ህንተ ኦሞዱ ሺቃና፤ ቦሊ ድርቢያዋዳን፥ አሳይ አ ቦላ ድርባና።

5 መꬍና ጎዳይ ቦላን ደእያ ድራዉ፥ ꬎቁ ꬎቁ ጌዳ፤ እ ጽዮነ ሱረ ፕርዳንነ ጽሎተꬃን ኩንꬃና። 6 እ ህንተንቶ ህንተ ዎድያ ምንꬅያዋ፥ ህንተ ኩመንꬃ አቶተꬃ፥ አꬌዳ ኤራተꬃነ ኤራ ግዳናዋ፤ መꬍና ጎዳዉ ያይያዌ አዉ አቆ ግዳናዋ።

7 በእተ፥ ኡንቱንቱ ዎልቃማ አሳቱ ኦግያን ዋሲኖ፤ ስጋተꬃዉ ኪቴዳዋንቱካ ምሸቲደ ዬኪኖ። 8 አኮ ኦገቱ ኦኔድኖ፤ ኦግያና አꬍያዌ አጌዳ። እ ባረ ጫቀቴዳ ጫቁዋ ኮሌዳ፤ ካታማቱዋካ ካꬌዳ። አሳካ ደምቤና። 9 ቢታይ ካዮቴነ ላባኔ። ሊባኖስ ዬላቲደ መሌ፤ ሳሮና ግያ አራዳ ድልባይ መላ ቢታ ግዴዳ። ባሳነ ግያ ደርያንነ ቃርመሎሳ ደርያን ደእያ ምꬃቱዋ ሀይꬃይ ቆቆፈቴ።

10 መꬍና ጎዳይ ካዉተꬃቶ ሀዋዳን ያጌ፤ “ሀእ ታን ደንዳና፤ ሀእ ታን ቦንቼታና፤ ሀእ ታን ꬎቁ ꬎቁ ጋና። 11 ህንተ ኡቱላ ሻሃሪደ፥ ሱላ የሌድታ። ህንተ ሸምፕያ ሸምፑ ህንተና ምያ ታማ። 12 አሳይ ታማን ጹገቴዳ ብድንꬃ ማላ ግዳናዋ፤ ቃይ ቃንጸቲደ፥ ታማን ኤጼዳ አጉንꬃ ማላ ግዳናዋ። 13 ህንተኖ፥ ሃኩዋን ደእያዋንቶ፥ ታን ኦꬄዳዋ ስስተ፤ ማታን ደእያዋንቶ፥ ታን ዎልቃማ ግድያዋ አኬክተ” ያጌ።

14 ጽዮነን ደእያ ናጋራንቻቱ ያዬድኖ፤ ጾሳዉ ግደናዋንታ ኮኮርሳይ ኦይቄዳ። ሄዋ ድራዉ፥ ኡንቱንቱ፥ “ምያ ታማና ደአናዉ ዳንዳይያ ኡራይ ኑ ግዶን ኦኔ? ኤጺደ ደእ አግያዋና ደአናዉ ዳንዳይያ ኡራይ ኑ ግዶን ኦኔ?” ያጊኖ። 15 ጽሎተꬃን ሀመትያዌ፥ ሱረባ ሃሳይያዌ፥ ሱረ ግደና ኦግያና ቤትያ ጎኣ እጽያዌ፥ ማታይያ አካናዉ ባረ ኩሽያ የደናዌ፥ ሱꬃ ጉስያዋ ስሰናዳን፥ ባረ ሀይꬃ ቱጭያዌ፥ ኢታባ ጼለናዳን፥ ባረ አይፍያ ጪልምያዌ፥ 16 ሄ ኡራይ ꬎቃሳን ደአና። እ ባቃቲደ አታና ሳአይካ ምኖ ዛላ ደኡዋ ግዳናዋ፤ አ ኡክꬃይካ አዉ እመታና፤ እ ኡሽያ ሃꬃይካ ፓጨና።

17 ህንተ አይፈቱ ካትያ አ ፑላና በአና፤ ሃኪደ ደእያ ቢታካ በአና። 18 ህንተ ዎዛናይ፥ “ፓይዴዳዌ ሀቃን ደኢ? ጊራ ይግ ጼሌዳዌ ሀቃን ደኢ? አዱሳ ግምበቱዋ ፓይዴዳዌ ሀቃን ደኢ?” ያጊደ ያሽያ በንዋ ቆፓና። 19 ህንተ ቃረት ባይና አሳቱዋ፥ ህንተንቶ ገለና ሃሳያ ሃሳይያ አሳቱዋነ እንጻርሳይ ዴዶትያ አሳቱዋ ሀዋፐ ስንꬃን በእክታ።

20 ኑን ኑ ባላ ቦንችያ ጽዮነ ካታማ በእተ! ዎፑ ጊደ ደኢያሳ፥ አ ሽካሊ ሾደተና፥ አ ዎዶሩካ ዱጸናነ ቃጸና ዱንካንያ ማላ፥ የሩሳላመ ካታማ ህንተ ህንተ አይፍያን በአና። 21 ሽን መꬍና ጎዳይ ኑዉ ሄ ሳኣን ባረ ዎልቃማ ዎልቃ ቆንጭሳና። ሄ ሳአይ አኮ ሻፋቱነ ጎግያ ሃꬃቱዋ ማላ ግዳናዋ። ላግያ ዎሉዎሉ አ ቦላና ባናዉ ዳንዳየና፤ ዎልቃማ ማርካቢካ ያና አꬋናዉ ዳንዳየና። 22 አያዉ ጎፐ፥ መꬍና ጎዳይ ኑ ዳና፤ መꬍና ጎዳይ ኑዉ ህግያ እሜዳዋ። መꬍና ጎዳይ ኑ ካትያ፤ እ ኑና አሻና።

23 ነ ዎዶሩዋ ቃሹ ሾልኤዳ፤ ማርካብያ ቱሳ አ ሳኣን ምንስ ኦይቃናዉ ዎይ ሻራካ ጻጋጋናዉ ዳንዳየና። ሄ ዎደ ዳሮ ኦሞዲደ አሄዳባይ ሻከታና፤ ሀራይ አትና፥ ዎባቱካ ኦሞዱዋ ኦሞዳና። 24 ጽዮነን ደእያ ኦንነ፥ “ታን ሀርጋይ” ያገና፤ ያን ደእያ አሳ ናጋራይ አቶ ጌተታና።

<- ኢስያሳ 32ኢስያሳ 34 ->