1 በእተ፥ ጎዳይ፥ ኡባፐ ዎልቃማ መꬍና ጎዳይ ምንጃነ ማዱዋ ላኡዋካ የሩሳላመፐነ ይሁዳፐ ድጋና ሀኔ። ካꬃ ምንጃነ ሃꬃ ምንጃ ኡባ፤ 2 ምኖቱዋነ ኦላንቻቱዋ፥ ዳናቱዋነ ትምቢትያ ኦድያዋንታ፥ ካይያዋንታነ ጭማቱዋ፥ 3 ኦላ ጋዳዋቱዋነ ጋድያ አይስያዋንታ፥ ዞርያዋንታ፥ ሂላትያዋንታነ ጭንጫ ብታንቻቱዋ ኡባ ድጋና ሀኔ።

4 ታን ያላጋ አቱማ ናናቱዋ ኡንቱንቱ ካፑዋ ከሳና፤ ጉꬃ ናናይ ኡንቱንታ ሞዳና። 5 አሳይ አሳ ቦላ፥ ሾሩ ሾሩዋ ቦላ ደንዲደ፥ እቱ እቱዋ ሱጋና። ያላጋይ ጭማ ቦላ፥ ካቴዳዌ ቦንቼቴዳዋ ቦላ ደንዳና።

6 እት አሳይ ባረ አዉዋ ጎልያን ባረ እሻቱዋፐ እቱዋ ኦይቂደ፥ “ነዉ ማዩ ደኤ፤ ኔን ኑዉ ሱንꬃ ግዳ፤ ሀ ኮለቴዳ ሳኣ አዎተꬃ አካ” ያጋና።

7 እ ሄ ጋላስ ባረ ቃላ ꬎቂሲደ፥ “ታናን ꬋሊ ባዋ፤ ታ ሶን ቁም ዎይ ማዩ ባዋ፤ ህንተ ቦላ ታና ሱንꬆፕተ” ያጋና።

8 የሩሳላመ ጋንድጋሬ፤ ይሁዳይ ኩንዴ፤ አያዉ ጎፐ፥ ኡንቱንቱ ባረንቱ ኦዱዋንነ ባረንቱ ኦሱዋን መꬍና ጎዳ ቦላ ደንዲደ፥ አ ቦንቹዋ ቶቺኖ። 9 ኡንቱንቱ ሶምኡዋ ማላይ ኡንቱንቱ ቦላ ማርካቴ፤ ኡንቱንቱ ባረንቱ ናጋራ ሶዶማ አሳዳን አዋዪኖ፤ ባረንቱ ናጋራ ቆስክኖ። ኡንቱንቶ አየ አና! አያዉ ጎፐ፥ ኡንቱንቱ ባረንቱ ቦላ ኢታባ አሄድኖ።

10 ጽሎቶ፥ “ህንተዉ ሎአ ግዳናዋ” ጋደ ኦዳ፤ አያዉ ጎፐ፥ ኡንቱንቱ ባረንቱ ኦሱዋ አይፍያ ማና። 11 ኢታቶ አየ አና! ኡንቱንቶ ኢታና፤ አያዉ ጎፐ፥ ኡንቱንቱ ባረንቱ ኩሽያ ኦሱዋ ጋትያ አካና። 12 ያላጋቱ ታ አሳ ኡንኤꬂኖ፤ ማጫ አሳቱካ ኡንቱንታ ሞዲኖ። ታ አሳዉ፥ ህንተና ካለꬅያዋንቱ ህንተና ዎራ ካለꬂኖ፤ ህንተ ብያ ኦግያካ ባለꬂኖ።

13 መꬍና ጎዳይ ዳናዳን፥ ችሎታን ኡቴ፤ አሳ ፕርዳናዉ ደንዴ። 14 አሳ ጭማቱዋነ ካለꬅያዋንታ ፕርዳናዉ ሺሺደ፥ መꬍና ጎዳይ፥ ኡባፐ ዎልቃማ መꬍና ጎዳይ ሀዋዳን ያጌ፤ “ታ ዎይንያ ቱራ ቶኬዳሳ ባይዜዳዋንቱ ህንተና፤ ህዬሳቱዋፐ ቦንቄዳባይ ህንተ ጎልያን ደኤ። 15 ታ አሳ አያዉ ክንቼረꬂቴ? ህዬሳቱዋ ሶምኡዋ አያዉ ጋጪቴ?” ያጌ ጎዳይ፥ ኡባፐ ዎልቃማ መꬍና ጎዳይ።

16 መꬍና ጎዳይ ቃይካ፥ “ጽዮነ ማጫ አሳቱ ኦቶረቴድኖ፤ ባረንቱ ዚዝያ ኤስ አኪደ፥ ባረንቱ አይፍያን ስምኤቲደ፥ ባረንቱ ሀመꬃ ማክሲደ፥ ባረንቱ ገድያ አልቡዋ ጊርሲደ ሀመቲኖ። 17 ሄዋ ድራዉ፥ ታን ጎዳይ ጽዮነ ማጫ አሳቱዋ ሁጲያ ጭቱዋን ጎእሳና። ታን መꬍና ጎዳይ ኡንቱንቱ ሁጲያ ቦአያና” ያጌ።

18 ሄ ጋላስ ጎዳይ ጽዮነ ማጫ አሳቱዋ አሌቆቱዋ፥ ሄዋንቱነ ኡንቱንቱ ገድያ አልቡዋ፥ ሻሽያ፥ ቆꬍያ አሌቁዋ፥ 19 ሀይꬃ ጉትቻ፥ ኩሽያ ሳጋዩዋ፥ ሶምኡዋ ካምያ ኩታ፥ 20 ሁጲያን ዎꬅያ አሌቁዋ፥ ቀስያን ቃችያ ሳንሳላታ፥ ጼሳን ዳንጭያ ዳንጩዋ፥ ሽቱዋ ጻራሙስያ፥ ክታፋ፥ 21 ሲꬍያ ምግዱዋ፥ ብራꬍያነ 22 ምንጃ ማዩዋ፥ አዱሳ ማዩዋ፥ ጃኑዋ፥ ቦርሳ፥ 23 ሄረጋ፥ ሊኑዋ ግያ ቃጭናፐ ዳደቴዳ፥ ግዶና ማይያ ማዩዋ፥ ብናናን ዎꬅያ አሌቁዋነ ሻርቢያ ኡባ ቦንቃ አካና።

24 ሽቱዋ ድራዉ ጽንቁዋ ግዳናዋ፤ ዳንጩዋ ድራዉ ዎዶሩዋ፥ ጎፋርያ ድራዉ ቦኣ፥ አዱሳ ማዩዋ ድራዉ ዋሩዋ፥ ፑላ ድራዉ ባቂያ ጻላላ ግዳናዋ።

25 ነ አሳቱ ማሻን፥ ነ ኦላንቻቱ ኦላን ሀይቃና። 26 ጽዮነ ፐንገቱዋን ደእያ አሳይ ዬካናነ ዝላላና፤ መላ አቴዳ፥ ጋድያን ኡታና።

<- ኢስያሳ 2ኢስያሳ 4 ->