1 ሳፃ ዎምባ ግያ ሳኣባዉ ጾሳይ ኦዴዳ ቃላ። ህንተ ኡባይ ጎልያ ቦላን ደምባዪደ ኦꬄዳ ሳኣ ከሴዳዌ አያሴ? 2 ኔኖ ዋሱ፥ ድርባይነ ጫቡ ኩሜዳ ካታማዉ፥ ነ ግዶን ሀይቄዳ አሳቱ ማሻን ሀይቂበይክኖ፤ ዎይ ኦላንካ ሀይቂበይክኖ። 3 ህንተ ካፓቱ ኡባይ እትፐ ባቃቴድኖ፤ ኡንቱንቱ ዎንዳፊ ባይናን ጮ ኦሞደቴድኖ፤ ኡንቱንቱ ሃኮ ሳ ባቃቶፐነ ቤቴዳ ኡባቱ ኦይቀቴድኖ። 4 ሄዋ ድራዉ፥ ታን ሀዋዳን ያጋድ፤ “ታና ጼሎፕተ፤ አነ ታን አፎጻደ ምሾ ዬኩዋ ዬካይ፤ ꬋዬዳ ታ አሳዉ ዬክያ ታና ምንꬃና ጊደ ዳቡሮፕተ” ያጋድ። 5 ጎዳይ፥ ኡባፐ ዎልቃማ መꬍና ጎዳይ ሀ ጋላሳ ሳፃ ዛንጋራን ዳጋማ፥ የደርሳነ ሻቢርሳ ጋላሳ ኦꬄዳ፤ ቃይ ግምበቱካ ኮለትያ ጋላሳነ ደረቱዋኮካ ዋስያ ጋላሳ።

6 ኤላመ ባረ ፓራ ጋረቱዋናነ ፓራ አሳቱዋና ባረ ዎንዳፍያ ኦይቂደ ዬዳ፤ ቂራ ጋድያ ዎታዳራቱ ቃይ ባረንቱ ጎንዳለቱዋ ጊግሴድኖ። 7 ሎይꬅ ሎእያ ህንተ ዛንጋራቱ ፓራ ጋረቱዋን ኩሜድኖ፤ ፓራ አሳቱ የሩሳላመ ካታማ ፐንግያ ስንꬃን ኤቄድኖ። 8 እ ይሁዳ ጌሶቱዋ ቃሬዳ። ሄ ጋላስ ህንተ ዎራ ጎልያን ደእያ ካትያ ኦላ ሚሻቱዋ ጼሌድታ። 9 ቃይ ህንተ ዳዊታ ካታማ ግዶን ኮለቴዳሳይ ዳሬዳዋ በኤድታ፤ ዝቃ ሳኣ ሺቄዳ ሃꬃ ዳጋይ ደኢታ። 10 ያቲደ ህንተ የሩሳላመን ደእያ ጎለቱዋ ፓይዴድታ፤ ግምቢያ ምንꬃናዉ ጎለቱዋ ኮሌድታ። 11 ካሰ ኤጫ ዳልባንꬃን ደእያ ሃꬃ ዛሪደ፥ አ ምንጅያሳ ላኡ ግምበቱዋፐ ግዱዋን ጊግሴድታ። ሽን ህንተ ሄዋ መꬌዳዌ ጾሳ ግድያዋ አኬክበይክታ፤ ዎይ ዳሮ ዎድያፐ ካሰ ሄዋ ሀልቼዳዋ ያይንበይክታ።

12 ሄ ጋላስ ጎዳይ፥ ኡባፐ ዎልቃማ መꬍና ጎዳይ ህንተና ዬካናዉነ ዝላላናዉ፥ ህንተ ሁጲያ ሜደታናዉነ ዋሩዋ ማያናዉ ህንተና ጼሴዳ። 13 ሽን በእተ፥ ህንተ ናሸቲታነ ፖጩ ጊታ፤ ቦራነ ዶርሳ ሹኪታ፤ አሹዋ ሚታ፤ ዎይንያ ኤሳካ ኡሺታ፤ “ኑን ዎንት ሀይቂያ ድራዉ፥ አነ ሜቶነ ኡሼቶ” ያጊታ። [a]

14 ኡባፐ ዎልቃማ መꬍና ጎዳይ ሀዋ ታዉ ኦዴዳ፤ እ፥ “ህንተ ሀይቃና ጋካናዉካ ሀ ናጋራይ ህንተንቶ አቶ ጌተተና። ታን ጎዳይ፥ ኡባፐ ዎልቃማ መꬍና ጎዳይ ሀዋ ኦዳይ” ያጌዳ።

15 ጎዳይ፥ ኡባፐ ዎልቃማ መꬍና ጎዳይ ሀዋዳን ያጌዳ፤ “ባ፤ ካትያ ጎልያን ሱንቴዳ ካፑዋ ሼብናኮ ባደ ሀዋዳን ያጋ፤ 16 ‘ሀዋን ኔን አያ ኦꬃይ? ቃይ ኔን ሀዋን ነዉ ዱፉዋ ቦካናዉ፥ ነዉ ሀዋን ኦኔ ደእያዌ? ኔኖ ꬎቃ ሳኣን ነዉ ዱፉዋ ማስያዎ፥ ቃይ ሹቻ ጎምፓን ነዉ ደእያ ሳኣ ዎጭያዎ፥ 17 ነኖ ምኖ ብታንያዉ፥ ኔና መꬍና ጎዳይ ዎልቃን ዎራ ዛሪደ ኦላና። ኔና እ ጲርጾꬅ ኦይቂደ፥ 18 ዩሽ ዩሽ አꬂደ ኩዋዳን፥ እት አኮ ጋድያን ኦል አጋና። ኔኖ ነ ጎዳ ጎልያዉ ዬላ ግዴዳ ብታንያዉ፥ ኔን ያን ሀይቃና፤ ነ ቦንቾ ፓራ ጋረቱካ ያን አታና። 19 ታን ኔና ነ ኦሱዋፐ ከሳና፤ ነ ዳናተꬃፐካ ኔና ሻራና’ ያጋ።

20 “ሄ ጋላስ ታን ህልቂያ ናኣ ታ ቆማ ኤልያቂማ ጼሳና። 21 ነ ማዩዋ አ ማይዛና፤ ነ ዳንጭያዋንካ አ ዳንጭሳና፤ ነ ሱንꬃተꬃካ አዉ አꬃደ እማና። እ የሩሳላመን ደእያ አሳዉነ ይሁዳ አሳዉ አዉዋ ግዳናዋ። 22 ታን ዳዊታ ጎልያ ቁልፕያ አ ሀሽያን ዎꬃና፤ እ ዶያና፤ ኦንነ ጎርደና፤ ቃይ እ ጎርዳና፤ ኦንነ ዶየና። [b] 23 ታን አ አማንꬅያ ሳኣን ሽካልያዳን ꬎጋና፤ እ ባረ አዉዋ ጎልያዉ ቦንቾ ካተቱዋ አራታ ግዳናዋ። 24 ዋንጫፐ ቢደ፥ ꬎቃባ ጋካናዉ ኮጫን ካቄዳዋዳን፥ ኡንቱንቱ አ አዉዋ ጎልያ ቦንቹዋ ኡባ፥ ናናቱዋ፥ ናኣ ናናቱዋካ፥ አ ቦላ ዎꬃና” ያጌዳ።

25 ኡባፐ ዎልቃማ መꬍና ጎዳይ ሀዋዳን ያጌ፤ “ሄ ጋላስ አማነትያ ሳኣን ꬎጌዳ ሽካሊ ክቻና፤ ቃንጸታናነ ኩንዳና። አ ቦላን ካቄዳ ቶኩዋ ኡባይ ዱጽ ዎꬋና” ያጌ። ሀዋ መꬍና ጎዳይ ኦዴዳ።

<- ኢስያሳ 21ኢስያሳ 23 ->