1 ኤፍሬማ አሳይ ሃሳዬዳ ዎደ፥ ስሴዳ አሳይ ያሻዉ ኮኮሬዳ፤ እስራኤልያ ጋድያን ኡንቱንቱ ቦንቼቴዳ አሳ። ሽን ባኣላ ግያ ኤቃዉ ጎይኔድኖ፤ ሄ ባይዙዋ ጋሱዋን ሀይቄድኖ። 2 ሀእካ ናጋራ ቦላ ናጋራ ኦꬂኖ፤ ቃይ ባረዉ ጎይናናዉ፥ ሲልሲደ ምስለቱዋ መꬊኖ። ሄ ምስለቱ ሂላን ብራፐ መቴዳዋንታ፤ ኡንቱንቱ ኡባይካ ኩሽያ ሂላይ መꬌዳዋንታ። ኡንቱንቱዋ አሳይ ሃሳዪደ፤ “አሳ ያርሹዋ ያርሽተ፤ ሀ ማራ ምስልያካ የርተ” ያግኖ። 3 ሄዋ ሀዳን ኡንቱንቱ ዎንታ ሻርያ ማላ፥ ዎይ ጉራን ቆለትያ ዎንታ ከተርሳ ማላ ዎይ ጫርኩ ኡዱማፐ ደንꬂደ አፍያ ሱላ ማላ ዎይ ማስኮትያና ከስያ ፔኑዋ ማላ ግዳናዋ።

4 ጾሳይ ሀዋዳን ያጌ፤ “ታን ህንተና ግብጼ ጋድያፐ ከሳደ አሄዳ መꬍና ጎዳ ህንተ ጾሳ። ህንተ ታፐ አትና፥ ሀራ ጾሳ ኤርክታ፤ አሽያዌካ ታፐ አትና፥ ሀራይ ባዋ። 5 መላ ቢታን፥ መላ ጋድያን ታን ህንተና ናጋድ። [a] 6 ታን ህንተና ምዝና፥ ሚደ ካሌድታ፤ ካሊደ ኦቶረቴድታ፤ ሄዋፐ ጉይያን፥ ታና ዶጌድታ። 7 ሄዋ ድራዉ፥ ታን ህንተ ቦላ ጋሙዋ ማላ ግዳናዋ፤ ቃይ ማህያዳን፥ ኦግያ ዶናን ዙጋና። 8 ማራቱዋ ዎꬅ አኬዳ ማሀቲዳን፥ ታን ህንተናና ጋከታና፤ ህንተና ዳከሬꬃና። ቃይ ታን ህንተና ጋሙዋዳን ያን ማና፤ ባዙዋ ዶኣዳን፥ ህንተና ፖሸረꬃና።

9 “እስራኤልያ አሳቶ፥ ህንተ ታ ቦላ፥ ህንተና ማድያዋ ቦላ ሞርከተꬃን ደንድያ ድራዉ፥ ታን ህንተና ꬋይሳና። 10 ህንተ ታና፥ ‘ኑዉ ካትያነ ጋድያ ሞድያዋንታ እማ’ ያጊደ ኦቼድታ። ህንተና አሻናዉ ህንተ ካቲ አኔ? ህንተ ጋድያ ሞድያዋንቱ ህንተ ካታማቱዋ ግዶን ሀቃን ደኢኖ?[b] 11 ታን ታ ሀንቁዋን ህንተንቶ ካትያ እማድ፤ ታ ይሉዋን አ ድጋድ። [c]

12 “ኤፍሬማ ባይዙነ ናጋራይ ጻፈቲደ፥ ማዝጎባ ጎልያን ኡቴዳ። 13 የሉ ኦይቄዳ ምሽራታ ቱጋትያዋ ማላ ቱጋይ አ ቦላ ያና። ሽን እ ኤር ባይና ናኣ፤ አያዉ ጎፐ፥ እ የለትያ ዎዲ ጋክና፥ ባረ ዳይ ኡሉዋፐ ዎናን እጽያ ናኣ ማላ። 14 ኡንቱንታ ታን ዱፉዋፐ አሻና፤ ሀይቁዋ ዎልቃፐካ ዎዛና። ሀይቆ፥ ነ ኢታ ሀርገቱ ሀቃነ? ዱፎ፥ ነ ባሻይ ሀቃነ?[d]

“ታን ታ አሳዉ ቃረትከ። 15 ኤፍሬመ ባረ እሻቱዋ ግዶን ምንንቶካ፥ መꬍና ጎዳይ የዴዳ አዋይ ዶልያ ባጋ ጫርኩ መላ ቢታፐ ጫርኪደ ያና። አ ፑልቶቱ ቶአና፤ አ ሃꬃ ኦላቱካ መላና። እ ምንጅያ ጎለቱዋን ደእያ አልኦ ሚሻ ኡባይ ቦንቀታናዋ። 16 ሳማርያ አሳይ ባረንቱ ጾሳ ቦላ ማካሌዳ ድራዉ፥ ባረንቱ ባይዙዋ ሙራ አካናዉ በሰ። ኡንቱንቱ ማሻን ቡሳከታና፤ ኡንቱንቱ ጉꬃ ናናይካ ክንቼታና፤ ኡንቱንቱ ሻሃራ ማጫ አሳቱዋ ኡሉካ ጳልቀታና” ያጌ።

<- ሆሰ 12ሆሰ 14 ->