8
የሱስ ኦራꬃ ቃላ ጫቁዋ ቄሳቱዋ ኡባቱዋ ካፑዋ
1 ኑን ሃሳይያ ዎልቃማባይ ሀዋ፤ ሳሉዋን ኡባፐ ቦላ ጾሳይ ኡትያ ካዉተꬃ ኦይድያፐ ኡሸቻ ባጋና ኡቴዳ ቄሳቱዋ ኡባቱዋ ካፑ፥ ሀዋ ማላይ ኑዉ ደኤ። [a] 2 ጌሻ ሳኣንነ ቱሙ ዱንካንያን እ ኦꬄ፤ ሄ ዱንካኒ አሳይ ኤሴዳዋ ግደናን፥ ጾሳይ ኤሴዳዋ።
3 ቄሳቱዋ ኡባቱዋ ካፑ ኡባይ እሙዋነ ያርሹዋ ጾሳዉ እማናዉ ሱንቴዳ ድራዉ፥ ሀ ቄሳቱዋ ኡባቱዋ ካፖካ ያርሻናዉ እትባይ ደአናዉ ኮሼ። 4 ስም ሳኣን እ ደእያዋ ግዶፐ፥ ኡባካ ቄሳ ግደና፤ አያዉ ጎፐ፥ ህጊ አዛዝያዋዳን፥ እሙዋ እምያ ቄሳቱ ደኢኖ። 5 ኡንቱንቱ ቄሳቱዋዳን ኦꬅያ ኪታይ ሳሉዋን ደእያ ኦሶ ቱሙ ሌምሱዋነ ኤሹዋ፤ አያዉ ጎፐ፥ ሙሴ ዱንካንያ ኤሳና ሀንሽን፥ ጾሳይ አ፥ “አኬካ፤ ኡባባካ ታን ኔና ደርያ ሁጲያን በሴዳ ሌምሱዋ ካላደ ኦꬃ” ያጌዳ። [b] 6 ሽን የሱስ ጋናትያ ጫቁ ካሰዋፐ አꬍያዋዳንካ፥ አዉ እመቴዳ ኦሱካ ኡንቱንቱዋፐ አꬌ፤ አያዉ ጎፐ፥ ሄ ጫቁ ጾሳይ እማና ጌዳ ኡባፐ አꬍያ ኪታን ኦሰቴዳ።
7 አያዉ ጎፐ፥ ኮይሮ ጫቁዋን ባላይ ባይናዋ ግድንቶ፥ ላኤንꬆ ጫቁዋ ኮሸና። 8 ሽን ኡንቱንታ ቦሪደ፥ ጎዳይ ሀዋዳን ያጌ፤
“ታን እስራኤልያ አሳናነ ይሁዳ አሳና፥
ኦራꬃ ጫቁዋ ጫቀትያ ጋላሳቱ ያናዋ። [c]
9 ሄ ጫቁ ታን ግብጼ ጋድያፐ፥
ኡንቱንቱ አዎቱዋ ኩሽያ ኦይቃደ፥ ጎቻ ከሴዳ ዎደ፥
ኡንቱንቱና ጫቀቴዳ ጫቁዋ ማላ ግደና።
ኡንቱንቱ ታ ጫቁዋን አማነትቤና ድራዉ፥
ታንካ ኡንቱንታ አጋድ።
ታን፥ ጎዳይ፥ ሀዋ ኦዳይ።
10 አያዉ ጎፐ፥ ሄ ጋላሳቱዋፐ ጉይያን፥
ታን እስራኤልያ አሳና ጫቀታና ጫቁ ሀዋ:
ታን ታ ህግያ ኡንቱንቱ ቆፋን ዎꬃና፤
ቃይ ኡንቱንቱ ዎዛናንካ ጻፋና።
ታን ኡንቱንቱ ጾሳ ግዳና፤ ኡንቱንቱካ ታ አሳ ግዳና።
11 ኡንቱንቱፐ ኦንነ ባረ ሾሩዋ፥
ዎይ ባረ እሻ፥
‘ጎዳ ኤራ’ ያጊደ ታማርሰና።
አያዉ ጎፐ፥ ኡንቱንቱ ናኣፐ ጭማ ጋካናዉ ኡባይ ታና ኤሪኖ።
12 ታን ኡንቱንቱ ናቁዋ ማራና፤
ኡንቱንቱ ናጋራካ ላኤንꬆ ሀሳይከ”