እብራዌ 12

ጾሳይ ኑዉ አዉዋ

1 ስም ኑዉ ሀዋ ኬና ዳሮ አሳይ፥ ሻርያዳን ኑ ማታን ዩይ አꬊደ ማርካትያዌ ደእሽን፥ ኑና ꬉቢያ ኡባባነ ባቂ ኦይቂያ ናጋራ ድጊደ ኑ ስንꬃን ደእያ ኑን ዎጻና ዎꬃ ገንጪደ ዎጾይተ። 2 ኑን ኑ አማኖ ኦግያ ዶዬዳዋነ ፖልስያዋ ግዴዳ የሱሳ ጼሎይተ። የሱስ ዬላ ካꬊደ፥ ስንꬃፐ አዉ ደእያ ናሸቻ ድራዉ፥ ማስቃልያ ቦላ ምስማርያን ꬍሸቲደ ሀይቃናዋ ገንጪደ፥ ጾሳ ካዉተꬃ ኦይድያፐ ኡሸቻ ባጋና ኡቴዳ።

3 ህንተንቱ ህንተንቱ ዎዛና ባይዚደ ዳቡረና ማላ፥ ናጋራንቻቱ ባረና ዳሮ እጽናካ ገንጬዳ የሱሳ ቆፕተ። 4 ናጋራና ህንተንቱ ባጸቲደ፥ ሱꬃ ጉሳና ጋካናዉ ብሮ ኦለት ድግበይክታ። 5 ጾሳይ ባረ ናናዳን፥ ህንተንታ ዞርያዋ ዶጌድቴ? ጾሳይ ህንተንታ፥

“ታ ናአዉ፥ ጾሳይ ኔና ሙርያ ዎደ፥ ላፋባዳን ቆፖፓ።

እ ኔና ሴርያ ዎደካ ያዮፓ። [a]

6 አያዉ ጎፐ፥ እ ባረ ሲቅያ ኡራ ሙሬ፤

ቃይ ባረ ናኣዳን አክያ ኡባካ ልሱዋን ሾጬ”

ያጌዳ። 7 ጾሳይ ህንተንታ ሙርያ ዎደ ገንጭተ። አያዉ ጎፐ፥ እ ህንተንታ ናናዳን ኦꬄ። አዉ ሴረና ናአይ ደኢ? 8 ናና ኡባ ሴርያዋዳን፥ ህንተንታ ሙረናን አጎፐ፥ ካረን የለቴዳዋንታ ግዲታፐ አትን፥ ቱሙ ናና ግድክታ። 9 ሄዋ ቦላን ቃይ፥ ኑና የሌዳ ኑ አዎቱ ኑና ሙሬዳ ዎደ፥ ኑን ኡንቱንታ ቦንቼዶ። ያትና፥ ኑን ዋኒደ አያና አቦ ሎይꬅ ዳርስ ሞደቲደ ደኦኮ? 10 አያዉ ጎፐ፥ ኑና የሌዳ ኑ አዎቱ ባረንታ ሎኦዋዳን፥ አማሬዳ ዎድያ ኑና ሙሬድኖ፤ ሽን ጾሳይ ኑን አ ጌሻተꬃ አካና ማላ፥ ኑና ማዳናዉ ሙሬ። 11 ኑን ሙረትያ ዎደ፥ ሀእዉ ይሎዬ፤ ናሸቼና። ሽን ሙሬዳዋንቶ ጉየፐ ሄ ሙራይ ጽሎተꬃ ደኡዋ ሳሮተꬃ ዎይታ እማና።

ዞርያነ ሴራ

12 ሄዋ ድራዉ፥ ህንተንቱ አርጋጬዳ ኩሽያነ ህንተንቱ ዳቡሬዳ ጉልባታ መንꬅተ።[b] 13 ዎቢያ ገዲ ፓጻናፐ አትን፥ ቡርቀና ማላ፥ ሱረ ኦግያን ሀመትተ። [c]

14 አሳ ኡባና ሳሮ ደአናዉ ምንተ፤ ቃይ ጌሻ ደኡዋ ደእተ። አያዉ ጎፐ፥ ጌሻተꬃይ ባይናን ኦንነ ጎዳ በአናዉ ዳንዳየና። 15 ጾሳ አꬎ ኬካተꬃ ኦንነ አከናን አተና ማላ ናገትተ፤ ቃይ ዶላደ፥ ባረ ማርዝያን አሳ ዋይስያ ጫሞ ምꬃዳን ሀኒደ፥ ኦንነ ዳሮ አሳ ቱንሰና ማላ ናገትተ። [d] 16 ዎሹማናዉ ካጄልያ አሳይ ኦንነ ደኤና ማላ፥ ዎይ ቃይ እት ገደ ምያባዉ ባረ ባይራተꬃ ዛልኤዳ፥ አያናባ ካዉሽስያ ኤሳ ማላ አሳይካ ደኤና ማላ ናገትተ። [e] 17 ሄዋፐ ጉይያን፥ ኤሳይ ባረ አቡ አንጁዋ አካናዉ ኮዬዳዋ ኤሪታ፤ ሽን አ አቡ አ አንጀናን እጼዳ፤ አያዉ ጎፐ፥ ናጋራፐ ስምያ ኦግያ እ ሀራይ አቶ፥ አፎጽ ኮዪደካ ደማናዉ ዳንዳይቤና። [f]

18 ህንተንቱ ቦቻናዉ ዳንዳይያ ደርያኮነ ኤጽያ ታማኮ፥ ꬉማኮ፥ ሻርያኮነ ጎቱዋኮ፥ [g] 19 ቃይ ማላካታ ዋሱዋኮነ ቃላ ኮሻኮ ይበይክታ። አሳይ ሄ ኮሻ ስሴዳ ዎደ፥ ሀራ ጉጅ ስሰና ማላ ዎሴዳ። 20 አያዉ ጎፐ፥ ጾሳይ ኡንቱንታ፥ “ሀራይ አቶ፥ ዶአይካ ሄ ደርያ ቦቾፐ፥ ሹቻን ጫደቲደ ሀይቆ” ያጌዳ አዛዙዋ ኡንቱንቱ ገንጫናዉ ዳንዳይበይክኖ። [h] 21 አይፍያን ቤትያዌ ዳሮ ዳጋንꬅያዋ ግድያ ድራዉ ሙሴ፥ “ታን ያሻን ኮኮራይ” ያጌዳ። [i]

22 ሽን ህንተንቱ ጽዮነ ደርያ፥ ደኦ ጾሳይ ደእያ ካታማ፥ እትፐ ሺቂደ ናሸትያ ዳሮ ሻአ ኪታንቻቱዋኮ ሳሉዋ የሩሳላመ ዬድታ። 23 ጾሳ ባይራ ናናቱዋኮ፥ እትፐ ሺቄዳዋንቱኮ፥ ኡንቱንቱ ሱንꬃይ ሳሉዋን ጻፈቴዳዋንቱኮ ዬድታ፤ ቃይ አሳ ኡባ ፕርድያ ጾሳኮነ፥ ባላይ ባይናዋንታ ኦꬄዳ ጽሎ አሳቱዋ አያናቱዋኮ ዬድታ። 24 ኦራꬃ ጫቆ ጋናትያ የሱሳነ አቤላ ሱꬃፐ አꬍያዋ ኦድያ ጉኬዳ ሱꬃኮ ዬድታ። [j]

25 ህንተንቶ ኦድያ ኡራ የዉዋ ስስያዋ ህንተንቱ እጸና ማላ፥ ህንተንታ ናግተ። ጾሳ ኪታ ሳኣን ባረንቶ ኦድያዌ ኦድያዋ ስሰና እጼዳዋንቱ አታና ꬋዮፐ፥ ሳሉዋን፥ “ህንተና ናግተ” ግያ ጾሳፐ ኑን ዋኒደ አታኔ?[k] 26 ሄ ዎደ አ ኮሻይ ሳኣ ቃꬄዳ፤ ሽን እ ሀእ፥ “ታን ሳኣ ጻላላ ግደናን፥ እት ገደ ጉጃደ ሳሉዋካ ቃꬃና” ያጌዳ። [l] 27 “እት ገደ ጉጃደ” ግያ ቃላይ ቃጸናባይ ምኒደ ደአና ማላ፥ መቴዳባይ ቃጻናዋነ ክቻናዋ ጌሺደ በሴ።

28 ኑን ቃጻናዉ ዳንዳየና ካዉተꬃ አክያ ድራዉ፥ አነ ጾሳ ጋላቶይተነ አ ናሸቾይተ፤ አዉ በስያዋዳን ቦንቹዋንነ ያሻተꬃን አዉ ጎይኖይተ። 29 አያዉ ጎፐ፥ ኑ ጾሳይ ቱሙ ባይዝያ ታማ። [m]

<- እብራዌ 11 እብራዌ 13 ->