1 እስራኤሊ ባረዉ ደእያዋ ኡባ አክ ደንዲደ፥ በርሳበሀ ጋኬዳ፤ እ ባረ አዉዋ ይሳቃ ጾሳዉ ያርሹዋ ያርሼዳ። 2 ጾሳይ ቃማ አኩሙዋን አ፥ “ያቆባ፥ ያቆባ” ያጌዳ።

እ፥ “አቤ” ጊደ ኮዬዳ።

3 አ፥ “ታን ጾሳ፥ ነ አዉዋ ጾሳ፤ ኔን ዱገ ግብጼ ባናዉ ያዮፓ፤ አያዉ ጎፐ፥ ታን ኔና ያን ዎልቃማ ካዉተꬃ ከሳና። 4 ታን ኔናና እትፐ ግብጼ ባና፤ ቃይ ታን ነ ዘረꬃ ያፐ ከሳና። ዮሴፎ ባረ ኩሽያን ነ አይፍያ ሺሻና” ያጌዳ።

5 ሄዋፐ ጉየ፥ ያቆብ በርሳበሄፐ ደንዴዳ፤ እስራኤልያ አቱማ ናናይ ባረንቱ አዉዋ ያቆባ፥ ባረንቱ ናናነ ባረንቱ ማቻቱዋ ግብጼ ካቲ ኡንቱንቶ ኪቴዳ ፓራ ጋርያን ዎꬂደ አፌድኖ። 6 ኡንቱንቱ ካናነ ቢታን ሞዴዳ ማጹዋነ መህያ ኡባ አፌድኖ። ያቆብነ አ ዘረꬃ ኡባይ አናና ግብጼ ቤድኖ። [a] 7 እ ባረ አቱማ ናናነ ባረ ናና አቱማ ናና፥ ባረ ማጫ ናናነ ባረ ናና ማጫ ናና፥ ሄዌነ ባረ ዘረꬃ ኡባ ባረናና ግብጼ አፌዳ።

8 እስራኤላና ግብጼ ጋድያ ቤዳ እስራኤልያ ናና ሱንꬃይ ሀዋፐ ካሊደ ጻፈቴዳዋ።

ያቆባ ባይራ ናአይ ሮቤላ፤ 9 ሮቤላ አቱማ ናናይ ሀኖካ፥ ፓሉ፥ ሄጽሮናነ ካርማ። 10 ስሞና አቱማ ናናይ ይሙኤላ፥ ያሚና፥ ኦሃዳ፥ ያኪና፥ ጾሃራነ ካናነ ምሽራት ናኣ ሻኡላ። 11 ሌዊ አቱማ ናናይ ገርሾና፥ ቃሃታነ ማራራ። 12 ይሁዳ አቱማ ናናይ ኤራ፥ ኦናና፥ ሼላ፥ ፓሬሳነ ዛራሀ፤ ሽን ኤርነ ኦናን ካናነ ቢታን ሀይቄድኖ። ፓሬሳ አቱማ ናናይ ሄጽሮናነ ሀሙላ። 13 ይሳኮራ አቱማ ናናይ ቶላአ፥ ፑዋ፥ ያሹባነ ሽምሮና። 14 ዛብሎና አቱማ ናናይ ሰሬዳ፥ ኤሎናነ ያህላኤላ። 15 ሀዋንቱ ልያ ማስጰጾምያን ያቆባዉ የሌዳ አቱማ ናና፤ እ ማጫ ናታ ዲኖ። ሀዋንቱ አ ናናይነ ናና ናናይ ሙሊ ሀታማነ ሄዛ።

16 ጋደ አቱማ ናናይ ጻፎና፥ ሀጋ፥ ሹና፥ ኤጽቦና፥ ኤር፥ አሮዳነ አርኤላ። 17 አሴራ አቱማ ናናይ ይምና፥ ይሽዋ፥ ይሽዋሀነ ባሪአ፤ ኡንቱንቱ ምቻታ ሰራሆ። ባሪአ አቱማ ናናይ ሄቤራነ ማልክኤላ። 18 ላባን ባረ ናት ልዮ እሜዳ ዝልፓ ያቆባዉ የሌዳ ናናይ ሀዋንታ፤ ኡንቱንቱ ሙሊ ታማነ ኡሱፑና።

19 ያቆባ ማቻት ራሄል አቱማ ናናይ ዮሴፎነ ቢንያማ። 20 ኦና ካታማ ቄስያ ጶጽፋራ ናታ አስናታ ዮሴፎዉ ግብጼን ምናሳነ ኤፍሬማ የላዱ። [b] 21 ቢንያማ ናናይ በላአ፥ በኬራ፥ አሽቤላ፥ ጌራ፥ ናእማና፥ ኤሀ፥ ሮሻ፥ ሙፒማ፥ ሁፒማነ አራዳ። 22 ያቆባዉ የለቴዳ ራሄል አቱማ ናናይ ሀዋንታ፤ ኡንቱንቱ ሙሊ ታማነ ኦይዳ።

23 ዳና አቱማ ናአይ ሁሺማ። 24 ንፍታሌማ አቱማ ናናይ ያህጽኤላ፥ ጉና፥ የጼራነ ሺሌማ። 25 ላባን ባረ ናት ራሄልዉ እሜዳ ባላ ያቆባዉ የሌዳ ናናይ ሀዋንታ፤ ኡንቱንቱ ሙሊ ላፑና።

26 ያቆባና ግብጼ ቤዳ፥ አ ጉልባታፐ የለቴዳዋንቱ፥ አ ናና ማቻቱዋ ጉጀናን፥ ሙሊ ኡሱፑን ታማነ ኡሱፑና። 27 ግብጼን ዮሴፎዉ የለቴዳ ላኡ ናና ጉጅና፥ ግብጼ ቤዳ ያቆባ ሶ አሳይ ሙሊ ላፑን ታማ። [c]

28 ገሴመ ቢታን ሞካና ማላ፥ ያቆብ ይሁዳ ባረፐ ስንꬃዉ ዮሴፎኮ ኪቴዳ፤ ኡንቱንቱ ገሴመ ጋኬዳ ዎደ፥ 29 ዮሴፎ ባረ ፓራ ጋርያ ጊግሲደ፥ ባረ አዉዋ እስራኤላና ጋከታናዉ ገሴመ ቤዳ። ዮሴፎ ባረ አዉዋ ደሜዳ ሳናካ አ ቆꬍያን ጻጸት ቆም፥ ዳሮ ዎድያ ዬኬዳ።

30 እስራኤሊ ዮሴፎ፥ “ኔን ፓጻ ደእሽን፥ ታን ነ አይፍያ በኤዳ ድራዉ፥ ሀእ ታን ሀይቂንቶነ አይነ ባዋ” ያጌዳ።

31 ሄዋፐ ጉየ፥ ዮሴፎ ባረ እሻቱዋነ ባረ አዉዋ ሶ አሳ፥ “ታን ግብጼ ካትያኮ ባና፤ አዉ፥ ‘ካናነ ቢታን ደእያ ታ እሻቱዋነ ታ አዉዋ ሶ አሳይ ታኮ ዬድኖ። 32 ኡንቱንቱ ዶርሳ ሄንꬃንቻ፤ ኡንቱንቱ መህያ ሄምኖ፤ ኡንቱንቱ ባረናና ባረንቱ ዶርሳቱዋ፥ ባረንቱ ምያቱዋነ ባረንቶ ደእያዋ ኡባ አኪደ ዬድኖ’ ያጋና። 33 ካቲ ህንተንታ ጼስሲደ፥ ‘ህንተ ኪታይ አዬ?’ ያጊደ ኦቾፐ፥ 34 ህንተንቱ አዉ፥ ‘ኑን ነ ቆማቱ ናአተꬃፐ ዶሚደ፥ ኑ አዎቱዋዳን መህያ ሄሜቶ’ ያግተ። እ ህንተንታ ገሴመ ጋድያን ዎꬃናዋ፤ አያዉ ጎፐ፥ ዶርሳ ሄንꬃንቻ ኡባይ ግብጼ አሳን ካቴዳዋ” ያጌዳ።

<- ዶመꬃ 45ዶመꬃ 47 ->