1 ጾሳይ ሄዋፐ ጉየ ያቆባ፥ “ደንዳደ ፑደ ቤቴለ ባደ ያን ደአ። ኔን ነ እሻ ኤሳፐ ባቃትያ ዎደ ነዉ ቆንጬዳ ጾሳዉ ያን ያርሽያ ሳኣ ኬጻ” ያጌዳ። [a]

2 ያቆብ ባረ ሶ አሳነ ባረናና ደእያዋንታ ኡባ፥ “ህንተንቱ ግዱዋን ደእያ አላጋ ጾሳቱዋ ምስለቱዋ ድግተ፤ ህንተንቱ ቦላ ጌሽተ፤ ህንተንቱ ማዩዋነ ላምተ። 3 አነ ደንዲደ፥ ፑደ ቤቴለ ቦይተ፤ ታ መቱዋ ጋላስ ታና ስሴዳ፥ ታን ቤዳ ሳኣን ኡባን ታናና ግዴዳ ጾሳዉ፥ ታን ያን ያርሽያ ሳኣ ኬጻና” ያጌዳ። 4 ሄዋ ድራዉ ኡንቱንቱ ባረንቶ ደእያ አላጋ ጾሳቱዋ ምስለቱዋ ኡባነ ባረንቱ ሀይꬃን ደእያ ጉድቻ ኡባ ያቆባዉ እሜድኖ፤ ያቆብ ሄዋንታ ሰኬማን ደእያ ዎላ ጋርሳን ሞጌዳ።

5 ሄዋፐ ጉየ፥ ያቆብነ አ አቱማ ናናይ ደንዲደ ቢሽን፥ እት ኡራይነ ኡንቱንታ ኦይቃናዉ ካልቤና፤ አያዉ ጎፐ፥ ኡንቱንቱ ቢሽን፥ ኡንቱንቱ ዩሹዋን ደእያ ካታማ አሳ ኡባ ቦላ ጾሳ ዳጋማይ ዎꬌዳ።

6 ያቆብነ አናና ደእያ አሳይ ኡባይ ካናነ ጋድያን ደእያ (ቤቴለ ግያ) ሎዛ ጋኬድኖ። 7 ያን እ ያርሽያ ሳኣ ኬጼዳ፤ እ ሄ ሳኣ ኤል-ቤቴለ ጊደ ሱንꬄዳ፤ አያዉ ጎፐ፥ እ ባረ እሻፐ ባቃቲደ ብያ ዎደ፥ ጾሳይ አዉ ቆንጬዳ ሳአይ ሄዋ።

8 ርብቆ ድችያ ደቦራ ያን ሀይቃዱ፤ ቤቴለፐ ህርክና ደእያ ዎላ ጋርሳን እዛ ሞገታዱ፤ ሄዋ ድራዉ ሄ ምꬃ ሱንꬃይ ዬኩዋ ዎላ ጌተቴዳ።

9 ያቆብ ማስጰጾምያፐ ስሜዳዋፐ ጉየ፥ ጾሳይ አዉ ዛረꬅ ቆንጪደ፥ አ አንጄዳ፤ 10 ጾሳይ አ፥ “ነ ሱንꬃይ ያቆባ፤ ሽን ሀዋፐ ስንꬃናዉ ኔን ኡባካ ያቆባ ጌተታካ፤ ነ ሱንꬃይ እስራኤልያ ግዳና” ያጊደ እ አ እስራኤልያ ሱንꬄዳ።[b]

11 ቃይ ጾሳይ ያቆባ፥ “ታን ኡባ ዳንዳይያ ጾሳ፤ ኔን የለታ፤ ጮራታ፤ ካዉተꬃቱነ ካዉተꬃ አሳይ ኔፐ ከሳና፤ ካተቱካ ነ ጉልባታፐ ከሳና። [c] 12 ታን አብራሃመዉነ ይሳቃዉ እሜዳ ቢታ፥ ቃይ ነዉ እማይ፤ ኔፐ ጉየና ታን ሀ ቢታ ነ ዘረꬃዉ እማና” ያጌዳ። 13 ሄዋፐ ጉየ፥ ጾሳይ አናና ሃሳዬዳ ሳኣፐ ፑደ ከሴዳ።

14 ያቆብ ጾሳይ ባረናና ሃሳዬዳ ሳኣን ሹቻ ኤሲደ፥ አ ቦላ ኡሻ ያርሹዋ ትጌዳ፤ ዛይትያካ ቦላ ትጌዳ። [d] 15 ያቆብ ጾሳይ ባረናና ሃሳዬዳ ሳኣ “ቤቴለ” ጊደ ሱንꬄዳ።

16 ኡንቱንቱ ሄዋፐ ጉየ፥ ቤቴለፐ ደንዴድኖ። ኡንቱንቱ ኤፍራታ ጋካናዉ ላፋ አሽያ ዎደ፥ ራሄሎ የሉ ኦይቄዳ፤ የሉዋን እዛ ሎይꬃ ዋየታዱ። 17 የሉ እዞ ዋይሴዳ ዎደ እዞ የልስያና፥ “ያዮፓ፤ ሀዌካ አቱማ ናኣ” ያጋዱ። 18 ሽን እዛ ሀይቃደ፥ ሸምፑ ከስሽን፥ ባረ ናኣ ቤንኦና [e] ሱንꬃዱ፤ ሽን አ አዉ አ ቢንያማ [f] ሱንꬄዳ።

19 ሄዋፐ ጉየ፥ ራሄላ ሀይቃ ባሻዱ፤ ቤተሌመ ግያ ኤፍራታ አፍያ ኦግያ ዶናን ሞገታዱ። 20 ያቆብ እዝ ዱፉዋን ሀዉልትያ ሹቻ ኤሴዳ፤ ሄ ሀዉልቲ ሀቼ ጋካናዉ ራሄል ዱፉዋ ኤርሴ።

21 እስራኤሊ ሄዋፐ ደንዲደ፥ ኤደራ ግምቢያፐ ሄፍንꬃን ባረ ዱንካንያ ቶኬዳ። 22 እስራኤሊ ሄ ጋድያን ደእሽን፥ ሮቤል ቢደ፥ ባረ አዎ የሌዳ ቆማቲ ባልና ግሴዳ። እስራኤሊ ሀ የዉዋ ስሴዳ። [g]

ያቆባ አቱማ ናናይ ታማነ ላአ። 23 ልያ ናናይ ያቆባ ባይራ ናኣ ሮቤላ፥ ስሞና፥ ሌዋ፥ ይሁዳ፥ ይሳኮራነ ዛብሎና። 24 ራሄል አቱማ ናናይ ዮሴፋነ ቢንያማ። 25 ራሄል ዳንጋጽራት ባል አቱማ ናናይ ዳናነ ንፍታሌማ። 26 ልያ ዳንጋጽራት ዝልፕ አቱማ ናናይ ጋዳነ አሴራ። ሀዋንቱ ማስጰጾምያን ያቆባዉ የለቴዳ አ አቱማ ናና።

27 ያቆብ (ከብሮና ግያ) ቅርያት-አርባአ ማታን ማምረን ደእያ፥ ባረ አዉዋ ይሳቃ ሶ ዬዳ፤ ሄ ሳአይ ካሰ አብራሃመነ ይሳቅ ደኤዳ ሳኣ። [h] 28 ይሳቅ ጼታነ ሆስፑን ታሙ ላይꬃ ደኤዳ፤ 29 እ ዳሮ ዎድያ ደኢደ፥ ሎኦ ጭም ሀይቂደ ባረ ማይዛን ጋከቴዳ። አ ናናይ ኤሳይነ ያቆብ አ ሞጌድኖ።

<- ዶመꬃ 34ዶመꬃ 36 ->