1 ሄ ጋድያን ካሰ አብራሃመ ዎድያን ደእያ ኮሻ ቦላ ሀራ ኮሻይ ደንዴዳ፤ ያትና ይሳቅ ፕልስጼማ ካትያ አብመሌከኮ ጋራራ ቤዳ። 2 መꬍና ጎዳይ ይሳቃዉ ቆንጪደ ሀዋዳን ያጌዳ፤ “ግብጼ ጋድያ ዱገ ቦፓ፤ ታን ነዉ ኦዴዳ ጋድያን ደአ። 3 ሀ ጋድያን አማሬዳዋ ታካሻ፤ ታን ኔናና ግዳና፤ ኔና አንጃና፤ አያዉ ጎፐ፥ ሀ ቢታ ኡባ ታን ነዉነ ነ ዘረꬃዉ እማና፤ ታን ነ አዉዋ አብራሃመዉ ጫቄዳ ጫቁዋ ምንሳና። [a] 4 ነ ዘረꬃ ሳሉዋ ጾልንትያዳን ዳርሳና፤ ሀ ቢታ ኡባ ታን ኡንቱንቶ እማና፤ ሳኣ ካዉተꬃ ኡባይ ነ ዘረꬃ ባጋና አንጀታና። 5 አያዉ ጎፐ፥ አብራሃመ ታ ቃላ ስሴዳ፤ ታ ፕርዳቱዋነ ታ አዛዙዋ፥ ታ አዋዮቱዋነ ታ ህግያ ናጌዳ” ያጌዳ። 6 ሄዋ ድራዉ ይሳቅ ጋራራን ኡቴዳ።

7 ሄ ቢታ አሳይ ርብቅባ ደንꬂደ ይሳቃ፥ “ሀና ነዉ አዬ?” ያጊደ ኦቼዳ።

እ፥ “ሀና ታዉ ምቻቶ” ያጌዳ። አያዉ ጎፐ፥ እ ርብቃ ዳሮ ፑላንቻ ግድያ ድራዉ፥ “ታን፥ ‘እዛ ታ ማቻቶ ጎፐ’፥ ሀ ጋደ አሳይ እዝ ጋሱዋን ታና ዎꬋነንቶነ” ያግ ቆፒደ ያዬዳ። [b] 8 ይሳቅ ሄዋን ዳሮ ዎድያ ደኦዋፐ ጉየ፥ ፕልስጼማ ካቲ አብመሌክ ማስኮትያና ዱገ ጼሊደ፥ ይሳቅ ባረ ማቻት ርብቅና ጋከትሽን በኤዳ። 9 ሄዋ ድራዉ አብመሌክ ይሳቃ ጼሲደ፥ “ሄኮ እዛ ቱሙ ነ ማቻቶ! ኔን አያዉ፥ ‘እዛ ታ ምቻቶ’ ጋዲ?” ያጊደ ኦቼዳ።

ይሳቅ፥ “ ‘እዛ ታ ማቻቶ ጎፐ’፥ እዝ ጋሱዋን አሳይ ታና ዎꬋና ጋደ ጋድ” ያጌዳ።

10 አብመሌክ፥ “ሀዌ ኔን ኑ ቦላን ኦꬄዳባይ አዬ? ታ አሳፐ እት አሳይ ነ ማቻትና ግስ ድጌዳሽን፤ ኔን ኑ ቦላን ጎምያ አሃዳሽን” ያጌዳ። 11 ሄዋ ድራዉ አብመሌክ ባረ አሳ ኡባ፥ “ሀ ብታንያ ዎይ አ ማቻቶ ቦችያ ኦንነ ቱሙ ሀይቃና” ያጊደ አዛዜዳ።

12 ይሳቅ ሄ ጋድያን ካꬃ ዘሪደ፥ ሄ ላይꬃን ጼቱ ኩሽያ ጫኬዳ፤ አያዉ ጎፐ፥ መꬍና ጎዳይ አ አንጄዳ። 13 እ ዱረቴዳ፤ ዱረታ ቦላ ዱረታይ አዉ ዳር ዳር ቤዳ። 14 ይሳቃዉ ዶርሳ ዉዲ፥ ሚዛ ዉዲነ ቆማቱ ሎይꬅ ዳሬዳ ድራዉ፥ ፕልስጼማ አሳቱ አ ቃናቴድኖ። 15 ሄዋ ድራዉ፥ አ አዉዋ አብራሃመ ዎድያን፥ አ አዉዋ ቆማቱ ቦኬዳ ሃꬃ ኦላ ኡባ ፕልስጼማ አሳቱዋ ቢታ ዛሪደ ባሬድኖ።

16 ሄ ዎደ አብመሌክ ይሳቃ፥ “ኑፐ ሻከታደ ባ፤ ኔን ኑፐ አꬋ ምናዳ” ያጌዳ። 17 ይሳቅ ሄዋፐ ደንዲደ፥ ጋራራ ዎምባ ቢደ ያን ኡቴዳ። 18 ይሳቅ ባረ አዉዋ አብራሃመ ዎድያን ቦከቴዳ ሃꬃ ኦላቱዋ፥ አብራሃመ ሀይቄዳዋፐ ጉየ፥ ፕልስጼማ አሳቱ ባሬዳዋንታ ዛር ቦክ ከሲደ፥ አ አዉ ሱንꬄዳ ሱንꬃን ኡንቱንታ ጼሴዳ።

19 ይሳቃ ቆማቱ ዎምባን ቦኪደ፥ ፑልትያ ሃꬃ ኦላ ያን ደሜድኖ። 20 ሽን ጋራራ ሄንꬃንቻቱ ይሳቃ ሄንꬃንቻቱዋና፥ “ሃꬃይ ኑዋ” ያጊደ ዋላቀቴድኖ። ኡንቱንቱ አናና ፓሉመቴዳ ድራዉ፥ ይሳቅ ሄ ሃꬃ ኦላ፥ “ፓሉምያ” ጊደ ሱንꬄዳ።

21 ሄዋፐ ጉየ፥ ኡንቱንቱ ሀራ ሃꬃ ኦላካ ቦኬድኖ፤ ሽን ኡንቱንቱ ሄ ሃꬃ ኦላ ጌዱዋን ዋላቀቴድኖ፤ ሄዋ ድራዉ እ ሄ ሃꬃ ኦላ “ሞርከቲታ” ጊደ ሱንꬄዳ። 22 ሄዋፐ ጉꬃ ዛርዳኢደ፥ ሀራ ሃꬃ ኦላ ቦክሴዳ፤ አ ጋሱዋን ኦንነ ዋላቀትቤና፤ “ጾሳይ ሀእ ኑዉ አሴዳ፤ ኑን ሀ ጋድያን ጮራና” ጊደ አ፥ “አኮ ሳኣ” ጊደ ሱንꬄዳ።

23 ሄዋፐ ደንዲደ፥ ፑደ በርሳበሄ ቤዳ። 24 ሄ ቤዳ ጋላስ ቃማ መꬍና ጎዳይ አዉ ቆንጪደ አ፥ “ታን ነ አዉዋ አብራሃመ ጾሳ፤ ታን ኔናና ደእያ ድራዉ፥ ኔን ያዮፓ፤ ታን ኔና አንጃና፤ ታ ቆማ አብራሃመ ድራዉ ነ ዘረꬃ ታን ጮርሳና” ያጌዳ። 25 ይሳቅ ሄዋን ያርሽያ ሳኣ ኬጺደ፥ መꬍና ጎዳ ሱንꬃ ጼሴዳ። ያን እ ባረ ዱንካንያ ꬎጌዳ፤ ቃይ ያን አ ቆማቱ ሃꬃ ኦላ ቦኬድኖ።

26 ሄዋፐ ጉየ፥ አብመሌክ ባረና ዞርያ አሁዛታነ ባረ ዎታዳራቱዋ ካፑዋ ፕኮላ አኪደ፥ ጋራራፐ ይሳቃኮ ዬዳ። [c] 27 ይሳቅ ኡንቱንታ፥ “ህንተንቱ ካሰ ታና እጺደ፥ ህንተንቱ ቢታፐ ከስ የዴድታ፤ ሀእ ቃይ ታኮ አያ አካና የድቴ?” ያጌዳ።

28-29 ኡንቱንቱ አ፥ “መꬍና ጎዳይ ኔናና ደእያዋ ኑን ቆንጭያን በኤዶ። ሄዋ ድራዉ ጫቆ ጫቁ ኑ ግዶንነ ነ ግዶን ደአና ኮሼ ያገቶ። ኑን ኔና ቦችበይኮ፤ ሽን ኑን ነዉ ኬካተꬃ ጻላላ ኦꬂደ፥ ኔና ሳሮተꬃን ሞይዝ የዴዶ። ሄዋዳንካ ኔን ኑ ቦላ ኢታባ ኦና ማላ፥ አነ ኔናና ጫቁዋ ጫቀቶይተ። ሀእ ኔን መꬍና ጎዳይ አንጄዳዋ” ያጌድኖ። 30 ሄ ዎደ ይሳቅ ኡንቱንቶ ባላ ጊግስና፥ ሜድኖነ ኡሼድኖ። 31 ዎንተꬃ ጋላስ ዎንታ ጉራን ደንዲደ፥ ኡንቱንቱ እቱ እቱዋና ጫቀቴድኖ። ይሳቅ ኡንቱንታ ሞይዝና፥ ኡንቱንቱ አፐ ሳሮ ሻከቲደ ቤድኖ።

32 ሄ ጋላስ ይሳቃ ቆማቱ ዪደ፥ ባረንቱ ቦኬዳ ሃꬃ ኦላባ አዉ ኦዴድኖ፤ “ኑን ሃꬃ ደሜዶ” ያጌድኖ። 33 እ ሄ ሃꬃ ኦላ ሳበህ ጊደ ሱንꬄዳ፤ ሄዋ ድራዉ ሄ ካታማ ሱንꬃይ ሀቼ ጋካናዉ በርሳበህ [d] ጌተቴ።

34 ኤሳ ላይꬃይ ኦይታሙዋ ግድያ ዎደ፥ ሂትያ ብኤዶ ናቶ ዮድቶነ ሂትያ ኤሎና ናቶ ባሰማቶ አኬዳ። 35 ኡንቱንቱ ይሳቃነ ርብቆ ካዮዪደ ደኤድኖ።

<- ዶመꬃ 25ዶመꬃ 27 ->