1 ጾሳይ ባረ ኦዴዳዋዳን ሳርኮ ዬዳ፤ ጾሳይ ሳሮ ባረ ጌዳዋዳን ኦꬄዳ። 2 ሳራ ሻሃራደ፥ ጭሜዳ አብራሃመዉ ጾሳይ ጌዳ ዎዲ ጋክና፥ አቱማ ናኣ የላዱ። 3 ሳራ አዉ የሌዳ ባረ ናኣ ሱንꬃ አብራሃመ “ይሳቃ” ያጊደ ሱንꬄዳ።[a] 4 አብራሃመ ባረ ናኣ ይሳቃ ጾሳይ አዛዜዳዋዳን ሆስፑንꬃ ጋላሳን ቃጻሬዳ። [b] 5 አ ናኣ ይሳቅ አዉ የለቴዳ ዎደ፥ አብራሃመ ላይꬃይ ጼታ። 6 ሳራ፥ “ጾሳይ ታዉ ሚቻ [c] እሜዳ፤ ቃይ ሀዋ ስስያዌ ኡባይ ታናና ሚጫና” ያጋዱ። 7 ቃይካ ሳራ፥ “አብራሃመዉ ሳራ ናኣ ꬋንꬃና ጌዳዌ ኦኔ? ግዶፐነ ታን ሀእ አዉ እ ጭሜዳ ዎድያን ናኣ የላድ” ያጋዱ።

8 ጉꬃ ናአይ ድጪደ፤ ꬋንꬃ ዱꬄዳ፤ አብራሃመ ይሳቅ ꬋንꬃ ዱꬄዳ ጋላስ ዎልቃማ ባላ ከሴዳ። 9 ሽን ግብጼፐ ዬዳ አጋራ አብራሃመዉ የሌዳ ናአይ ይሳቃና ካእያዋ ሳራ በኣዱ። 10 አብራሃማ፥ “ሀ አይላት ናአይ ታ ናኣ ይሳቃና ኡባካ ላተና ድራዉ፥ አይላቶነ እዝ ናኣ ከሳ የዳ” ያጋዱ። [d]

11 ሀ የዉ ባረ ናኣ ቦችያ ድራዉ፥ አብራሃመ ሎይꬅ መቶቴዳ። 12 ሽን ጾሳይ አብራሃመ፥ “ናአዉነ ነ አይላትዉ ሎይꬃ መቶቶፓ፤ ሳራ ነዉ ኦድያዋ ኡባ ስሳ፤ አያዉ ጎፐ፥ ነ ዘረꬃይ ይሳቃ ባጋና ጼሰታናዋ። [e] 13 ቃይ አይላት ናኣ ታን ካዉተꬃ ከሳና፤ አያዉ ጎፐ፥ እካ ነ ዛረ” ያጌዳ።

14 ዎንታ ጉራን አብራሃመ ደንዴዳ፤ ቁማነ ኦጎሩዋን ሃꬃ አኪደ፥ አጋሮ ሀሽያን ቶሲደ፥ እዝ ናኣካ እዝዉ እሚደ ከስ የዴዳ። እዛ ባደ፥ በርሳበሄ ግያ ዎራን ቶይላካታዉ። 15-16 ሃꬃይካ ኦጎሩዋን ዉሬዳ ዎደ እዛ፥ “ናአይ ሀይቂሽን፥ ኡታደ በእከ” ያጋደ፥ ናኣ እት ቡራ ጋርሳን ዎꬃደ፥ ላኡ ጼቱ ዋꬋ ግድያዋ ኬሻ ባደ ኡታዱ። ማታን ኡታደ፥ ባረ ቃላ ꬎቂሳደ ዬካዱ።

17 ጾሳይ ናኣ ዋሱዋ ስሴዳ፤ ጾሳ ኪታንቻይ አጋሮ ሳሉዋፐ ጼሲደ፥ “አጋሬ፥ ዋናዲ? ጾሳይ ናአይ ግሴዳ ሳኣን ዋስያዋ ስሴዳ ድራዉ ያዮፓ፤ 18 ደንዳ ኤቃ፤ ናኣነ ነ ኩሽያን ደንꬃ፤ አያዉ ጎፐ፥ ታን አ ዎልቃማ ካዉተꬃ ኦꬃና” ያጌዳ። 19 ጾሳይ እዝ አይፍያ ዶይና፥ ሃꬃ ኦላ በኣዱ፤ ባደ ኦጎሩዋን ሃꬃ ኩንꬃዱ፤ ናኣካ ኡሻዱ። 20 ናአይ ድጭያ ዎደ፥ ጾሳይ አናና ግዴዳ፤ እ ዎራን ደኢደ፥ ዎንዳፍያ ዱክያ አሳ ግዴዳ። 21 እ ፓራና ግያ ዎራን ደእሽን፥ አ ዳያ ግብጼፐ አዉ ማቻቶ ደማዱ።

22 ሄ ዎደ፥ አብመሌክ ባረ ዎታዳራቱዋ ካፑዋ ፕኮላና አብራሃመኮ ቢደ፥ “ኔን ኦꬅያ ኡባባን ጾሳይ ኔናና ደኤ። [f] 23 ኔን ታ ቦላ ዎይ ታ ናና ቦላ ዎይ ታ ዘረꬃ ቦላ ገነባ ኦና ማላ፥ ሀእ ሀዋን፥ ጾሳ ስንꬃን ታዉ ጫቃ፤ ታን ነዉ ኬኬዳዋዳን፥ ኔንካ ታዉነ ኔን እማꬃተꬃን ደእያ ሀ ቢታዉ ሎአ” ያጌዳ።

24 አብራሃመ፥ “ታን ጫቃይ” ያጌዳ።

25 ሄ ዎደ፥ አብራሃመ አብመሌካ ቆማቱ አኬዳ ሃꬃ ኦላባ አብመሌካዉ ማጋኔዳ። 26 ሽን አብመሌክ፥ “ሄዋ ኦን ኦꬄደንቶ ታን ኤርከ፤ ኔንካ ቃይ ታዉ ኦዳባካ፤ ታን ሀቼ ጋካናዉ ሄዋ ስሳበይከ” ያጌዳ።

27 ሄዋፐ ጉየ አብራሃመ ዶርሳነ ሚዛቱዋ አሂደ፥ አብመሌካዉ እምና፥ ኡንቱንቱ ላኡ ጫቁዋ ጫቀቴድኖ። 28 አብራሃመ ላፑን ማጫ ዶርሳ ማራቱዋ ዉድያፐ ሻኬዳ፤ 29 አብመሌክ አብራሃማ፥ “ሀ ኔን ዱማ ሻካ ዎꬄዳ ላፑን ማጫ ዶርሳ ማራቱዋ አያዉ ሻካዲ?” ያጊደ ኦቼዳ።

30 አብራሃመ፥ “ታን ሀ ሃꬃ ኦላ ቦኬዳዎ ማርካ ግዳና ማላ፥ ሀ ላፑን ማጫ ዶርሳ ማራቱዋ ታ ኩሽያፐ አካ” ያጌዳ።

31 ሄዋን ሄ ላኡ አሳቱ ጫቀቴዳ ድራዉ፥ ሄ ሳአይ በርሳበሄ [g] ጌተቴዳ።

32 በርሳበሄን ጫቁዋ ጫቀቴዳዋፐ ጉየ፥ አብመሌከነ አ ዎታዳራቱ ካፑዋ ፕኮል ደንዲደ፥ ፕልስጼማ ቢታ ስሜድኖ። 33 አብራሃመ በርሳበሄን ታማርስከ ጌተትያ ምꬃ ቶኬዳ። ሄዋን ጎዳ፥ መꬍና ጾሳ፥ ሱንꬃ ጼሴዳ። 34 አብራሃመ ፕልስጼማ ጋድያን ዳሮ ዎድያ ደኤዳ።

<- ዶመꬃ 20ዶመꬃ 22 ->