1 ሄ ላኡ ኪታንቻቱ ኦማርስ ሶዶማ ካታማ ጋኬድኖ፤ ሄ ዎደ ሎጸ ሄ ካታማ ፐንግያን ኡቴዳ። ሎጸ ኡንቱንታ በእነ ኡንቱንቱና ጋከታናዉ ኤቂደ ቤዳ፤ ባረ ዴሙዋ ሳኣ ጋꬂደ ጎይኔዳ፤ 2 “ታ ጎዳቶ፥ ህንተንቱ ቆማ ሶ ስሜርክቴ፤ ህንተንቱ ገድያ ሜጨቲደ ቃማ አቅተ፤ ጉራን ደንዲደ ህንተንቱ ብያሳኣ ባንታ” ያጌዳ።

ኡንቱንቱ፥ “ቱይት፤ ኑን ሀ ካታማ ዳባባን አቃና” ያጌድኖ።

3 ሽን እ ኡንቱንታ ሎይꬅ ሾቤዳ ድራዉ፥ አናና ቢደ አ ሶ ገሌድኖ፤ እ ኡንቱንቶ ቁማ ካꬂደ፥ ጫለና ኡክꬃ ኡኪደ አꬂና፥ ኡንቱንቱ ሜድኖ።

4 ኡንቱንቱ ግሰናን ደእሽን፥ ሶዶማ ካታማ አቱማ አሳይ ኡባይ፥ ናናቱዋፐ ጭማ ጋካናዉ፥ እቱነ አተናን ዪደ፥ ጎልያ ዩይ አꬍ ዶዴድኖ። 5 ሎጻ ጼሲደ ያጌድኖ፤ “ሀቼ ቃማ ነ ሶ ዬዳ አቱማ አሳቱ ሀቃን ደኢኖ? ኑን ኡንቱንቱና ሻርሙጻና ማላ ኡንቱንታ ኑኮ ካረ ከሳ” ያጌድኖ። [a]

6 ሎጸ ኡንቱንቱና ጋከታናዉ ካረ ከሲደ፥ ካርያ ጉየ ጎርዴዳ፤ 7 ኡንቱንታ ሀዋዳን ያጌዳ፤ “ታ እሻቶ፥ ሀ ኢታ ኦሱዋ ኦꬆፕተ። 8 ስም ታዉ ላኡ ማጫ ናናይ፥ አቱማ አሳ ኤርቤና ዎዶራቱ ደኢኖ፤ ታን ኡንቱንታ ህንተንቶ ካረ ከሳይ፤ ህንተንቱ ኡንቱንታ ህንተዉ ሎኦዋዳን ኦꬃና ዳንዳዪታ። ሽን ሀ አሳቱዋ ቦላ አይነ ኦꬆፕተ፤ አያዉ ጎፐ፥ ኡንቱንቱ ታ ጎለ ገሊደ ታ ካራ ጋርሳን ደኢኖ” ያጌዳ።

9 አሳቱ አ፥ “ኑ ስንꬃፐ ክቻ!” ያጌድኖ፤ ቃይካ ኡንቱንቱ፥ “ሀ ብታኒ ሀ ጋድያን በተ ግድ ዪደ፥ ሀእ ኑ ቦላ ፕርዳናዉ ካጄሌዳ! ሀእ ኑን ኔና ኡንቱንቱ ቦላ ኦꬃናዉ ቆፔዳዋፐ ኢታ ኦꬃና!” ያጌድኖ። ኡንቱንቱ ሎጻ ጉየ ሱግ የጊደ ፐንግያ መንꬃናዉ ሺቄድኖ። 10 ሽን ሄ ላኡ አሳቱ ባረንቱ ኩሽያ ካረ የዲደ፥ ሎጻ ሶ ጎች ገልሲደ ፐንግያ ጎርዴድኖ። 11 ሄዋፐ ጉየ፥ ኡንቱንቱ ጎለ ፐንግያን ደእያ አሳ፥ ጉꬃፐ ግታ ጋካናዉ ቆቅሴድኖ። ያትና ኡንቱንቱ ፐንግያ ደማናዉ ኮዪደ ዳቡሬድኖ። [b]

12 ሄ ላኡ አሳቱ ሎጻ፥ “ነዉ ሀዋን ነ ማጫ ናና ጊግሴዳዋንቱ፥ ነ አቱማ ናናይ ዎይ ነ ማጫ ናናይ ዎይ ነባ ግዴዳ አሳይ ኦና ግዶፐነ ሀ ካታማን ደኢ? ኡንቱንታ ሀዋፐ ከሳ ድጋ። 13 አያዉ ጎፐ፥ ኑን ሀ ሳኣ ꬋይሳና ሀኔቶ። ኡንቱንቱ ዋስያ ዋሱ ጎዳ ስንꬃን ሎይꬅ ዳሬዳ ድራዉ፥ መꬍና ጎዳይ ኑና ሀ ካታማ ꬋይሳናዉ ኪቴዳ” ያጌድኖ።

14 ሄዋ ድራዉ ሎጸ ከሲደ፥ ባረ ማጫ ናና ጊግሴዳዋንቱኮ ቢደ ኡንቱንታ፥ “ኤሌል ደንዲደ ሀዋፐ ከስተ፤ አያዉ ጎፐ፥ መꬍና ጎዳይ ሀ ካታማ ꬋይሳና ሀኔ” ያጌዳ። ሽን አ ማጫ ናና ጊግሴዳዋንቱ እ ቅꬌዳ ጊደ ቆፔድኖ።

15 ሳአይ ዎንታናዉ ሆልጆጅ ዞእያ ዎደ፥ ሄ ኪታንቻቱ ሎጻ፥ “ደንዳ! ነ ማቻቶነ ሀዋን ደእያ ነ ላኡ ማጫ ናና አካደ ኤሌላ ከሳ! ሄዌ ꬋዮፐ፥ ሀ ካታማይ ፕርደትያ ዎደ ኔንካ ꬋያሳ” ያጊደ ድርቢሴድኖ። 16 ሽን ሎጸ ያት ጊና፥ ሄ አሳቱ አ ኩሽያ፥ አ ማቻት ኩሽያነ አ ማጫ ናና ላኡዋ ኩሽያ ኦይቂደ፥ ሄ ካታማፐ ኡንቱንታ ከሴድኖ፤ አያዉ ጎፐ፥ መꬍና ጎዳይ ኡንቱንቶ ቃረቴዳ። [c] 17 ኪታንቻቱ ኡንቱንታ ካታማፐ ከሴዳ ሳናካ፥ ሄ ኪታንቻቱዋፐ እቱ ያጌዳ፤ “ህንተንቱ ሸምፑዋ አኪደ ባቃትተ! ጉየ ጼሎፕተ! ቃይ ሀ ዎምባን ሀቃንካ ኤቆፕተ! ደርያኮ ባቃትተ! ህንኮደ ህንተንቱ ꬋያና” ያጌዳ።

18 ሽን ሎጸ ኡንቱንቶ ያጌዳ፤ “ቱይት! ሀይ ታ ጎዳቶ፥ ያጎፕተ። 19 ታን ህንተንቱ ቆማይ ህንተንቱ ስንꬃን ናሸቴዳዋ ድራዉ፥ ታና አሻናዉ ታዉ ዳሮፐ ሎይꬅ ማዴድታ። ሽን ታን ደርያኮ ባቃታናዉ ዳንዳይከ፤ ሀዌ ባሻይ ጋኪደ ታና ሙካናነ ታንካ ሀይቃና። 20 ጼልተ፤ ሀዋን እት ካታማይ ደኤ፤ እ ዎጻናዉ ማታነ ጉꬃ ካታማ። ታን ያ ባቃቶ? እ ቄር ጉꬃ ካታማ ግደኔ? ታ ሸምፑ ያን አታናዋ” ያጌዳ።

21 ኪታንቻይ፥ “ኤ፥ ታን ነ ኦሻ ስሳና፤ ታን ኔን ግያ ካታማ ꬋይስከ። 22 ሽን ያ ኤሌላ ባቃታ፤ አያዉ ጎፐ፥ ኔን ያ ጋካናዉ፥ ታን አይነ ኦꬃናዉ ዳንዳይከ” ያጌዳ። ሄዋ ድራዉ ሄ ካታማ ሱንꬃይ ዞኣሮ [d] ጌተቴዳ።

23 ሎጸ ጾኣሮ ጋኬዳ ዎደ፥ ብሮ ጻልቂ ዶሌዳ። 24 መꬍና ጎዳይ ሄ ዎደ ታማነ ኤጽያ ዲንያ ሶዶማነ ጋሞራ ቦላን መꬍና ጎዳ ማታፐ ሳሉዋፐ ቡኪደ ባይዜዳ። [e] 25 ሄዋዳን ኦꬂደ መꬍና ጎዳይ ሄ ካታማታ፥ ሄ ዎምባ ኡባ፥ ሄ ካታማቱዋ ግዶን ደእያ ኡባነ ሄ ጋድያን ደእያ ምꬃ ማታ ꬋይሴዳ። 26 ሽን ሎጸ ማቻታ ጉየ ጼላደ ማጽነ ቱሳ ግዳዱ። [f]

27 ዎንተꬃ ጋላስ ዎንታ ጉራን አብራሃመ ደንዲደ፥ መꬍና ጎዳ ስንꬃን ካሰ እ ኤቄዳ ሳኣ ስሚደ ቤዳ። 28 እ ሶዶማነ ጋሞራ ሄ ዛንጋራን ደእያ ቢታ ኡባ ዱገ ጼሌዳ፤ ሄ ዎደ ጩዋይ ጮጭያ ታማ ጩዋዳን ሄ ቢታፐ ደንድያዋ በኤዳ።

29 ጾሳይ ሄ ዛንጋራ ካታማቱዋ ꬋይሴዳ ዎደ፥ አብራሃማ ሀሳዬዳ፤ ሎጸ ደኤዳ ካታማቱዋ ꬋይሲደ ሎጻ ባሻፐ ከሴዳ።

30 ሎጸ ዞኣራን ኡታናዉ ያዬዳ ድራዉ፥ ባረ ማጫ ናና ላኡዋና ደርያ ከሴዳ፤ ጎንጎሎ ግዶን ባረ ላኡ ማጫ ናናቱዋና ኡቴዳ። 31 እት ጋላስ ባይራ ናታ ቴፋቶ፥ “ኑ አዉ ጭሜዳ፤ ሳኣ ኡባን [g] ደእያ ዎጋዳን ኑናና ግሳናዉ ሀ ጋድያን ኡባካ አቱማ አሳይ ባዋ። 32 ሃያ፤ ዎይንያ ኤሳ ኑ አዉዋ ኡሺደ፥ አናና ግሲደ፥ ኑ አዉዋፐ ኑ ዛርያ ቱራ አሾይተ” ያጋዱ። 33 ሄ ጋላሳ ቃማ ባረንቱ አዉዋ ዎይንያ ኤሳ ኡሼድኖ፤ ባይራታ ገላደ አናና ግሳዱ፤ እዛ አናና ግስያ ዎደካ ደንድያ ዎደካ እ ኤርቤና።

34 ዎንተꬃ ጋላስ ባይራታ ቴፋቶ፥ “ስሳ፤ ዝኖ ታን ታ አቡና ግሳድ፤ ሀቼ ቃማ ቃይ ዎይንያ ኤሳ ኡሽና፥ ኔንካ ገላደ አናና ግሳ፤ ያቲደ ኑን ኑ አዉዋፐ ኑ ዛርያ ቱራ አሾይተ” ያጋዱ። 35 ሄ ጋላስ ቃማ ቃይካ ዎይንያ ኤሳ ኡሼድኖ፤ ቴፋታካ ገላደ አናና ግሳዱ፤ እዛ አናና ግስያ ዎደካ ደንድያ ዎደካ እ ኤርቤና። 36 ያትደ ሎጸ ማጫ ናናይ ላአቱካ ባረንቱ አዉዋፐ ሻሃሬድኖ። 37 ባይራታ አቱማ ናኣ የላዱ፤ አ ሱንꬃ ሞኣባ [h] ጋደ ሱንꬃዱ፤ እነ ሀቼ ጋካናዉ ሞኣባቱዋ አዉዋ። 38 ቃይ ቴፋታካ አቱማ ናኣ የላዱ፤ አ ሱንꬃ በንኣማ [i] ጋደ ሱንꬃዱ፤ እነ ሀቼ ጋካናዉ አሞናቱዋ አዉዋ።

<- ዶመꬃ 18ዶመꬃ 20 ->