2 አብራመ፥ “አቤት ኡባ ሞድያ መꬍና ጎዳዉ፥ ታዉ ኡባካ ናእ ባይና ድራዉ፥ ኔን እምያ ጋቲ ታዉ አይሴ? ደማስቆ ኤልኤዛር ታና ላታና ሽን”[a] ያጌዳ። 3 ቃይካ አብራመ፥ “ኔን ታዉ ናኣ እማባካ፤ ሄዋ ድራዉ ታ ሶን ደእያ ቆማይ ታና ላትያዋ” ያጌዳ።
4 መꬍና ጎዳ ቃላይ አኮ ዪደ፥ “ሀ ቆማይ ኔና ላተና፤ ሽን ነ ጉልባታፐ ከስያዌ ኔና ላታና” ያጌዳ። 5 ስሚደ ካረ አ ከሲደ፥ “ሳሉዋ ፑደ ጼላ፤ ኔን ጾልንተቱዋ ፓይዳናዉ ዳንዳዮፐ ፓይዳ፤ ነ ዘረꬃይካ ሀዋ ኬሻ ግዳና” ያጌዳ። [b]
6 አብራሞ መꬍና ጎዳ አማኔዳ፤ መꬍና ጎዳይ ሄዋ አዉ ጽሎተꬃዳን ፓይዴዳ። [c]
7 መꬍና ጎዳይ ቃይካ አ፥ “ታን ኔን ሀ ቢታ ላታና ማላ ነዉ እማናዉ ኡር ግያ ካላዳዌቱዋ ካታማፐ ኔና ከሳ አሄዳ መꬍና ጎዳቴ” ያጌዳ።
8 ሽን አብራሞ አ፥ “አቤት ኡባ ሞድያ መꬍና ጎዳዉ፥ ታን ሀ ቢታ ላታናዋ አያን ኤሮ?” ያጌዳ።
9 መꬍና ጎዳይ አ፥ “ሄዙ ላይꬃ ኡሳ፥ ሄዙ ላይꬃ ዴሻ፥ ሄዙ ላይꬃ ዶርሳነ ላኡ ቆሞ ሀራጰቱዋ ታዉ አካደ ያ” ያጌዳ። 10 እ ሀዋንታ ኡባ አዉ አፌዳ፤ ኡንቱንታ ጳልቂደ ላኡ ከሴዳ፤ ላኡዋ ከሴዳዋ እቱዋ እቱዋ ባጋን ዎꬄዳ፤ ሽን ካፎቱዋ ላኡ ከስ ጳልቂቤና። 11 ሄ ዎደ አንኮቱ ሄ አሹዋ ቦላ ዎꬌድኖ፤ ሽን አብራመ ኡንቱንታ የደርሴዳ።
12 አዋይ ዉልያ ዎደ አብራማ ዎልቃማ ገምእሹ ኦይቄዳ፤ ꬍጵ ጌዳ ꬉማይ አ ቦላ ዎꬌዳ።[d] 13 ያትና መꬍና ጎዳይ አ፥ “ነ ዘረꬃይ ሀራ ጋድያን በተ ግዲደ ደአናዋ ኔን ቱሙፐ ኤራ፤ ኡንቱንቱ አይለቲደ ኦይዱ ጼቱ ላይꬃ ናቀታና። [e] 14 ሽን አይለዪደ ኡንቱንታ ሞድያ ካዉተꬃ ታን ሙራና፤ ሄዋፐ ጉየ፥ ኡንቱንቱ ዳሮ አቁዋና ሄ ቢታፐ ከሳና። [f] 15 ኔና ግዶፐ፥ ኔን ነ ማይዛ አዎቱዋኮ ሳሮተꬃን ባና፤ ኔን ሎይꬃ ጭማደ ሀይቃናነ ሞገታና። 16 ሽን ኦይደንꬆ የለታን ነ ዘረꬃይ ሀ ጋድያ ስማና፤ አያዉ ጎፐ፥ አሞረቱ ናጋራይ ብሮ ልክያ ጋክቤና” ያጌዳ።
17 አዋይ ዉልና ሳአይ ꬉሜዳ፤ ጮጭያ ጩዋይነ ታማ ላጩ አኬከናን ቤቲደ፥ ሄ ላኡ ከስ ጳልቀቴዳዋንቱፐ ግዱዋና አꬌዳ። 18 ሄ ጋላስ መꬍና ጎዳይ አብራመና ሀዋዳን ያጊደ ጫቁዋ ጫቀቴዳ፤ “ግብጼ ሻፋፐ ዶሚደ ኤፍራጺሳ ግያ ዎልቃማ ሻፋ ጋካናዉ፥ ሀ ቢታ ታን ነ ዘረꬃዉ እማድ፤ [g] 19-21 ሀ ቢታይ ቄናቱዋ፥ ቀኒዘቱዋ፥ ቃድሞነቱዋ፥ ሂተቱዋ፥ ፓርዘቱዋ፥ ራፋየቱዋ፥ አሞረቱዋ፥ ካናነቱዋ፥ ገርጌሰቱዋነ ያቡሳቱዋ ቢታ” ያጌዳ።
<- ዶመꬃ 14ዶመꬃ 16 ->