1 አኬካይ ባይና ጋላትያ አሳቶ፥ ታን ህንተና ክርስቶስ ማስቃልያ ቦላን ምስማርያን ꬍሸቲደ ካቀቴዳዋ ቆንጭሳደ ታማርሳድ። ያትና፥ ቱሞ ህንተ ኤኖ ጌና ማላ፥ ህንተንታ ብቴዳዌ ኦኔ? 2 አነ ታዉ ሀ እት የዉዋ ጻላላ ኦድተ: ጾሳ አያና፥ ህጊ ግያዋ ናጊደ አኬድቴ ዎይ አማኑዋን ስሲደ አኬድቴ? 3 ህንተንቱ ሄዋ ኬና ኤዬ? ጾሳ አያናን ደኡዋ ዶሚደ፥ ሀእ ህንተ ዎልቃን ፖሊቴ? 4 ህንተንቱ ዳቡራ ኡባዉ አይነ ማዱ ባዌ? ቱማ ማዱ ደኤ። 5 ያትና፥ ጾሳይ ህንተንቶ ጌሻ አያና እምያዌነ ህንተ ግዶን ማላታ ኦꬅያዌ፥ ሙሴ ህግያ ህንተ ኦꬄዳ ድራሴ? ዎይ ምሽራቹዋ ቃላ ስሲደ፥ ህንተ አማኔዳ ድራሴ?

6 ሀዋዳንካ፥ አብራሃሞ ጾሳ አማኔዳ ድራዉ፥ ጾሳይ አ ጽሉዋዳን ጼሌዳ። 7 ሄዋ ድራዉ፥ አማንያዋንቱ አብራሃመ ዛረ [a] ግድያዋ ኤርተ። [b] 8 ጾሳይ አይሁዳ ግደና አሳ አማኑዋን ጽልሳናዋ ጾሳ ማጻፋይ ካሰት በኢደ፥ “ሀ አላምያን ደእያ አሳይ ኡባይ ኔናን አንጀታና” ያጊደ፥ ምሽራቹዋ ቃላ አብራሃሞ ካሰቲደ ኦዴዳ። [c] 9 ሄዋ ድራዉ፥ አብራሃሞ አማኒደ አንጀቴዳዋዳን፥ አማንያዋንቱ አዋዳካ አንጀታና።

10 ህግያ ኦሱዋን አማነቲደ ደእያዋንቱ ኡባይ ሸቃ ግዶን ደኢኖ፤ አያዉ ጎፐ፥ ጾሳ ማጻፋይ፥ “ህግያ ማጻፋን ጻፈቴዳ ኡባባን ደኤናዌነ ፖለናዌ ኦንነ ሸቀቴዳዋ” ያጌ። 11 ጾሳ ማጻፋይ፥ “ጾሳ ስንꬃን ጽላቱ አን አማነቲደ ደኡዋን ደአና”[d] ግያ ድራዉ፥ ኦንነ ጾሳ ስንꬃን ህግያ ናግያዋን ጽለናዌ ኤረቴዳዋ። 12 ህጊ አማኑዋን ባሰት ኤቂቤና፤ ሽን ጾሳ ማጻፋይ፥ “ህጊ ግያዋ ፖልያዌ አን ደኡዋን ደአና” ያጌ። [e]

13 ጾሳ ማጻፋን፥ “ምꬃ ቦላ ካቀት ሀይቂያ ኦንነ ሸቀቴዳዋ” ጌተት ጻፈቴዳ ድራዉ፥ ክርስቶስ ኑ ድራዉ ሸቀቴዳዋ ግዲደ፥ ኑና ህግያ ሸቃፐ ዎዝ አኬዳ። [f] 14 ክርስቶስ ሄዋ አያዉ ኦꬄዴ ጎፐ፥ ጾሳይ እማና ጎፐ፥ ጌሻ አያና ኑን አማኑዋን አካናዳንነ አብራሃመ አንጁ ባረ ባጋና አይሁዳ ግደና አሳ ጋካና ማላ ጊደ ኦꬄዳ።

15 ታናዳን አማንያዋንቶ፥ ታን አሳይ ግያዋዳን ህንተንቶ ጋይ፤ ሀራይ አቶ ላኡ አሳቱ እት የዉዋ ሃሳዪደ፥ ጫቁዋ ዎꬄዳዋፐ ህን ባጋን፥ ኦንነ ሄ ጫቁዋ ብላናዉ ዎይ ሀራባ ሄ ጫቁዋ ቦላ ጉጃናዉ ዳንዳየና። 16 አብራሃሞነ አ ዛሪ ጾሳይ ስንꬃፐ እማና ጊደ ሃሳዬዳዋ ስሴድኖ። ጾሳ ማጻፋይ ጮራ አሳዉ ሃሳይያዋዳን፥ “ነ ዘረꬃቶ” ጌና፤ ዋጊ ጎፐ፥ “ነ ዛረዉ” ያጌ። ሄዌነ፥ እት አሳ ጻላላ ጌ፤ እካ ክርስቶሳ። [g]

17 ታን ግያዌ ሀዋ፤ ጾሳይ አብራሃሞ ጫቂደ፥ ሀ ጫቁዋ ታን ናጋና ያጌዳ። ኦይዱ ጼታነ ሀታሙ ላይꬃፐ ጉይያን ዬዳ ሙሴ ህጊ ጾሳይ ዎꬄዳ ሀ ጫቁዋ ꬋይሳናዉነ ስንꬃፐ እማና ጊደ ሃሳዬዳዋ ድጋናዉ ዳንዳየና። [h] 18 አያዉ ጎፐ፥ ጾሳይ እምያ ላታይ ህግያን ቤትያዋ ግዶፐ፥ ያትና ጾሳይ ስንꬃፐ እማና ጊደ፥ ቃላ ገሌዳዋና ግደና ግያዋ፤ ሽን ጾሳይ እማና ጊደ ቃላ ገሌዳዋን ላታ አብራሃሞ እሜዳ።

19 ያትና፥ ህጊ አያዉ ደኢ? ህጊ ባይዞ ኦሱዋ ግድያባይ አየንቶ በሳናዉ ጾሳይ እማና ጊደ ሃሳዬዳ አብራሃመ ዛሪ ያና ጋካናዉ ጉጀቴዳ፤ ኪታንቻ ባጋና ሙሴ ጋናትያዋን እመቴዳ። 20 ጋናይ እት ኡራ ጻላላሳ ግደና፤ ሽን ጾሳይ እቱዋ።

21 ያትና፥ ጾሳይ ስንꬃፐ እማና ጊደ ሃሳዬዳዋ፥ እት ህጊ፥ “ሀነና” ያጊ? አአ! ሄዋ ጌና። አያዉ ጎፐ፥ ህጊ አሳዉ ደኡዋ እማናዉ ዳንዳይያባ ግዶፐ፥ ጽሎተꬃይካ ቱሙ ህግያ አዛዘትያዋፐ ቤቴ ግያዋ። 22 ሽን የሱስ ክርስቶሳ አማንና፥ ጾሳይ ስንꬃፐ እማና ጊደ ቃላ ገሌዳ ላአተꬃይ፥ አማንያዋንቶ እመታና ማላ፥ አሳይ ኡባይ ናጋራዉ ሞደቲደ ደእያዋ፥ ጾሳ ማጻፋይ ኦዴ።

23 ሽን ካሰ ሀ አማኑ ያናዉ፥ ስንꬃፐ ቆንጫና አማኖ ህጊ ኑና ቃሸቴዳ አሳዳን ጎርድ ዎꬄዳ። 24 ሄዋ ድራዉ፥ ኑን አማኑዋን ጽላና ማላ፥ ክርስቶስ ያና ጋካናዉ ህጊ ኑና ናግያዋ ግዴዳ። 25 ሽን ሀእ ስም አማኑ ዬዳ ድራዉ፥ ህጊ ሀዋፐ ስንꬃዉ ኑና ናግያዋ ግደና።

26 ህንተንቱ ኡባይ አማኑዋ ባጋና ክርስቶሳ የሱሳን እቱዋ ግዴዳ ጾሳ ናና። 27 አያዉ ጎፐ፥ ህንተ ክርስቶሳና እቱዋ ግዳና ማላ ጻማቀቴዳ ኡባቱ ክርስቶሳ ማዬድታ። 28 ሄዋ ድራዉ፥ አይሁዳ አሳ ግዶንነ ግሪከ አሳ ግዶን ዱማተꬃይ ባዋ፤ አይልያ ዎይ ዎማኑዋ ግዶን ዱማተꬃይ ባዋ፤ አቱማዋ ዎይ ማጫ አሳ ግዶን ዱማተꬃይ ባዋ። አያዉ ጎፐ፥ ህንተንቱ ኡባይካ ክርስቶሳ የሱሳን እት አሳ። 29 ህንተንቱ ክርስቶሳዋ ግዶፐ፥ ስም ህንተንቱ አብራሃመ ዛረ፤ [i] ቃይ ጾሳይ ስንꬃፐ እማና ጊደ ቃላ ገሌዳዋ ላትያዋንታ።

<- ጋላትያ 2ጋላትያ 4 ->