1 ኣኬካይ ባይና ጋላቲያ ኣሳቶ፥ ታኒ ሂንቴና ኪሪስቶሲ ማስቃሊያ ቦላን ሚሲማሪያን ꬊሼቲዴ ካቄቴዳዋ ቆንጪሳዴ ታማሪሳዲ። ያቲና፥ ቱሞ ሂንቴ ኤኖ ጌና ማላ፥ ሂንቴንታ ቢቴዳዌ ኦኔ? 2 ኣኔ ታው ሃ ኢቲ ዬዉዋ ፃላላ ኦዲቴ፡ ፆሳ ኣያና፥ ሂጊ ጊያዋ ናጊዴ ኣኬዲቴ ዎይ ኣማኑዋን ሲሲዴ ኣኬዲቴ? 3 ሂንቴንቱ ሄዋ ኬና ኤዬ? ፆሳ ኣያናን ዴዑዋ ዶሚዴ፥ ሃዒ ሂንቴ ዎልቃን ፖሊቴ? 4 ሂንቴንቱ ዳቡራ ኡባው ኣይኔ ማዱ ባዌ? ቱማ ማዱ ዴዔ። 5 ያቲና፥ ፆሳይ ሂንቴንቶ ጌሻ ኣያና ኢሚያዌኔ ሂንቴ ጊዶን ማላታ ኦꬂያዌ፥ ሙሴ ሂጊያ ሂንቴ ኦꬄዳ ዲራሴ? ዎይ ሚሺራቹዋ ቃላ ሲሲዴ፥ ሂንቴ ኣማኔዳ ዲራሴ?

6 ሃዋዳንካ፥ ኣብራሃሞ ፆሳ ኣማኔዳ ዲራው፥ ፆሳይ ኣ ፂሉዋዳን ፄሌዳ። 7 ሄዋ ዲራው፥ ኣማኒያዋንቱ ኣብራሃሜ ዛሬ [a] ጊዲያዋ ኤሪቴ። [b] 8 ፆሳይ ኣዪሁዳ ጊዴና ኣሳ ኣማኑዋን ፂሊሳናዋ ፆሳ ማፃፋይ ካሴት ቤዒዴ፥ «ሃ ኣላሚያን ዴዒያ ኣሳይ ኡባይ ኔናን ኣንጄታና» ያጊዴ፥ ሚሺራቹዋ ቃላ ኣብራሃሞሲ ካሴቲዴ ኦዴዳ። [c] 9 ሄዋ ዲራው፥ ኣብራሃሞ ኣማኒዴ ኣንጄቴዳዋዳን፥ ኣማኒያዋንቱ ኣዋዳካ ኣንጄታና።

10 ሂጊያ ኦሱዋን ኣማኔቲዴ ዴዒያዋንቱ ኡባይ ሼቃ ጊዶን ዴዒኖ፤ ኣዪሲ ጎፔ፥ ፆሳ ማፃፋይ፥ «ሂጊያ ማፃፋን ፃፌቴዳ ኡባባኒ ዴዔናዌኔ ፖሌናዌ ኦኒኔ ሼቄቴዳዋ» ያጌ። 11 ፆሳ ማፃፋይ፥ «ፆሳ ሲንꬃን ፂላቱ ኣኒ ኣማኔቲዴ ዴዑዋን ዴዓና» [d] ጊያ ዲራው፥ ኦኒኔ ፆሳ ሲንꬃን ሂጊያ ናጊያዋን ፂሌናዌ ኤሬቴዳዋ። 12 ሂጊ ኣማኑዋን ባሴቲ ኤቂ ቤና፤ ሺን ፆሳ ማፃፋይ፥ «ሂጊ ጊያዋ ፖሊያዌ ኣኒ ዴዑዋን ዴዓና» ያጌ። [e]

13 ፆሳ ማፃፋን፥ «ሚꬃ ቦላ ካቄቲ ሃይቂያ ኦኒኔ ሼቄቴዳዋ» ጌቴቲ ፃፌቴዳ ዲራው፥ ኪሪስቶሲ ኑ ዲራው ሼቄቴዳዋ ጊዲዴ፥ ኑና ሂጊያ ሼቃፔ ዎዚ ኣኬዳ። [f] 14 ኪሪስቶሲ ሄዋ ኣዪሲ ኦꬄዴ ጎፔ፥ ፆሳይ ኢማና ጌዳ፥ ጌሻ ኣያና ኑኒ ኣማኑዋን ኣካናዳኒኔ ኣብራሃሜ ኣንጁ ባሬ ባጋና ኣዪሁዳ ጊዴና ኣሳ ጋካና ማላ ጊዴ ኦꬄዳ።

15 ታናዳን ኣማኒያዋንቶ፥ ታኒ ኣሳይ ጊያዋዳን ሂንቴንቶ ጋይ፤ ሃራይ ኣቶ ላዑ ኣሳቱ ኢቲ ዬዉዋ ሃሳዪዴ፥ ጫቁዋ ዎꬄዳዋፔ ሂኒ ባጋን፥ ኦኒኔ ሄ ጫቁዋ ቢላናው ዎይ ሃራባ ሄ ጫቁዋ ቦላ ጉጃናው ዳንዳዬና። 16 ኣብራሃሞኔ ኣ ዛሪ ፆሳይ ሲንꬃፔ ኢማና ጊዴ ሃሳዬዳዋ ሲሴዲኖ። ፆሳ ማፃፋይ ጮራ ኣሳው ሃሳዪያዋዳን፥ «ኔ ዜሬꬃቱዋሲ» ጌና፤ ዋጊ ጎፔ፥ «ኔ ዛሬው» ያጌ። ሄዌኔ፥ ኢቲ ኣሳ ፃላላ ጌ፤ ኢካ ኪሪስቶሳ። [g]

17 ታኒ ጊያዌ ሃዋ፤ ፆሳይ ኣብራሃሞሲ ጫቂዴ፥ ሃ ጫቁዋ ታኒ ናጋና ያጌዳ። ኦይዱ ፄታኔ ሃታሙ ላይꬃፔ ጉዪያን ዬዳ ሙሴ ሂጊ ፆሳይ ዎꬄዳ ሃ ጫቁዋ ꬋዪሳናዉኔ ሲንꬃፔ ኢማና ጊዴ ሃሳዬዳዋ ዲጋናው ዳንዳዬና። [h] 18 ኣዪሲ ጎፔ፥ ፆሳይ ኢሚያ ላታይ ሂጊያን ቤቲያዋ ጊዶፔ፥ ያቲና ፆሳይ ሲንꬃፔ ኢማና ጊዴ፥ ቃላ ጌሌዳዋና ጊዴና ጊያዋ፤ ሺን ፆሳይ ኢማና ጊዴ ቃላ ጌሌዳዋን ላታ ኣብራሃሞሲ ኢሜዳ።

19 ያቲና፥ ሂጊ ኣዪሲ ዴዒ? ሂጊ ባዪዞ ኦሱዋ ጊዲያባይ ኣዬንቶ ቤሳናው ፆሳይ ኢማና ጊዴ ሃሳዬዳ ኣብራሃሜ ዛሪ ያና ጋካናው ጉጄቴዳ፤ ኪታንቻ ባጋና ሙሴ ጋናቲያዋን ኢሜቴዳ። 20 ጋናይ ኢቲ ኡራ ፃላላሳ ጊዴና፤ ሺን ፆሳይ ኢቱዋ።

21 ያቲና፥ ፆሳይ ሲንꬃፔ ኢማና ጊዴ ሃሳዬዳዋ፥ ኢቲ ሂጊ፥ «ሃኔና» ያጊ? ኣዓ! ሄዋ ጌና። ኣዪሲ ጎፔ፥ ሂጊ ኣሳው ዴዑዋ ኢማናው ዳንዳዪያባ ጊዶፔ፥ ፂሎቴꬃይካ ቱሙ ሂጊያ ኣዛዜቲያዋፔ ቤቴ ጊያዋ። 22 ሺን ዬሱሲ ኪሪስቶሳ ኣማኒና፥ ፆሳይ ሲንꬃፔ ኢማና ጊዴ ቃላ ጌሌዳ ላዓቴꬃይ፥ ኣማኒያዋንቶ ኢሜታና ማላ፥ ኣሳይ ኡባይ ናጋራሲ ሞዴቲዴ ዴዒያዋ፥ ፆሳ ማፃፋይ ኦዴ።

23 ሺን ካሴ ሃ ኣማኑ ያናሲ፥ ሲንꬃፔ ቆንጫና ኣማኖ ሂጊ ኑና ቃሼቴዳ ኣሳዳን ጎርዲ ዎꬄዳ። 24 ሄዋ ዲራው፥ ኑኒ ኣማኑዋን ፂላና ማላ፥ ኪሪስቶሲ ያና ጋካናው ሂጊ ኑና ናጊያዋ ጊዴዳ። 25 ሺን ሃዒ ሲሚ ኣማኑ ዬዳ ዲራው፥ ሂጊ ሃዋፔ ሲንꬃው ኑና ናጊያዋ ጊዴና።

26 ሂንቴንቱ ኡባይ ኣማኑዋ ባጋና ኪሪስቶሳ ዬሱሳን ኢቱዋ ጊዴዳ ፆሳ ናና። 27 ኣዪሲ ጎፔ፥ ሂንቴ ኪሪስቶሳና ኢቱዋ ጊዳና ማላ ፃማቄቴዳ ኡባቱ ኪሪስቶሳ ማዬዲታ። 28 ሄዋ ዲራው፥ ኣዪሁዳ ኣሳ ጊዶኒኔ ጊሪኬ ኣሳ ጊዶን ዱማቴꬃይ ባዋ፤ ኣይሊያ ዎይ ዎማኑዋ ጊዶን ዱማቴꬃይ ባዋ፤ ኣቱማዋ ዎይ ማጫ ኣሳ ጊዶን ዱማቴꬃይ ባዋ። ኣዪሲ ጎፔ፥ ሂንቴንቱ ኡባይካ ኪሪስቶሳ ዬሱሳን ኢቲ ኣሳ። 29 ሂንቴንቱ ኪሪስቶሳዋ ጊዶፔ፥ ሲሚ ሂንቴንቱ ኣብራሃሜ ዛሬ፤ [i] ቃሲ ፆሳይ ሲንꬃፔ ኢማና ጊዴ ቃላ ጌሌዳዋ ላቲያዋንታ።

<- ጋላቲያ 2ጋላቲያ 4 ->