1 ሄ ዎድያን ትምቢትያ ኦድያዋንቱ ሃገነ እዶ ናአይ ዛካራስ ይሁዳንነ የሩሳላመን ደእያ አይሁዳ አሳቶ እስራኤልያ ጾሳ ሱንꬃን ትምቢትያ ኦዴድኖ። 2 ሳላትያላ ናአይ ዛሩብ-ባቤልነ ዮጸዴቃ ናአይ ኢያሱ ደንዲደ፥ የሩሳላመን ደእያ ጾሳ ጎልያ ዛረꬂደ ኬጻናዉ ዶሜድኖ። ትምቢትያ ኦድያዋንቱካ ኡንቱንቱና እትፐ ግዲደ፥ ኡንቱንታ ማዴድኖ። [a]

3 ሄ ዎደ፥ ኤፍራጺሳ ሻፋፐ አዋይ ዉልያ ባጋ ቢታ ሞድያ ታታናያ ግያዌ፥ ሻታርቦዝና ግያዌነ ኡንቱንቱና ኦꬅያዋንቱ ዪደ፥ “ህንተንቱ ሀ ጎልያ ኬጻና ማላነ ፖላና ማላ፥ ህንተንቶ ኦኔ ኦዴዳዌ?” ያጊደ ኦቼድኖ። 4 ኡንቱንቱ ቃይ፥ “ሀዋ ግምቢያ አሳቱዋ ሱንꬃይ ኦና ኦኔ?” ያጊደ ኦቼድኖ። 5 ሽን ሄ የዉ ዳርዮሳኮ ጋክና፥ አ ማታፐ ዳብዳቢ ጻፈቲደ ያና ጋካናዉ፥ ኡንቱንቱ ባረንቱ ኦሱዋ አግበይክኖ፤ አያዉ ጎፐ፥ ኡንቱንቱ ጾሳ አይፊ አይሁዳ ጭማቱዋ ቦላን ደኤ።

6 ኤፍራጺሳ ሻፋፐ አዋይ ዉልያ ባጋ ቢታ ሞድያ ታታናይ፥ ሻታርቦዝንነ ኡንቱንቱና ኦꬅያዋንቱ ካትያ ዳርዮሳዉ ኪቴዳ ዳብዳቢ 7 ሀዋዳን ያጌ፦

“ካትያ ዳርዮሳ፥ ኩመንꬃ ሳሮተꬃይ ነዉ ግዶ!

8 “ኑን ይሁዳ ጋድያን ደእያ ዎልቃማ ጾሳ ጎልያኮ ቤዶ። ሄ ሹቻን ኬጸቴዳ፤ ቃይ ግምቢያ ጋርሳንካ ምꬃይ ዎꬌዳ። ኦሱካ ዎልቃማ አኬካንነ ኤሌል ኦሰቲደ ደኤ።

9 “ኡንቱንቱ ጭማቱዋ ኑን ሀዋዳን ያጊደ ኦቼዶ፤ ‘ሀ ጎልያ ኬጻና ማላነ ፖላና ማላ፥ ህንተንቶ ኦኔ ኦዴዳዌ?’ ያጊደ ኦቼዶ። 10 ቃይ ነዉ ጻፊደ ኤርሳና ማላ፥ ኡንቱንታ ሀ ኪታን ካለꬅያዋንቱ ሱንꬃይካ ኦነንቶ ኦቼዶ።

11 “ኡንቱንቱ ሀዋዳን ያጊደ ዛሬድኖ፤ ‘ኑን ሳሉዋነ ሳኣ ጾሳ ቆማቱዋ፤ ቃይ ኑን እስራኤልያ ካትያ ግታይ ዳሮ ላይꬃፐ ካሰ ባጋን ኬጽ ፖሌዳ ጌሻ ጎልያ ዛረꬅ ኬጸቶ። 12 ኑ አዎቱ ሳሉዋ ጾሳ ሀንቀꬄዳ ድራዉ፥ እ ኡንቱንታ ባብሎነ ካትያ ናቡካዳናጾራ ኩሽያን አꬅ እምና፥ እ ሀ ጎልያ ኮል አጌዳ፤ አሳካ ባብሎነ ጋድያ ኦሞዶ አኪደ ቤዳ። [b]

13 “ ‘ሽን ባብሎነ ካቲ ቂሮስ ባረ ካተቴዳ ኮይሮ ላይꬃን፥ ጾሳ ጎልያ፥ ሀዋ ዛረꬅ ኬጻና ማላ፥ አዋዩዋ ከሴዳ። [c] 14 ናቡካዳናጾረ የሩሳላመን ደእያ ጾሳ ጎልያፐ አክ አፊደ፥ ባብሎነ ቢታን ደእያ ባረ ጾሳቱዋ ጎለን ዎꬄዳ ዎርቃነ ብራ ሚሻቱዋካ ቂሮስ ዛሪደ የዴዳ።

“ ‘ሄ ሚሻቱ ካቲ ቂሮስ ይሁዳ ቢታ ሞዳና ማላ ዶሬዳ ሸሽባጻራ ኩሽያን ሼቴድኖ። 15 ካቲ ቂሮስ አ ሀዋዳን ያጌዳ፤ “ሀ ሚሻቱዋ አካ አፋደ የሩሳላመን ደእያ ጌሻ ጎልያን ዎꬃ፤ ቃይ ጾሳ ጎልያካ ካሰ እ ደእያ ሳኣን ኬጻ” ያጌዳ። 16 ሄዋፐ ጉይያን፥ ሸሽባጻር ዪደ፥ ጾሳ ጎልያ የሩሳላመን ባሴዳ። እ ሀእካ ዉርቤናዋ ግዶፐነ፥ ሄ ዎደፐ ዶሚደ፥ ኬጸቲደ ደኤ’ ያጌድኖ።

17 “ሀእ ስም ሀ የዉ ካትያ ናሸችያባ ግዶፐ፥ አነ ካቲ ቂሮስ ሀ ጎልያ የሩሳላመን ኬጻና ማላ፥ ቱሙካ አዋዩዋ ከሴደንቶ ኤራናዉ ካሰ አꬌዳ ባብሎነ ካተቱዋ ታርክያ ማዝጎባይ ኮየቲደ ጼለቶ። ሄዋፐ ጉይያን፥ ካቲ ኑን ሀ የዉዋ ዋታናዉ በስንቶ ቃቼዳ ቆፋ ኑዉ ኪቶ” ያጊደ ጻፌድኖ።

<- እዝራ 4እዝራ 6 ->