1 መꬍና ጎዳ ቃላይ ታኮ ሀዋዳን ያጊደ ዬዳ፤ 2 “ኔኖ አሳ ናአዉ፥ እስራኤልያ ዞዘቱዋኮ ነ ሶምኡዋ ደረቃን ዛራደ፥ ኡንቱንቱ ቦላ ትምቢትያ ኦዳ። 3 ሀዋዳን ያጋ፥ ‘ህንተኖ፥ እስራኤልያ ዞዘቶ፥ ኡባ ሞድያ መꬍና ጎዳ ቃላ ስስተ! ኡባ ሞድያ መꬍና ጎዳይ እስራኤልያ ዞዘቶነ ከራቶ፥ ቡቡሀቶነ ዛንጋራቶ ሀዋዳን ያጌ፤ በእተ፥ ታን፥ ታ ማሻ ህንተ ቦላ የዳና፤ ቃይ ህንተ ኤቃ ጎይንያ ሳኣካ ꬋይሳና። 4 ህንተ ያርሽያ ሳአቱ ኮለተና፤ ቃይ ህንተ እጻና ጩዋይያ ሚሻቱካ መኤረታና። ታን ህንተ አሳ ህንተ ኤቃቱዋ ስንꬃን ዎꬋና። 5 ታን እስራኤልያ አሳ አሃ ኡንቱንቱ ኤቃቱዋ ስንꬃን ግስሳና፤ ህንተ መቀꬃካ ህንተ ያርሽያ ሳአቱዋ ዩሹዋን ላላና። 6 ህንተ ደእያ ሳን ኡባን፥ ህንተ ካታማቱነ ህንተ ጎይንያ ሳአቱ ኮለተና። ሄዋዳንካ ህንተ ያርሽያ ሳአቱ ቱናናነ ላለታና፤ ህንተ ኤቃቱ መኤረታናነ ꬋያና፤ ህንተ እጻና ጩዋይያ ሳአቱካ መኤረት ዎꬋና፤ ህንተ ኦꬄዳ ኦሱ ኡባይ ፕተት ꬋያና። 7 ህንተ አሳይ ሹከቲደ፥ ህንተ ግዶን ኩንዳና። ታን መꬍና ጎዳ ግድያዋ ህንተ ሄዋን ኤራና።

8 “ ‘ታን ህንተፐ አማሬዳዋንታ ፓጻ አሻና፤ ማሻፐ አቴዳዋንቱ ቢታነ ካዉተꬃ ግዶን ላለታና። 9 ማሻፐ አቴዳዋንቱ ያን ኦሞዱዋን ደአና። ያን ደእያ ዎደ፥ ኡንቱንቱ ታና ሀሳያና፤ ቃይ ዎሹምያ ዎዛናንነ ባረንቱ አይፍያን ኤቃ ጎይናናዉ ጉየ ስምያዋን፥ ኡንቱንቱ ታ ዎዛና መንꬄዳዋ ሀሳያና። ኡንቱንቱ ባረንቱ ኦꬄዳ ኢታ ኦሱዋፐነ ኡንቱንታ ዬላይያ ሀኖታፐ ደንዴዳዋን፥ ባረና ባረ ሁጲያዉ ሻታና። 10 ቃይ ታን መꬍና ጎዳ ግድያዋ ኡንቱንቱ ኤራና። ታን ኡንቱንቱ ቦላ ኢታባ አሀና ጌዳዌ ጮ መላ ባብሱዋ ግደና’ ” ያጌ።

11 ኡባ ሞድያ መꬍና ጎዳይ ታና ሀዋዳን ያጌ፤ “ነ ብራꬍያ ሀንቁዋን ጾርሳ! ይሉዋን ነ ገድያንካ ቢታ ቃካ! ቃይ ሀዋዳን ያጋ፤ ‘እስራኤልያ አሳ ሸነይያ ኦሶ አየ አና!’ ያጋ። አያዉ ጎፐ፥ ኡንቱንቱ ኦላን፥ ኮሻንነ ኢታ ሀርግያን ዉራና። 12 ሃኩዋን ደእያዌ ኢታ ሀርግያን ሀይቃና፤ ማታን ደእያዌ ኦላን ሀይቃና፤ ቃይ ፓጻ አቴዳዌ ኮሻን ሀይቃና። ሄዋዳን ኦꬃደ፥ ታን ታ ሀንቁዋ ኡንቱንቱ ቦላ ዉርሳና። 13 ኡንቱንቱ አሳ አሃይ ኡንቱንቱ ኤቃቱዋ ግዱዋ ኡባን፥ ኡንቱንቱ ያርሽያ ሳ ዩሹዋ ኡባን፥ ꬎቃ ዞዘቱዋ ቦላነ ደረቱዋ ኪክያ ኡባ ቦላን፥ እርጻ ምꬃ ጋርሳ ኡባን፥ ዳሮ ቦንጪ ደእያ ኤꬃ ጋርሳ ኡባን፥ ባረንቱ ኤቃቶ ሳዊያ ያርሹዋ ጹጌዳ ሳኣ ኡባን ኩንዴዳ ዎደ፥ ኡንቱንቱ ታን መꬍና ጎዳ ግድያዋ ኤራና። 14 ቃይ ታን ታ ኩሽያ ኡንቱንቱ ቦላ ምጫደ፥ ኡንቱንቱ ደእያ ቢታ ኡባ፥ ገድሳ ባጋ ባዙዋፐ ቢደ ሁጲሳ ባጋ ርብላ ግያ ካታማ ጋካናዉ፥ መላ ኦꬃና። ታን መꬍና ጎዳ ግድያዋ ኡንቱንቱ ሄዋን ኤራና ያጌ ያጋ” ያጊደ ዬዳ።

<- ህዝቄላ 5ህዝቄላ 7 ->