1 “ ‘ኡባ ሞድያ መꬍና ጎዳይ ሀዋዳን ያጌ፤ “ግዶ ዳባባ ገልስያ አዋይ ዶልያ ባጋ ድርሳ ፐንጊ ኦሱዋ ጋላሳቱዋን ኡሱፑናቱዋንካ ጎርደቲደ ጋምኦ፤ ሽን ሳምባታ ጋላስነ አግናይ ጼርያ ጋላስ ዶየቶ። 2 እስራኤልያ አሳ ካፑ ድርሳዉ ፐንገ ባጋ ዳባባፐ ገልያ ባራንዳ ባጋና ገሊደ፥ ድርሳ ፐንገ ምꬃ ማታን ኤቆ። ቄሳቱ እ እሜዳ ጹግያ ያርሹዋነ እትፐተꬃ ያርሹዋ ያርሽኖ። እ ሄዋን ድርሳ ፐንገን ጎይኒደ፥ ስሚደ ካረ ከሶ። ሽን ድርሳ ፐንጊ ኦማርሳናስካ ጎርደቶፖ። 3 ሄ ቢታ አሳይካ ሳምባታንነ አግናይ ጼርያ ዎድያን ግዶ ዳባባ ድርሳ ፐንግያ ገልያሳን፥ መꬍና ጎዳ ስንꬃን ጎይንኖ።

4 “ ‘ “ካፑ ሳምባታ ጋላስ መꬍና ጎዳዉ ጹግያ ያርሹዋ ኦꬂደ፥ ኡሱፑን ዶርሳ ማራቱዋነ እት ዶርሳ ኦርግያ፥ ኡባይካ ትላ ቦላና ደእያዋንታ እሞ። 5 እት ዶርሳ ኦርግያና 17 ክሎ ግራመ ካꬃ ያርሹዋ እሞ። ዶርሳ ማራቱዋና ሺቅያ ካꬃ ያርሹ ካፑ ባረዉ ሺሻናዉ ኮዬዳዋ ኬሻ ግዶ። ቃይ እት እት 17 ክሎ ግራመ ካꬃና ሄዙ ሄዙ ሊትሮ ዛይትያ እሞ።

6 “ ‘ “አግናይ ጼርያ ጋላስ ጋላስ ቃይ እት ኮሩማ፥ ኡሱፑን ዶርሳ ማራቱዋነ እት ዶርሳ ኦርግያ፥ ኡባይካ ትላ ቦላና ደእያዋንታ እሞ። 7 እት እት ኮሩማነ እት እት ዶርሳ ኦርግያ ያርሽያ ዎደ፥ ካꬃ ያርሾ እት እት 17 ክሎ ግራመ ዛርጋነ ሄዙ ሄዙ ሊትሮ ዛይትያ እሞ። ዶርሳ ማራቱዋና ሺቅያ ካꬃ ያርሹ ካፑ ባረዉ ሺሻናዉ ኮዬዳዋ ኬሻ ግዶ። 8 ካፑ ገሊደ፥ ድርሳ ፐንግያ ባራንዳና አꬊደ ገሎ፤ ከሲደካ ሄዋና ከሶ።

9 “ ‘ “ሽን ሄ ቢታ አሳይ ባላ ጋላስ መꬍና ጎዳ ስንꬃን ጎይናናዉ ይያ ዎደ፥ ጎይኖ ሁጲሳ ፐንግያና ገሌዳዋንቱ ገድሳ ፐንግያና ከስኖ፤ ቃይ ገድሳ ፐንግያና ገሌዳዋንቱ ሁጲሳ ፐንግያና ከስኖ። አይ አሳይነ ባረ ስንꬃን ደእያ ፐንግያና ስት ጊደ ከሶፐ አትና፥ ባረ ገሌዳ ሳና ከሶፖ። 10 ኡንቱንቱ ገልያ ዎደ፥ ካፑ ኡንቱንቱና ገሎ፤ ኡንቱንቱ ከስያ ዎደካ፥ ኡንቱንቱና ከሶ።

11 “ ‘ “ናሸቻ ጋላሳትዋንነ ላይꬃ ባላቱዋን እት እት ኮሩማናነ እት እት ዶርሳ ኦርግያና ሺቅያ ካꬃ ያርሹ እት እት 17 ክሎ ግራመ ዛርጋነ ሄዙ ሄዙ ሊትሮ ዛይተ ግዶ። ቃይ ዶርሳ ማራቱዋና ሺቅያ ያርሹ ካፑ ባረዉ ሺሻናዉ ኮዬዳዋ ኬሻ ግዶ። 12 ካፑ ባረ ዶሱዋን እምያ ያርሹዋ፥ ጹግያ ያርሹዋ፥ ዎይ እትፐተꬃ ያርሹዋ መꬍና ጎዳዉ አህያ ዎደ፥ አዋይ ዶልያ ባጋ ግዶ ዳባባ ድርሳ ፐንጊ አዉ ዶየቶ። ባረ ጹግያ ያርሹዋ ዎይ እትፐተꬃ ያርሹዋ ሳምባታ ጋላስ እ እምያዋዳን እሞ። ያቲደ እ ከሲደ ቢና፥ ድርሳ ፐንጊ ጎርደቶ።

13 “ ‘ “ካፑ ሀች ሀች ትላ ቦላና ደእያ እት ላይꬃ ግዴዳ እት ዶርሳ ጹግያ ያርሹዋ ኦꬂደ፥ መꬍና ጎዳዉ እሞ፤ እ ሄዋ ዎንታ ዎንታ ፓጨናን አሆ። 14 ሄዋናካ ላኡ ክሎ ግራመ ꬊሊ እት ሊትሮ ዛይትያን ሙናቀቲደ፥ ዎንታ ዎንታ ካꬃ ያርሹዋ ግዲደ ሺቆ። ሀዌ ህንተ መꬍና ጎዳዉ ሀች ሀች ሺሽያ ያርሹዋ ዎጋ። 15 ሀዌ ስም ኦርገ ዶርሳይ፥ ካꬃ ያርሹነ ዛይቲ ፓጭ ባይናን ዎንታ ዎንታ ሺቃናዉ በስያ ጹገትያ ያርሹዋ” ያጌ።

16 “ ‘ኡባ ሞድያ መꬍና ጎዳይ ሀዋዳን ያጌ፤ “ካፑ ባረ ጋድያፐ ሻኪደ፥ ባረ አቱማ ናናቱዋፐ እቶ እሞፐ፥ ሄዌ ሄ ናኣሳነ አ ናናቱዋስ ላታ ግዴ። 17 ሽን ካፑ ባረ ጋድያፐ ሻኪደ፥ ባረ ቆማቱዋፐ እቶ እሞፐ፥ እሻታማንꬃ ላይꬃ ባላይ ጋካናዉ፥ ሄ ጋዲ አዋ። ሄዋፐ ጉይያን፥ ካፖ ስሞ፤ ሄዌ ካፖ ግድያ ድራዉ፥ መꬍናዉ አሳነ አ ናናቶ ላታ ግዴ። [a] 18 ካፑ አሳ ሱጊደ፥ አሳ ላታ ጋድያ ዎልቃን አኮፖ። ታ አሳይ ባረ ላታ ጋድያፐ ꬎቆለተና ማላ፥ እ ባረ አቱማ ናናቶ ባረ ጋድያፐ እሞ” ያጌ’ ያጋ” ያጌዳ።

19 ሄዋፐ ጉይያን፥ ሄ ብታኒ ታና ሁጲሳ ጼልያ፥ ቄሳቱ ዋ ጌሻ ክፍለቱዋኮ ገልያሳ አሄዳ። ሄዋንቱካ ግዶ ዳባባዉ ጋꬅያ ዱገ ባጋ ድርሳ ፐንግያ ማታን ደእያዋንታ። ኡንቱንቱፐ አዋይ ዉልያ ባጋና ታን እት ሳኣ በኣድ። እ ታና ሀዋዳን ያጌዳ፤ 20 “ሀ ሳአይ ቄሳቱ ናጋራ ያርሹዋነ ናቁዋ ያርሹዋ ዶይስያ ሳነ ካꬃ ያርሹዋ ኡክያ ሳኣ። ሀ ሳኣን ጎኤትያ ጋሱ ሄ ጌሻ ያርሾቱዋ አሳኮ ካረ ዳባባ ከስና፥ አሳይ ጌሻባ ቦቺደ ጌየናዳን ናጋናሳ” ያጌዳ።

21 ሄዋፐ ጉይያን፥ ሄ ብታኒ ታና ካረ ባጋ ዳባባዉ አፊደ፥ ሄ ዳባባዉ ኦይዱ ማዛንያ ታና ዩሼዳ። ሄ ዳባባ ማርያን ኡባንካ ቄር ዳባባቱ ደእያዋንታ በኣድ። 22 ኡንቱንቶ ኡባዉካ 40 ዋꬋ፤ ጎምፓይካ 30 ዋꬋ፤ ኦይዱ ማርያን ደእያ ዳባባቱካ እት ላገ። 23 ሄ ኦይዱ ዳባባቱዋ ዩሹዋንካ ሹቻ ግምቢ ደኤ፤ ቃይ ግምቢያ ላንቂያን አኮ ሺቂደ ኦሰቴዳ፥ ታማ ኤꬅያ ሳአቱ ደኢኖ። 24 ሄ ብታኒ ታና፥ “ሀዋንቱ ኡባይ ጌሻ ጎልያን ኦꬅያዋንቱ አህያ ያርሹዋ ዶይስያ ሳአቱዋ” ያጌዳ።

<- ህዝቄላ 45ህዝቄላ 47 ->