1 ሄዋፐ ጉይያን፥ ሄ ብታኒ ታና አዋይ ዶልያ ባጋ ጼልያ ፐንግያኮ አሄዳ። 2 ታን እስራኤልያ ጾሳ ቦንቹ አዋይ ዶልያ ባጋፐ ይያዋ በኣድ። አ ዩሳ ኮሻይ ዳሮ ሃꬃ ኩንꬁዋ ጉንꬃ ማላ፤ ቃይ ቢታይካ አ ቦንቹዋን ፖኤዳ። [a] 3 በኤዳ ሳጻይ ካሰ ጾሳይ የሩሳላመ ካታማ ꬋይሳናዉ ዬዳ ዎደ በኤዳ ሳፃ ማላቴ፤ ቃይ ኮባራ ሻፋ ማታን ታን በኤዳ ሳጻካ ማላቴ። ሄዋ በኣደ፥ ታን ታ ሶምኡዋ ቢታ ጋꬃደ ጉፋናድ። 4 መꬍና ጎዳ ቦንቹ አዋይ ዶልያ ባጋ ጼልያ ፐንግያና ጌሻ ጎልያ ግዶ ገሌዳ። 5 ሄ ዎደ ጾሳ አያናይ ታና ፑደ ደንꬂደ፥ ግዶ ዳባባ ገልሴዳ፤ በአ! መꬍና ጎዳ ቦንቹ ጌሻ ጎልያ ኩሜዳ።

6 ሄዋን ሄ ብታኒ ታ ምይያን ኤቂደእሽን፥ እቱ ጌሻ ጎልያ ግዶፐ ታዉ ሃሳይሽን ስሳድ። 7 እ ሀዋዳን ያጌዳ፤ “ላ አሳ ናአዉ፥ ሀዌ ታ አራታ ሳነ ታ ገዲ የꬍያ ሳኣ። ታን እስራኤልያ አሳ ግዶን መꬍናዉ ደአና። ሀዋፐ ስንꬃዉ እስራኤልያ አሳ ግድና፥ ኡንቱንቱ ካተቱዋ ግድና፥ ሀራ ጾሳቶ ጎይንያዋን፥ ዎይ ሸምፑ ባይና ባረንቱ ካተቱዋ ሀዉልትያዉ ጎይንያዋን ታ ጌሻ ሱንꬃ ቱንስክኖ። 8 ዋቲደ ጎፐ፥ እት ጎዳ ጻላላይ ታናነ ኡንቱንታነ ሻክና፥ ባረንቱ ፐንግያ ታዋ ምይያን፥ ባረንቱ ፐንገ ምꬃካ ታዋ ምይያን ኤሴድኖ። ባረንቱ ሸነይያ ኦሱዋን ታ ጌሻ ሱንꬃ ቱንሴድኖ። ሄዋ ድራዉ፥ ታን ታ ሀንቁዋን ኡንቱንታ ꬋይሳድ። 9 ሀእ ስም ሀራ ጾሳቶ ጎይንያዋ አግኖ፤ ባረንቱ ካተቱዋ ሀዉልትያ ጎይንያዋ ታ ማታፐ ድግኖ። ያቶፐ፥ ታን ኡንቱንቱ ግዶን መꬍናዉ ደአና።

10 “ላ አሳ ናአዉ፥ ታን ኔና በሴዳ ጌሻ ጎልያባ እስራኤልያ አሳዉ ኦዳ፤ ኡንቱንቱ ባረንቱ ኦꬄዳ ናጋራን ዬላታና ማላ፥ አ መꬋባነ እ ኬጸቴዳ ማራ ኡንቱንቶ ኦዳ። 11 ኡንቱንቱ ባረንቱ ኦꬄዳባን ዬላትያዋንታ ግዶፐ፥ ጌሻ ጎልያ ማላ፥ እ ኬጸቴዳ ማራ፥ ከስያ ሳአቱዋ፥ ገልያ ሳአቱዋነ አ ኩመንꬃ ምስልያ ኡንቱንቶ ቆንጭሳ። ሄዋዳንካ ቃይ፥ አ ዎጋ ኡባነ አ ህግያ ኡባ ኡንቱንታ ኤርሳ። ቃይካ ሄ ጎሊ ዎት ኬጸቴደንቶነ ኡንቱንቱ አ ዎጋ ኡባነ ህግያ ኡባ ናጋናዉነ ፖላናዉ ዳንዳያና ማላ፥ ኔን ኡንቱንቱ ጼልሽን ጻፋ።

12 “ጌሻ ጎልያ ህጊ ሀዋ: ጌሻ ጎሊ ኬጸቴዳ ደርያ ሁጲነ አ ዩሹዋን ደእያ ሄራይ ኡባይ ኡባፐ አꬌዳ ጌሻ ግዳናዋ። ኤ፥ ጌሻ ጎልያ ህጊ ሀዋ።

13 “ያርሽያሳይ ካሰ ጌሻ ጎልያ ልክያዳንካ፥ እት ዋꬋ ቦላ ኦይዱ ብራቱዋ ጉጄዳ፥ አዱሳ ዋꬋን ልከቴዳ። ያርሽያ ሳአ ባሱዋ ዩሹዋን እት ዋꬋ ዝቂያነ እት ዋꬋ አክያ ኦላይ ደኤ፤ ሄ ኦላዉ ካረ ባጋ ደꬃይ እት ታካꬍያ ꬎቄ። ያርሽያ ሳአ ጌሳይ ሀዋ ማላ:[b] 14 ባሱዋፐ ቢደ፥ ኮይሮ ደꬃ ጋካናዉ 2 ዋꬋ፤ ላኤንꬆ ደꬃይ እት ዋꬋ ያርሽያ ሳኣኮ ሺቅ ዶሚደ፥ 4 ዋꬋ ꬎቄ፤ ቃይካ እት ዋꬋ ያርሽያ ሳኮ ሺቂደ፥ 15 ያርሹ ጹገትያ ጮጪ ደእያ ሄዘንꬆ ደꬃይ 4 ዋꬋ ꬎቄ። እ ኦይዱ ምዛና ግዲደ፥ ኦይዱ ማርያንካ እት እት ካጪ ደኤ። 16 ያርሹዋ ጹግያ ጮጪ ኦይዱ ሚዛናን ግዲደ፥ 12 ዋꬋ፥ ጎምፓይካ 12 ዋꬋ። 17 ላኤንꬆ ደꬃይካ ሄዋ ማላ ኦይዱ ምዛና ግዲደ፥ 14 ዋꬋ፥ ጎምፓይካ 14 ዋꬋ። ሄ ደꬃዉ ካረ ባጋ ጋጻይ እት ታካ ꬎቄ። ዩሹዋ ኡባን እት ዋꬋ ግዴዳ ኦላይ ደኤ። ያርሽያ ሳ ፑደ አፍያ ደꬃቱ አዋይ ዶልያ ባጋን ደኢኖ” ያጌዳ።

18 ቃይካ እ ታና ሀዋዳን ያጌዳ፤ “ላ አሳ ናአዉ፥ ኡባ ሞድያ መꬍና ጎዳይ ሀዋዳን ያጌ፤ ‘ያርሽያ ሳአ ዎጋይ ሀዋ። ጹግያ ያርሹዋ ያርሻናዉነ ሱꬃ ፑሻካዉ፥ ያርሽያ ሳአ ግምቢደ ፖልያ ጋላስ፥ 19 ታኮ ሺቂደ፥ ታዉ ኦꬅያ ጻዶቃ ያራፐ የለቴዳ ሌዊያ ዛረ ቄሳቶ ናጋራ ያርሹዋ ኦꬃደ፥ እት ኮሩማ እማ። ኡባ ሞድያ መꬍና ጎዳይ ሀዋ ኦዳይ። 20 ኔን ሄ ሱꬃፐ አካደ፥ ኦይዱ ካጨቱዋ፥ ላኤንꬆ ደꬃ ኦይዱ ሚዛናነ ሄ ደꬃዉ ጋጻ ኦካ። ሄዋዳን ኦꬃደ፥ ያርሽያ ሳአ ቱናተꬃፐ ጌሻ። 21 ቃይ ናጋራ ያርሾ እመቴዳ ሄ ኮሩማ አካደ፥ ጌሻ ጎልያዋ ግዲደ፥ ጌሻ ሳኣፐ ካረ ባጋና አዉ አዛዘቴዳ ሳኣን ጹጋ።

22 “ ‘ዎንተꬃ ጋላስ ትላ ቦላና ደእያ እት ዴሻ ኦርግያ አካደ፥ ናጋራ ያርሾ ያርሻ። ካሰ ኮሩማ ሱꬃን ጌሼዳዋዳን፥ ሄ ዴሻ ኦርግያ ሱꬃን ያርሽያ ሳአ ጌሻ። 23 ጌሽያዋ ፖላደ፥ ትላ ቦላና ደእያ እት ኮሩማነ ትላ ቦላና ደእያ እት ዶርሳ ኦርግያ አካደ፥ 24 ላኡዋካ መꬍና ጎዳ ስንꬃ ሺሻ። ያቶፐ ቄሳቱ ኡንቱንቱ ቦላ ማጽንያ ቆሊደ፥ መꬍና ጎዳዉ ጹግያ ያርሹዋ ኦꬂደ ያርሽኖ።

25 “ ‘ላፑን ጋላሳ ኩመንꬃ፥ ሀች ሀች እት ዴሻ ኮልያ ናጋራ ያርሾ፥ ቃይ ትላ ቦላና ደእያ እት ኮሩማነ ትላ ቦላና ደእያ እት ዶርሳ ኦርግያ ሺሻ። 26 ቄሳቱ ላፑን ጋላሳ ኩመንꬃ ያርሽያ ሳአ ቱናተꬃፐ ጌሽኖ። ያቲደ ጾሳዉ አ ዱማይኖ። 27 ሀ ጋላሳቱ ዉርያ ዎደ፥ ሆስፑንꬃ ጋላሳፐ ዶሚደ፥ ቄሳቱ ህንተ ጹግያ ያርሹዋነ ህንተ እትፐተꬃ ያርሹዋ ያርሽያ ሳአ ቦላን ያርሽኖ። ሄ ዎደ ታን ህንተናን ናሸታና። ታን ኡባ ሞድያ መꬍና ጎዳይ ሀዋ ኦዳይ’ ያጌ” ያጌዳ። [c]

<- ህዝቄላ 42ህዝቄላ 44 ->