1 መꬍና ጎዳ ቃላይ ታኮ ሀዋዳን ያጊደ ዬዳ፤ 2 “ላ አሳ ናአዉ፥ ኔን ማካላንቻ አሳ ግዶን ደኣሳ። ኡንቱንቱ ማካላንቻ አሳ ግድያ ድራዉ፥ ኡንቱንቶ አይፊ ደኤ፥ ሽን ደምክኖ፤ ኡንቱንቶ ሀይꬃይ ደኤ፥ ሽን ስስክኖ። [a] 3 ሄዋ ድራዉ፥ አሳ ናአዉ፥ ኦሞዱዋን ብያ አሳዳን፥ ኔን አፋናዉ ዳንዳይያዋ ኡባ ሺሻ ቃቻደ፥ ጋላስ ኡንቱንቱ ጼልሽን ከሳደ፥ ነ ደኢያሳፐ ሀራ ሳኣ ባ። ኡንቱንቱ ማካላንቻ አሳ ግዶፐነ፥ ኦን ኤሪ፥ ኡንቱንቱ አኬካና። 4 ጋላስ ኡንቱንቱ ጼልሽን፥ ኦሞዱዋ ብያ አሳዳን፥ ኔን ቃቼዳዋ ካረ ከሳ፤ ቃይ ኦማርስ ኡንቱንቱ ጼልሽን፥ ኦሞዱዋ ብያ አሳዳን ከሳ። 5 ኡንቱንቱ ጼልሽን፥ ነ ጎልያ ጎዳ መንꬃደ፤ ሄ መኦ ሳኣና ሙሉꬃደ ከሳ። 6 ኔን ከሴዳ ሚሻ ኡንቱንቱ ጼልሽን፥ ነ ሀሽያን ቶካደ፥ ለምእ ለምእሽን ከሳ። ቢታ በኤናዳን፥ ነ ሶምኡዋ ካማ። ሀ ኔን ሀንያዌ እስራኤልያ አሳዉ ማላታ ግዳናዳን፥ ታን ኦꬃድ” ያጌዳ።

7 ታንካ እ ታና አዛዜዳዋዳን ኦꬃድ። ኦሞዶ ብያ አሳዳን፥ ጋላስ ታን ቃቼዳዋ ካረ ከሳድ። ኦማርሳን ቃይ ታ ጎልያ ጎዳ ታ ኩሽያን መንꬃደ ከሳድ፤ ታን ከሴዳ ሚሻ ኡንቱንቱ ጼልሽን፥ ታ ሀሽያን ቶካደ፥ ለምእ ለምእሽና ባድ።

8 ዎንተꬃ መꬍና ጎዳ ቃላይ ታኮ ሀዋዳን ያጊደ ዬዳ፤ 9 “ላ አሳ ናአዉ፥ ሄ ማካላንቻ ዛራቱ፥ እስራኤልያ አሳቱ ኔና፥ ‘ኔን ኦꬅያዌ አዬ?’ ጊደ ኦቼድኖ ግድክኖ? 10 ኔን ኡንቱንታ ሀዋዳን ያጋ፤ ‘ኡባ ሞድያ መꬍና ጎዳይ ሀዋዳን ያጌ፤ “ሀ ትምቢቲ የሩሳላመን ካፑዋባነ እስራኤልያ አሳ ኩመንꬃባ” ያጋ’ ያጌ። 11 ኔን ኡንቱንታ፥ ‘ታን ህንተዉ ማላታ። ታን ኦꬄዳዋዳን፥ ኡንቱንቱ ቦላ ሀናና፤ ኡንቱንቱ ኦሞደቲደ፥ ሀራ ቢታ ባና’ ያጋ።

12 “ኡንቱንቱ ግዶን ደእያ ካፑ ጎዳ ሉክ ከሲደ፥ ባረ ሚሻ ባረ ሀሽያን ቶኪደ፥ ለምእ ለምእሽና ባና፤ እ ቢታ በኤናዳን፥ ባረ ሶምኡዋ ካማና። 13 ታን ግትያ አ ስንꬃን የጋና ታ ጲርያንካ ኦይቃና። ታን አ ባብሎነ ካታማ አሀና፤ ሽን እ ካላዳዌቱዋ ቢታ ባብሎነ ካታማ በኤናን ሀይቃና። [b] 14 አ ዩሹዋን ደእያ አ ማድያዋንታነ አ ኦላንቻቱዋ ኡባ ታን ኡባ ሳኣ ፕስክ ኦꬃና፤ ታን ኡንቱንታ ማሻን የደርሳና።

15 “ኡንቱንታ ታን ሀራ ቢታቱነ ካዉተꬃቱዋ ግዶ ላልያ ዎደ፥ ታን መꬍና ጎዳ ግድያዋ ኡንቱንቱ ኤራና። 16 ኡንቱንቱ ባረንቱ ብያ ካዉተꬃቱዋ ግዶን ባረንቱ ቱና ኦሱዋ ፓጻና ማላ፥ ታን ኡንቱንቱፐ አማሬዳዋንታ ኦላፐ፥ ኮሻፐነ ኢታ ሀርግያፐ ከስ አካናዳን ኦꬃና። ሄ ዎደ ታን መꬍና ጎዳ ግድያዋ ኡንቱንቱ ሄዋን ኤራና” ያጊደ ዬዳ።

17 መꬍና ጎዳ ቃላይ ታኮ ሀዋዳን ያጊደ ዬዳ፤ 18 “ላ አሳ ናአዉ፥ ነ ኡክꬃ ዳጋማን ማ፤ ቃይ ነ ሃꬃካ ያሻን ኮኮራደ ኡሻ። 19 ቢታን ደእያ አሳዉ ሀዋዳን ያጋ፤ ‘ኡባ ሞድያ መꬍና ጎዳይ እስራኤልያ ቢታን ደእያ የሩሳላመ አሳባ ሀዋዳን ያጌ፤ “ኡንቱንቱ ባረንቱ ኡክꬃ ህርጋን ማና፤ ባረንቱ ሃꬃካ ሻቢርሳን ኡሻና። አያዉ ጎፐ፥ ያን አሳይ ኡባይ ገናንቻነ ማካላንቻ ግዴዳ ድራዉ፥ ኡንቱንቱ ቢታይ ኦና ግዳናዋ። 20 ሀእ አሳይ ኩሜዳ ካታማቱ ꬋያና፤ ቃይ ቢታይካ ኦና ግዳናዋ። ሄ ዎደ ታን መꬍና ጎዳ ግድያዋ ህንተ ሄዋን ኤራና” ያጌ’ ያጋ” ያጊደ ዬዳ።

21 መꬍና ጎዳ ቃላይ ታኮ ሀዋዳን ያጊደ ዬዳ፤ 22 “ላ አሳ ናአዉ፥ እስራኤልያ ቢታባዉ፥ ‘ጋላሳይ አꬌዳ፤ ሳጻይ ኡባይካ መላ ግዴዳ’ ያጊደ ህንተንቱ ሌምስያዌ እ አዬ? 23 ሄዋ ድራዉ፥ ኡንቱንቶ ኔን፥ ‘ኡባ ሞድያ መꬍና ጎዳይ ሀዋዳን ያጌ፤ “ታን ሀ ሌምሱ ላኤንꬆ ሀሳየተናዳን ኦꬃና፤ ኡንቱንቱ ዛረꬂደ፥ ሄዋ እስራኤልያ ቢታን ሌምስክኖ” ያጌ’ ያጋ። ቃይ ኡንቱንቶ፥ ‘ጋላሳይ ማታቴዳ፤ ሳጻይ ኡባይካ ፖለታና ሀኔ’ ያጋ። 24 ሀዋፐ ስንꬃዉ እስራኤልያ አሳ ግዶን ዎርዱዋ ሳጻይነ ሙሩኑ ኡባይ ደኤና። 25 ታን መꬍና ጎዳይ፥ ኦዳና ኮዮዋ ኦዳይ፤ ሄዌካ ጋምኤናን ፖለታና። ህንተኖ፥ ማካላንቻ አሳቶ፥ ታን ኦድያባ ኡባ ህንተ ላይꬃን ታን ፖላና። ታን ኡባ ሞድያ መꬍና ጎዳይ ሀዋ ኦዳይ” ያጊደ ዬዳ።

26 ቃይካ መꬍና ጎዳ ቃላይ ታኮ ሀዋዳን ያጊደ ዬዳ፤ 27 “ላ አሳ ናአዉ፥ እስራኤልያ አሳይ ሀዋዳን ያጌ፤ ‘እ በኤዳ ሳጻይ ስንꬃናዉ ዳሮ ላይꬃሳ፤ ቃይ እ አዱሳ ዎድያን ሀናናዋ ኦዴ’ ያጌ። 28 ሄዋ ድራዉ፥ ኔን ኡንቱንቶ ሀዋዳን ያጋ፤ ‘ኡባ ሞድያ መꬍና ጎዳይ ሀዋዳን ያጌ፤ “ታን ኦድያ ቃላይ ፖለታናፐ አትና፥ እቱካ ጋምኤና። ታን ኡባ ሞድያ መꬍና ጎዳይ ሀዋ ኦዳይ” ያጌ’ ያጋ” ያጊደ ዬዳ።

<- ህዝቄላ 11ህዝቄላ 13 ->