1 ሙሴ ዛሪደ፥ “ኡንቱንቱ ታና አማነናን እጾፐ፥ ዎይ ታን ኦድያዋ ስሰናን እጺደ፥ ‘መꬍና ጎዳይ ነዉ ቆንጭቤና’ ጎፐ ዋኖ?” ያግ ዛሬዳ። 2 መꬍና ጎዳይ አ፥ “ሄ ነ ኩሽያን ደእያዌ አዬ?” ያጊደ ኦቼዳ። እካ “ጻምኣ” ያጌዳ። 3 መꬍና ጎዳይ አ፥ “አነ ሄ ጻምኣ ሳኣን ኦላ” ያጌዳ። ሙሴ ሄ ጻምኣ ሳኣን ኦሌዳ ዎደ ሾሻ ግዴዳ፤ ያትና፥ ሙሴ አፐ ዎጼዳ። 4 ሄዋፐ ጉይያን መꬍና ጎዳይ አ፥ “ነ ኩሽያ የዳደ፥ አ ዱፍያ ኦይቃ” ያጌዳ። ሙሴ የዲደ ሾሻ ኦይቂና፥ ሾሻይ አ ኩሽያን ስሚደ፥ ጻምአዉ ላመቴዳ። 5 መꬍና ጎዳይ፥ “ሀዌ ሀኔዳዌ፥ መꬍና ጎዳይ ነ አዎቱዋ ጾሳይ፥ አብራሃማ ጾሳይ፥ ይሳቃ ጾሳይነ ያቆባ ጾሳይ ነዉ ቆንጬዳዋ ኡንቱንቱ አማናናዳና” ያጌዳ። 6 ሄዋፐ ጉይያን መꬍና ጎዳይ አ፥ “ነ ኩሽያ ነ ሾጵያን የዳ” ያግና፥ ሙሴ ባረ ኩሽያ ሾጵያን የዴዳ፤ እ ከስ ጼሊደ፥ “ታ ኩሺ ኦሎቲደ ሻቻዳን ቦጼዳ” ያጌዳ። 7 ጾሳይ አ፥ “ነ ኩሽያ ነ ሾጵያን ዛራደ የዳ” ያጌዳ። ሙሴ ባረ ኩሽያ ባረ ሾጵያን ዛር የዲደ ከስያ ዎደ፥ “ታ ኩሺ ስሚደ ህንኮ ቦላ ማላ ግዴዳ” ያጌዳ።

8 ቃይካ መꬍና ጎዳይ አ፥ “ኡንቱንቱ ኔና አማነናን ꬋዮፐነ ኮይሮ ማላታ አማነናን እጾፐ፥ ላኤንꬆ ማላታ ኡንቱንቱ አማናናዋንታ። 9 ሽን ኡንቱንቱ ሀ ላኡ ማላታቱዋ አማነናን ꬋዮፐ፥ ዎይ ኔን ኦድያዋ ስሰናን እጾፐ፥ ናይለ ሻፋፐ ሃꬃ አካደ፥ መላ ቢታን ጉሳ፤ ኔን ሻፋፐ አኬዳ ሃꬃይ ቢታን ሱꬃ ግዳናዋ” ያጌዳ።

10 ሙሴ መꬍና ጎዳ፥ “አቤት መꬍና ጎዳዉ፥ ታን ሀዋፐ ካሰካ፥ ዎይ ኔን ነ ቆማዉ ሃሳዮደፐ ዶምና ታን ሃሳያናዉ ዳንዳይከ፤ ታን ዴዶታደ ሃሳያይ፤ ቃይ ታ እንጻርሳይካ ሉፋ” ያጌዳ። 11 መꬍና ጎዳይ አ፥ “አሳዉ ዶና መꬌዳዌ ኦኔ? አ ዱደ፥ ዎይ ቱለ ኦꬅያዌ ኦኔ? ጼልያዋነ ቆቃ ኦꬅያዌ ኦኔ? ታና መꬍና ጎዳ ግድክታየ? 12 ኔን ሀእ ባ፤ ታን ኔና ሃሳያናዳን ማዳና፤ ኔን ጋናባ ታን ኔና ታማርሳና” ያጌዳ።

13 ሽን ሙሴ፥ “አቤት ጎዳዉ፥ ሀያና፥ ሀዋ ኦꬃናዉ ሀራ አሳ ኪታርኪ!” ያጌዳ። 14 ሄዋፐ ጉይያን መꬍና ጎዳይ ሙሴዉ ሎይꬅ ሀንቀቲደ አ፥ “ሌዊያ ግዴዳ ነ እሻ አሮኔ? እ ሎኦ ሃሳያና ዳንዳይያዋ ታን ኤራይ፤ ሀእ እ ኔናና ጋከታናዉ ዪደ ኦግያ ቦላን ደኤ፤ እ ኔና በእያ ዎደ አ ዎዛናይ ናሸታናዋ። 15 ኔን፥ ‘ያጋ፤ ያጋ’ ጋደ አዉ ኦዳና፤ ታን ህንተንታ ላኡዋካ ሃሳያናዉ ማዳናነ ህንተንቱ ኦꬃናባ ታማርሳና። 16 እ አሳዉ ነ ድራ ሃሳያናዋ፤ ሄዌካ፥ እ ነዉ ዶና ማላ ግዳናዋ፥ ኔን አዉ ጾሳ ማላ ግዳናሳ ግያዋ። 17 ሽን ማላታቱዋ አን ኦꬃናዉ፥ ኔን ሀ ጻምኣ አካደ ባ” ያጌዳ።

18 ሄዋፐ ጉይያን ሙሴ ባረ ቦሉዋ ዮቶረኮ ስም ቢደ፥ “ሀኖ ጋካናዉ ሸምፑዋና ደእያ አሳይ ደኦፐ በአናዉ፥ ታን ጉየ ታ አሳኮ ግብጼ ቦ?” ያጌዳ። ዮቶረ ሙሳ፥ “ኤ ባ፤ ሳሮ ጋካ” ያጌዳ። 19 ሙሴ ሚድያማ ጋድያን ደእሽን መꬍና ጎዳይ አ፥ “ኔና ዎꬋናዉ ኮዬዳ አሳቱ ኡባይ ሀይቂ ድጌዳ ድራዉ፥ ጉየ ግብጼ ጋድያ ስማደ ባ” ያጌዳ። 20 ሙሴ ባረ ማቻቶነ ባረ አቱማ ናና ሀርያ ቶግስ አኪደ፥ ጉየ ግብጼ ስሙሳ ዶሜዳ፤ ሙሴ ጾሳ ጻምኣ ባረ ኩሽያን ኦይቂደ ቤዳ።

21 መꬍና ጎዳይ ሙሳ፥ “ኔን ግብጼ ስማደ ብያ ዎደ፥ ታን ነዉ እሜዳ ዎልቃን ኔን ኦꬃና ማላታቱዋ ኡባ ግብጼ ካትያ ስንꬃን ኔን ኦꬃናዋ ባሎፓ። ያትናካ አሳ እ የደና ማላ፥ ታን አ ዎዛና ዶንጭልሳና። 22 ሄ ዎደ ታን መꬍና ጎዳይ፥ ግያዋ ካትያዉ ሀዋዳን ያጋደ ኦዳ፤ ‘ “እስራኤሊ ታ ባይራ ናኣ። 23 እ ታዉ ጎይናና ማላ፥ ታ ናኣ ኔን የዳና ማላ፥ ታን ነዉ ኦዳድ፤ ሽን ኔን አ የደናን እጻዳ፤ ሄዋ ድራዉ፥ ታን ነ ባይራ አቱማ ናኣ ዎꬋና” ያጌ’ ያጋደ ኦዳ” ያጌዳ። [a]

24 ኦግያን ሸምፕያሳን መꬍና ጎዳይ ሙሴና ጋከቴዳ፤ አ ዎꬋና ሀኔዳ። 25 አ ማቻታ ጽፓራ ሳልያ አካደ፥ ባረ ናኣ ቃጻራዱ። ሄ ሾኩዋን ሙሴ ገድያ [b] ቦቻዱ። እዛ ሙሳ፥ “ኔን ታዉ ቱሙ ሱꬃ ምሽራ” ያጋዱ። 26 መꬍና ጎዳይ ሄዋ ድራዉ አ ዎናን አጌዳ። ሄ ዎደ ቃጻራ ማላታናዉ አ፥ “ኔን ታዉ ሱꬃ ምሽራ” ያጋዱ።

27 መꬍና ጎዳይ አሮና፥ “ኔን ሙሴና ጋከታናዉ መላ ቢታ ባ” ያጌዳ። እ ቢደ፥ ሙሴና ጾሳ ደርያን ጋከቲደ አ የሬዳ። 28 ሄዋፐ ጉይያን ሙሴ መꬍና ጎዳይ ባረ ቦላ ኪቴዳ ቃላ ኡባነ ኦꬃና ማላ፥ ባረና አዛዜዳ ኦራꬃ ማላታቱዋ ኡባ አሮናዉ ኦዴዳ። 29 ሙሴነ አሮነ ቢደ፥ እስራኤለቱዋ ጭማቱዋ ኡባ ሺሼድኖ። 30 አሮነ መꬍና ጎዳይ ሙሴዉ ኦዴዳ ቃላ ኡባ ኡንቱንቶ ኦዴዳ። ማላታቱዋካ ሄ አሳ ስንꬃን ኦꬄዳ። 31 ኡንቱንቱካ አማኔድኖ። መꬍና ጎዳይ ኡንቱንቶ ቆፔዳዋነ ኡንቱንቱ ቱጋ በኤዳዋ ስሴዳ ዎደ፥ ኡንቱንቱ ጉፋኒደ ጎይኔድኖ።

<- ከሳ 3ከሳ 5 ->