1 ሄዋፐ ጉይያን፥ ሙሴ እስራኤልያ ጭማቱዋና ግዲደ፥ አሳ ሀዋዳን ያጌዳ፤ “ታን ሀች ህንተና አዛዝያ አዛዙዋ ናግተ። 2 ዮርዳኖሳ ሻፋ ፕኒደ፥ መꬍና ጎዳይ ህንተ ጾሳይ ህንተንቶ እምያ ቢታ ገልያ ዎደ፥ ዎልቃማ ሹቻቱዋ ኤሲደ፥ ቦሹንቻን ኦክተ። [a] 3 መꬍና ጎዳይ ህንተ አዎቱዋ ጾሳይ ህንተንቶ እማና ጌዳዋዳን፥ ኤሳይነ ማꬃይ ጎግያ ቢታ፥ መꬍና ጎዳይ ህንተ ጾሳይ ህንተንቶ እምያ ቢታ ህንተ ፕንያ ዎደ፥ ሀ ህግያ ቃላቱዋ ኡባ ሄ ሹቻቱ ቦላ ጻፍተ። 4 ህንተ ዮርዳኖሳ ፕኔዳ ዎደ፥ ታን ህንተና ሀች አዛዜዳዋዳን፥ ሀ ሹቻቱዋ ኤባላ ደርያ ቦላን ኤሲደ፥ ኡንቱንታ ቦሹንቻን ኦክተ። 5 ሄ ሳኣን መꬍና ጎዳዉ፥ ህንተ ጾሳዉ፥ ብራታ ሚሻይ ቦችቤና ሹቻፐ ያርሽያ ሳኣ ኦꬅተ።[b] 6 ሄ ህንተ መꬍና ጎዳዉ፥ ህንተ ጾሳዉ፥ ያርሽያ ሳኣ ማሰትቤና ሹቻፐ ኦꬅተ፤ ያቲደ ሄዋ ቦላን መꬍና ጎዳዉ፥ ህንተ ጾሳዉ፥ ጹግያ ያርሹዋ ሺሽተ። 7 እትፐተꬃ ያርሹዋካ፥ ሄዋን ሚደ፥ መꬍና ጎዳ ህንተ ጾሳ ስንꬃን ናሸትተ። 8 ሀ ህግያ ቃላቱዋ ኡባ ቆንጭያን ቤትያዋዳን ኦꬂደ፥ ሀ ህንተ ኤሴዳ ሹቻቱ ቦላ ጻፍተ” ያጌዳ።

9 ሙሴ ቃይካ ሌዊያ ግድያ ቄሳቱ ዋና እትፐ ግዲደ፥ እስራኤልያ አሳ ኡባዉ ሀዋዳን ያጌዳ፤ “ህንተኖ እስራኤልያ አሳዉ፥ ጮኡ ጊደ ስስተ! ሄኮ ሀች ህንተ መꬍና ጎዳ ህንተ ጾሳ አሳ ግዴድታ። 10 ሄዋ ድራዉ፥ ሀች ታን ህንተንቶ እምያ አዛዙዋነ አዋዩዋ ናግያዋን፥ መꬍና ጎዳ ህንተ ጾሳ ቃላዉ አዛዘትተ” ያጌዳ።

11 ሄ ጋላስካ ሙሴ አሳ ሀዋዳን ያጊደ አዛዜዳ፤ 12 “ህንተ ዮርዳኖሳ ፕኔዳ ዎደ፥ ጋሪዛማ ደርያ ቦላ ኤቂደ አሳ አንጃናዋንታ: ስሞና፥ ሌዊያ፥ ይሁዳ፥ ይሳኮራ፥ ዮሴፎነ ቢንያማ ዛራቱዋ። [c] 13 ቃይ አሳ ሸቃናዉ ኤባላ ደርያ ቦላ ኤቃናዋንቱ: ሮቤላ፥ ጋዳ፥ አሴራ፥ ዛብሎና፥ ዳናነ ንፍታሌማ ዛራቱዋ። 14 ሌዋቱ ባረንቱ ቃላ ꬎቁ ኦꬂደ፥ እስራኤልያ አሳዉ ሀዋዳን ያግኖ።

15 “ ‘መꬍና ጎዳ ስንꬃን ቱና ግዴዳዋ፥ ኩሽያ ሂላንቻይ ማሲደ ከሴዳ ምꬃ ግድና፥ ዎይ ብራታ ትጊደ መꬌዳ ኤቃ ግድና፥ አዉ ጌማን ጎይንያ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ!’ ያጎ። [d]

16 “ ‘ባረ አዉዋ ዎይ ባረ ዳዮ ካዉሽያ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ!’ ያጎ። [e]

17 “ ‘ባረ ሾሩዋ ዛዋ ሱግያ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ!’ ያጎ። [f]

18 “ ‘ቆቃይ ባናዉ በስያ ኦግያፐ ባላሳ ዛርያ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ!’ ያጎ። [g]

19 “ ‘በትያ፥ አታ አዉ ባይና ናናቱዋ ፕርዳነ አምአት ፕርዳ ገላየዳ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ’ ያጎ። [h]

20 “ ‘ባረ አዉዋ ማቻትና ግሲደ፥ ባረ አዉዋ ቦንቹዋ ካዉሽያ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ!’ ያጎ። [i]

21 “ ‘አይ መህያናካ ግስያ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ!’ ያጎ። [j]

22 “ ‘ባረ ምቻቶ ግድያ፥ አዉዋ ናትና ግድና፥ ባረ ዳይ ናትና ግስያ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ!’ ያጎ። [k]

23 “ ‘ባረ ቦሎታትና ግስያ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ!’ ያጎ። [l]

24 “ ‘ባረ ሾሩዋ ጌማን ዎꬍያ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ!’ ያጎ።

25 “ ‘ሻሉዋን ሻመቲደ፥ ጽሎ አሳ ዎꬍያ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ!’ ያጎ።

26 “ ‘ሀ ህግያ ቃላቱዋ ፖሊደ ምንሰና አሳይ ሸቀቴዳዋ ግዶ’ ያግና፥ [m]

“አሳይ ኡባይ ‘አመንእ!’ ” ያጎ።

<- ዛረꬁዋ 26ዛረꬁዋ 28 ->