ዛረꬁዋ 17

1 “መꬍና ጎዳዉ፥ ህንተ ጾሳዉ፥ ትላ ቦላና ደኤና መህያ፥ ዎይ ህንተ ዶርሳ ያርሹዋ ኦꬂደ ሺሾፕተ፤ ሄዌ አ ስንꬃን ሸነይያባ።

2 “መꬍና ጎዳይ ህንተ ጾሳይ ህንተንቶ እምያ ካታማቱዋፐ ሀቃዋንካ አቱማዋ ግድና ማጫዋ ግድና አ ጫቁዋ ኮሊደ፥ መꬍና ጎዳ ህንተ ጾሳ ስንꬃን ኢታ ኦꬄዳ አሳይ ህንተ ግዶን ቤቶፐ፥ 3 ቃይ ታ አዛዙዋ መንꬂደ፥ ሀራ ጾሳቶ ጎይኔዳ ኡራይ፥ አዋዉ፥ ዎይ አግናዉ፥ ዎይ ሳሉዋ ጾልንተቶ ጎይኔዳ ኡራይ ደኦፐ፥ [a] 4 ሄዋ ማላባ ህንተ ስሶፐ፥ ሄ የዉዋ ምንሲደ ፓይድተ። ህንተ ቆርና፥ ሄዋ ማላ ቱናባይ እስራኤልያ ግዶን ኦሰቴዳዌ ቱማነ ጌሻ ግዶፐ፥ 5 ሄ ኢታ ኦꬄዳ ብታንያ ዎይ ምሽራቶ ህንተ ካታማፐ ጋጻ ከሲደ፥ ሹቻን ጫዲደ ዎꬍተ። 6 ሄ ዎꬍያ አሳይ ሀይቃናዉ በስያዌ ላኡ ዎይ ሄዙ ማርካይ ማርካትና ግዶ፤ እት አሳ ማርካ ቃላን አይ አሳይነ ሀይቆፖ። [b] 7 አ ዎꬋናዉ ማርካቱ ኮይሮ ሹቻን አ ጫድኖ፤ ኡንቱንታ ካሊደ አሳይ ኡባይ አ ጫዶ። ሄዋዳን ኦꬂደ፥ ኢታ ህንተ ግዶፐ ድግተ። [c]

8 “ህንተ ህንተ ካታማቱዋን ፕርዳናዉ ሎይꬅ ዴጽያ ሸምፑዋ ሞቱዋ ግድና፥ ሾቻ ማዱꬃ ሞቱዋ፥ ዎይ ቃይ ታዉ በሰ ግያ አቆ ሞቱዋ ግድናካ ደንዶፐ፥ ሄ ዎደ ህንተ መꬍና ጎዳይ ህንተ ጾሳይ ዶሬዳ ሳኣ አህተ። 9 ሄዋን ሌዋቱዋፐ ቄሰ ግድያዋኮነ ሄ ዎድያን ዳና ግዲደ ፕርድያዋኮ ሺሽተ፤ ሄ የዉዋ ኡንቱንቱ ፕርዳና። 10 መꬍና ጎዳይ ዶሬዳ ሳኣን ኡንቱንቱ ፕርዴዳዋዳን ኦꬅተ፤ ኡንቱንቱ ፕርዴዳዋፐ አሸናዳን ናገትተ። 11 ኡንቱንቱ ህንተና ታማርሴዳ ህግያዳንነ ኡንቱንቱ ኦዴዳ ፕርዳዳን ኦꬅተ፤ ኡንቱንቱ ፕርዴዳ ፕርዳፐ ኡሸቻነ ሀድርሳ አይነ ሸርእ ጎፕተ። 12 ሄዋን መꬍና ጎዳዉ፥ ህንተ ጾሳዉ፥ ኦꬅያ ዳናዉ፥ ዎይ ቄስያዉ አዛዘተናን እጺደ፥ ኦቶረትያ አሳይ ደኦፐ፥ ሄ አሳይ ሀይቆ፤ ሄዋዳን ኦꬂደ፥ ኢታ እስራኤልያ ግዶፐ ድግተ። 13 ሄዋፐ ጉይያን ሄዋ ስሲደ፥ አሳይ ኡባይ ያያና፤ ላኤንꬆ ኦቶረተና።

ካትያ ጼልያ ዎጋቱዋ

14 “መꬍና ጎዳይ ህንተ ጾሳይ ህንተንቶ እምያ ቢታ ላቲደ፥ ያን ደኡዋ ዶምያ ዎደ፥ ህንተ ዩሹዋን ደእያ ካዉተꬃቱዋዳን፥ ህንተካ፥ ‘አነ ኑንካ ኑ ቦላን ካትያ ካተዬቶ’ ያጊደ ቆፖፐ፥ 15 ህንተ ካተያናዌ መꬍና ጎዳይ ህንተ ጾሳይ ህንተንቶ ዶሬዳዋ ግድያዋ ኤርተ። ሄዌካ ህንተ አሳ ግዶፐ ዶረቴዳዋ ግዶፐ አትና፥ ሀራ ቢታ አሳ ህንተ ቦላ ካተዮፕተ። 16 ሄ ካቲ ፓራ ዳሩዋ ሺሻናዉ በሰና፤ ቃይ አሳይካ ፓራ ጮራያናዉ ላኤንꬆ ግብጼ ስማናዳን ኦꬆፖ። አያዉ ጎፐ፥ መꬍና ጎዳይ፥ ‘ሄ ኦግያና ላኤንꬆ ሙለካ ስሞፕተ’ ያጌዳ። [d] 17 አ ዎዛና ባለናዳን፥ ካቲ ጮራ ማጫ አሳ አኮፖ። ዎርቃካ ብራካ ዳሪ ሺሾፖ። [e]

18 “እ ባረ ካዉተꬃ አራታን ኡትያ ዎደ፥ ሌዊያ ዛረ ግድያ ቄሳቱ ናግያ ማጻፋፐ ሀ ህግያ ዱቂደ ባረዉ አኮ። 19 እ ሀ ህግያ ቃላነ ዎጋ ናግያዋንነ ኡንቱንታ ኦꬅያዋን መꬍና ጎዳዉ፥ ባረ ጾሳዉ፥ ያይያዋ ታማራና ማላ፥ ሀ ማጻፋይ አናና ደኦ፤ እካ ሀ ማጻፋ ባረ ደኦ ላይꬃን ኡባን ናባቦ። 20 ያቶፐ፥ እ ባረ ዎዛናን፥ ‘ታን ታ ላገቱዋፐ አꬋይ’ ጊደ ባረ እሻቱዋ ቦላ ኦቶረተና። እካ ጾሳ ህግያፐ ሀድርሳነ ኡሸቻ ጌና። እ ባረ ካዉተꬃን አዱቂደ ደአና፤ አ ናናይካ እስራኤልያ ጋድያን ካትያ ግዳናዋ።

<- ዛረꬁዋ 16 ዛረꬁዋ 18 ->