3 “ህንተ ቱናባ አያነ ሞፕተ። 4 ህንተ ማና መሄቱነ ዶአቱ ሀዋንታ፤ ቦራ፥ ዶርሳ፥ ዴሻ፥ 5 ገንእያ፥ ዶግያ፥ ዋሻ፥ ዎራ ዴሻ፥ ጮጎሹዋ፥ ጋራነ ደርያ ዶርሳ። 6 ጹጉንꬃይ ዉር ጳልቀቴዳዋንታ፥ ዋሞትያ መሄቱዋነ ዶአቱዋ ኡባ ሚተ። 7 ሽን ዋሞትያዋንታ ግዲደ፥ ጹጉንꬃይ ጳልቀትቤናዋንታ ሞፕተ፤ ሄዋንቱካ ጋሉዋ፥ ሀርባይንያነ ጉፓልያ። ሀዋንቱ ዋሞቲኖ፤ ሽን ኡንቱንቱ ጹጉንꬃይ ጳልቀትቤና ድራዉ፥ ኡንቱንቱ ህንተንቶ ቱና። 8 ጉዱንꬃይካ ጹጉንꬃይ ጳልቀꬃ ግዶፐነ ዋሞተና ድራዉ፥ እ ህንተንቶ ቱና። አ አሹዋ ሞፕተ፤ አ ባኩታካ ቦቾፕተ።

9 “ሃꬃ ግዶን ደእያ መታቱዋ ኡባፐ ህንተ ማናዋንቱ ሀዋንታ፤ ሞልያ ማላ ቀፊነ ፖቁ ደእያ ኡባ ሚተ። 10 ሽን ሞልያዋ ማላ ቀፊነ ፖቁ ባይና ሀቃዋነ ሞፕተ። ሄዋንቱ ህንተንቶ ቱና።

11 “ጌሻ ግዴዳ ካፉዋ ኡባ ሚተ፤ 12 ሽን ካፎቱዋፐ ህንተ ሜናዋንቱ ሀዋንታ: አርጋንꬃ፥ ባዙዋ አንኩዋ፥ ካረꬃ አንኩዋ፥ 13 ጎሉዋ፥ ጽንግልያ ዛረ ኡባ፥ 14 ቁሩዋ ዛረ ኡባ፥ 15 ያንቻ፥ ጫንጭያ ጉቱዋ፥ ሃꬃ ካፉዋ፥ ጋጭያ ዛርያ ኡባ፥ 16 ቄር ጉቱዋ፥ ዎጋ ጉቱዋ፥ ሃꬃ ኩቱዋ፥ 17 ባዙዋ ጉቱዋ፥ ይንዱዋ፥ ጋንጋኑዋ፥ አዱሳ ቆꬊ ደእያ ሃꬃ ካፉዋ፥ 18 ሳቢሳ ግያ ካፉዋ ዛረ ኡባ፥ ጅንጅላትያነ ሻልያ። 19 ቀፍያና ደእያ ቄር መታቱ ኡባይ ህንተንቶ ቱና፤ ኡንቱንታ ሞፕተ። 20 ሽን ሄ ቀፍያና ደእያባቱዋፐ ጌሻ ግድያዋንታ ሚተ።

21 “ህንተ መꬍና ጎዳዉ፥ ህንተ ጾሳዉ፥ ጌሻ አሳ ግድያ ድራዉ፥ ባኩቴዳዋ ኡባ አያነ ሞፕተ። ሄዋ ህንተ ካታማን ደእያ በተቱ ማናዳን ኡንቱንቶ እማናዉ ዳንዳዪታ፤ ዎይ ሀራ ቢታ አሳዉ ዛልአናዉ ዳንዳዪታ። [c]