1 “ስም መꬍና ጎዳ ህንተ ጾሳ ሲቅተ፤ እ ህንተፐ ኮይያ አ አዋዮቱዋ፥ አ ህገቱዋነ አ አዛዞቱዋ፥ ኡባ ዎደ ናግተ። 2 መꬍና ጎዳ ሴራ ህንተ ኤሬዳዋ ኬና አባ ህንተ ታማሬዳዋ ኡባ ሀች ሀሳይተ፤ ሄዋ ኤርያዋንቱ ህንተናፐ አትና፥ ህንተ ናናቱዋ ግድክኖ፤ መꬍና ጎዳ አንጋ፥ አ ዎልቃማ ኩሽያነ አ ምጨቴዳ ቀስያ፥ 3 እ ኦꬄዳ ማላታቱዋነ እ ግብጼ ካትያ ቦላነ አ ቢታ ኡባ ቦላ ኦꬄዳዋ በኤድታ። [a] 4 ቃይ ኡንቱንቱ ህንተና ካሊደ የደርሴዳ ዎደ፥ መꬍና ጎዳይ ግብጼ ቢታ ኦላንቻቱዋ፥ ኡንቱንቱ ፓራቱዋነ ፓራ ጋረቱዋ ዞኦ አባን ምትሲደ፥ ሀች ጋካናዉ፥ ኡንቱንታ ኡባና ꬋይሴዳዋ በኤድታ። [b] 5 ህንተ ሀ ሳኣ ጋካናዉ፥ መላ ቢታን ጾሳይ ህንተንቶ ኦꬄዳዋ ህንተ ኤሪታ። 6 ቃይ ሮቤላ ዛርያፐ ኤልኣባ ናናቱዋ ግድያ ዳታና ቦላነ አቢራማ ቦላ ጾሳይ ኦꬄዳዋ ሀሳይተ። እስራኤልያ አሳይ ኡባይ ጼልሽን፥ ቢታይ ዶየቲደ፥ ኡንቱንታ፥ ኡንቱንቱ ሶ አሳ፥ ኡንቱንቱ ዱንካንያነ ኡንቱንቶ ደእያ ሸምፑዋና ደእያዋ ኡባ ምቴዳ። [c] 7 ኤ! መꬍና ጎዳይ ኦꬄዳ ሀ ዎልቃማ ኦሶ ኡባ ህንተ አይፍያን በኤዳዋንቱ ህንተና።

8 “ሄዋ ድራዉ፥ ህንተ ምኖ ግዳናዳንነ ዮርዳኖሳ ፕኒደ ህንተ አካናዉ ብያ ቢታ ህንተ ላታናዳን፥ ታን ሀች ህንተና አዛዝያ አዛዙዋ ኡባ ናግተ። 9 ያቶፐ፥ መꬍና ጎዳይ ህንተ ማይዛ አዋቶነ ኡንቱንቱ ዛረቶ እማና ጊደ ጫቄዳ፥ ማꬃይነ ኤሳይ ጎግያ ጋድያን ህንተ አዱሳ ላይꬃ ደአና። 10 ህንተ ላታናዉ ገልያ ቢታይ ህንተ ከሲደ ዬዳ ግብጼ ቢታ ማላ ግደና፤ ግብጼን ህንተ ካꬃ ዘሪደ፥ ሾይቃ ኡባ አታክልትያ ሳኣዳን ገድያን ሃꬃ ኡሺታ። 11 ሽን ዮርዳኖሳ ፕኒደ ህንተ ላታናዉ ብያ፥ ቢታይ ዞዘቱነ ዛንጋራቱ ደእያ፥ ሳሉዋ እራን አልያ ቢታ። 12 ሄ ቢታይ መꬍና ጎዳይ ህንተ ጾሳይ ጾሞስያ ቢታ፤ ላይꬃ ዶመꬃፐ ቢደ ላይꬃ ዉርሰꬃ ጋካናዉ፥ መꬍና ጎዳ ህንተ ጾሳ አይፊ አ ቦላን ደእያ ቢታ።

13 “ሄዋ ድራዉ፥ ህንተ መꬍና ጎዳ ህንተ ጾሳ ሲቃናዳንነ ህንተ ህንተ ኩመንꬃ ዎዛናፐነ ህንተ ኩመንꬃ ሸምፑዋፐ አዉ ኦꬃናዳን፥ ታን ህንተንቶ ሀች እምያ አዛዞቱዋ ህንተ ፖሎፐ፥ [d] 14 ህንተ ካꬃ፥ ዎይንያነ ዛይትያ ፓጨናን ሺሻና ማላ፥ ኦፍንꬃ እራነ ባልጉዋ እራ፥ አ ዎድያን ዎድያን ጾሳይ ህንተ ጋድያን ቡክሳና። 15 ጾሳይ ህንተ መህያዉ ደምባን ማታ ዳርሳና። ቃይ ህንተካ ማናነ ካላና።

16 “ህንተ ዎዛናይ ባልና ዎራ ስሚደ፥ ህንተ ሀራ ጾሳቶ ኦናዳንነ ኡንቱንቶ ጎይነናዳን ናገትተ። 17 ሄዌ ꬋዮፐ፥ መꬍና ጎዳ ሀንቁ ህንተ ቦላ ኤጽ ከሳና፤ እራይ ቡከናዳንነ ቢታይካ ሞከናዳን እ ሳሉዋ ጎርዳና፤ ህንተካ መꬍና ጎዳይ ህንተንቶ እምያ ሎኦ ጋድያፐ ኤለካ ꬋያና።

18 “ስም፥ ሀ አዛዞቱዋ ታዋንታ፥ ህንተ ዎዛናንነ ህንተ ቆፋን ዎꬅተ። ማላታዳን ኡንቱንታ ህንተ ኩሽያን ቃችተ፤ ቃይ ማላታዳን ህንተ ሶምእያንካ ዎꬅተ። 19 ሄዋንታ ህንተ ናናቱዋካ ታማርስተ። ህንተ ሶን ደእያ ዎደ፥ ኦግያን ሀመትያ ዎደ፥ ግስያ ዎደነ ደንድያ ዎደካ፥ ኡንቱንቶ ኦድተ። 20 ህንተ ፐንግያ ቆስለꬃቱዋ ቦላንነ ህንተ ድርሳ ፐንግያ ቦላን ህንተ ኡንቱንታ ጻፍተ። [e] 21 ያቶፐ፥ መꬍና ጎዳይ ህንተ ማይዛ አዋቶ እማና ጊደ ጫቄዳ ጋድያን ህንተ ላይꬃይነ ህንተ ናናቱ ላይꬃይ ሳኣፐ ቦላና ደእያ ሳሉ ደእያዋ ኬሻ ግዳናዋ።

22 “ህንተ መꬍና ጎዳ ህንተ ጾሳ ሲቃናዳን፥ አ ኦገ ኡባን ሀመታናዳንነ አዉ አማነታናዳን፥ ታን ሀች ህንተንቶ እምያ አዛዞቱዋ ህንተ ምንሲደ ናጎፐ፥ 23 መꬍና ጎዳይ ሀ ካዉተꬃቱዋ ኡባ ህንተ ስንꬃፐ የደርሲደ ከሳና፤ ህንተካ ህንተፐ ግታትያነ ዎልቃምያ ካዉተꬃቱዋ ቢታ ዎꬅ አካና። 24 ህንተ ገድያን ህንተ የꬌዳ ቢታ ኡባይ ህንተሳ ግዳናዋ። ህንተ ዛዋይ መላ ቢታፐ ቢደ ሊባኖሳ ጋካናዉነ ኤፍራጺሳ ሻፋፐ ቢደ አዋይ ዉልያ ባጋ ሜድተራነ አባ ጋካናሳ ግዳናዋ። [f] 25 ህንተናና አይ አሳይነ ኤቀታናዉ ዳንዳየና፤ መꬍና ጎዳይ ህንተ ጾሳይ ህንተንቶ ጌዳዋዳን፥ ህንተ ብያሳን ኡባን አሳይ ህንተና በኢደ ዳጋማናዳንነ ህንተዉ ያያናዳን ኦꬃና።

26 “በእተ፥ ሀች ታን ህንተ ስንꬃን አንጁዋነ ሸቃ ዎꬃይ። 27 ታን ሀች ህንተና አዛዝያ መꬍና ጎዳ ህንተ ጾሳ አዛዞቱዋ ናጎፐ፥ ህንተ አንጀታና። 28 ሽን ታን ህንተና ሀች አዛዝያ መꬍና ጎዳ ህንተ ጾሳ አዛዞቱዋ ናገናን እጺደ፥ ህንተ ኤርቤና ሀራ ጾሳቶ ጎይናናዉ አ ኦግያፐ ዎራ ስሞፐ፥ ህንተ ሸቀታና። 29 መꬍና ጎዳይ ህንተ ጾሳይ ህንተ ላታናዉ ብያ ቢታ ህንተና ገልስያ ዎደ፥ ጋሪዛማ ደርያን አንጁዋ ኤባላ ደርያ ቦላን ሸቃ አዋያና። [g] 30 ሀ ላኡ ደረቱ ዮርዳኖሳ ሻፋፐ ሄፍንꬃና ኦግያፐ አዋይ ዉልያ ባጋን፥ አራባን ደእያ ካናነቱዋ ጋድያን ደኢኖ፤ ኡንቱንቱ ቃይ ገልጋላ ካታማ ስንꬃን ደእያ ሞረ ምꬃዉካ ማታን ደኢኖ። 31 ህንተ ሀእ መꬍና ጎዳይ ህንተ ጾሳይ ህንተንቶ እምያ ቢታ ላታናዉ ዮርዳኖሳ ሻፋ ፕናና ሀኒታ። ህንተ ሄ ቢታ አኪደ ያን ደእያ ዎደ፥ 32 ታን ሀች ህንተንቶ እምያ አዋዮቱዋነ ህገቱዋ ኡባ ምንሲደ ናግተ።

<- ዛረꬁዋ 10ዛረꬁዋ 12 ->