9 “ታን ሄዋ ጼልሽን፥ ካተቱዋ አራታቱ ኡተꬃዉ ጊጌድኖ። መꬍናፐ ደእያዌ ባረ አራታን ኡቴዳ። አ ማዩ ሻቻዳን፥ አ ሁጲያ ብናናይካ ፑቱዋዳን ቦꬃ። አ አራታይነ አራታ ይንግረꬃቱ ታማዳን ላጮቲኖ። [e] 10 ታማ ሻፋይ አ ስንꬃፐ ፑልቲደ ከሴ። ሻአ ገደ ሻአቱ አዉ ኦꬂኖ፤ ቃይ ዳሮ ሚሎነቱ አ ስንꬃን ኤቄድኖ። ያት ደእሽን ፕርዳ ፕርድያዌ ዶመቴዳ፤ ማጻፋቱካ ዶየቴድኖ። [f]

11 “ሀ ጉꬃ ካጪ ሃሳይያ ኦቶሮ ቃላይ ታዉ ስሰትያ ድራዉ፥ ታን ሀእካ ꬊሽሳደ ጼላድ። ታን ጼልሽን ሀ ዶአይ ሀይቂደ፥ ኤጽያ ታማን ኦለቲደ ꬋዬዳ። 12 የንኮ ሄዙ ዶአቱዋፐ፥ ኡንቱንቱ ማታይካ አከቴዳ፤ ሽን ኡንቱንቱ ኬረቴዳ ዎድያ ፓጻ ደእኖ ጌተቴድኖ።

13 “ቃይካ ታን ሄ ቃማ ሳጻን፥ አሳ ናኣ ማላትያዌ ሳሉዋ ሻርያና ይያዋ በኣድ። መꬍናፐ ደእያዋኮ ሺቅና፥ ኡንቱንቱ አ አ ስንꬃ አꬄድኖ።[g] 14 አዉ ማታይ፥ ቦንቹነ ካዉተꬃይ እመቴዳ። አሳይ ኡባይ፥ ካዉተꬃቱ ኡባይነ ዱማ ዱማ ቃላን ሃሳይያ ዛራቱ ኡባይ አዉ ሞደቴድኖ። አ ማታይ መꬍናዉ ሻረተና ማታ፤ አ ካዉተꬃይ ሙለካ ꬋየናዋ።[h]

15 “ታና ዳኔላ ግዶፐ፥ ታ በኤዳዋን ኡባን ዳጋማድ፤ ታ ሳጻይካ ታና ሻባርሴዳ። 16 ታን ሄዋ ኤቄዳዋንቱፐ እቱዋኮ ሺቃደ፥ ሀ ኡባዉ ቱሙ ብለꬃይ አየንቶ ኦቻድ። እ ታዉ አ ብለꬃ ኡባ ሀዋዳን ያጊደ ኦዴዳ፤ 17 ‘ሀ ኦይዱ ዎልቃማ ዶአቱ ሀ ሳኣን ስንꬃፐ ደንዳና ኦይዱ ካዉተꬃቱዋ። 18 ሽን ኡባፐ ꬎቂያ ጾሳ ጌሻቱ አ ካዉተꬃ አኪደ፥ መꬍናዉ ባረሳ ኦꬃና፤ መꬍና ካዉተꬃ ኡንቱንቱ ላታና’ ያጌዳ። [i]

19 “ሄዋፐ ጉይያን፥ ታን ሀራ ዶአቱዋ ኡባፐ ዱማቲደ ያሽያ ኦይደንꬆ ዶአዉ ደእያ ቱሙ ብለꬃ ኤራናዉ ኮያድ። ሄ ዶአዉ ብራታ አቻይነ ናሃሰ ብራታ ጹጉንꬃይ ደኤ፤ እ ባረናን ጋከቴዳዋ ኡባ መንሬꬂደ ሜነ ሚሽን አቴዳዋ ባረ ገድያን የሬꬄ። 20 ቃይ ሀ ዶኣ ሁጲያን ደእያ ታሙ ካጨቱዋባነ ቃይ ጉየፐ ከሲደ፥ ኡንቱንቱፐ ሄዛቱዋ ꬎቆል ኦሌዳ ቄር ካጭያባካ ኤራናዉ ኮያድ። ሄ ቄር ካጭያዉ አይፈቱነ ኦቶሮ ቃላ ሃሳይያ እንጻርሳይ ደኤ። ሄ ካጪ የንኮቱዋ ኡባፐ አꬍ ያሽያዋ። 21 ታን ጼልሽን፥ ሀ ካጪ ጌሻቱዋና ኦላ ጋከቲደ፥ ኡንቱንታ ጾኔዳ። [j] 22 ሄዌ ሀኔዳዌ፥ መꬍናፐ ደእያዌ ያና ጋካናዉነ፥ ኡባፐ ꬎቂያ ጾሳ ጌሻቶ ፕርዳይ ፕርደታና ጋካናሳ፤ ኡንቱንቱ ካዉተꬃ ላትያ ዎዲካ ጋኬዳ። [k]

23 “እ ታዉ ብለꬃ ሀዋዳን ያግ ኦዴዳ፤ ‘ኦይደንꬆ ዶአይ ሀ ሳኣን ስንꬃፐ ደንዳና ኦይደንꬆ ካዉተꬃ። ሄ ካዉተꬃይ ሀራ ካዉተꬃ ኡባፐ ዱማ፤ ቢታ ሳኣ እ ማና፥ የꬋናነ መንሬꬃና። 24 ቃይ ታሙ ካጨቱ ሀ ካዉተꬃቱዋፐ ደንዳና ታሙ ካተቱዋ። ሄዋፐ ጉይያን፥ ካሰ ታሙ ካተቱዋፐ ዱማትያ ሀራ ካቲ ደንዳና። እ ኡንቱንቱፐ ሄዙ ካተቱዋ ጾኒደ ሞዳና። [l] 25 እ ኡባፐ ꬎቂያ ጾሳ ቦላ ጻሊደ ሃሳያና፤ አ ጌሻቱዋካ ኡቁናና። ቃይ ዎደቱዋነ ዎጋ ላማናዉ ቃቃታናዋ። ዎዲ፥ ዎደቱነ ዎድያ ባጋይ ጋካናዉ ጌሻቱ አ ማታፐ ጋርሳና ሞደታና። [m]

26 “ ‘ሽን ሄዋፐ ጉይያን፥ ፕርዳ ፕርድያዌ ዶመታና፤ አ ማታይ ሙሊ አከታና፤ እ መꬍናዉ ꬋያና። 27 ሳሉዋፐ ጋርሳና ደእያ ካዉተꬃቱዋ ኡባ ማታይ፥ ዎልቃይነ ግታተꬃይ ኡባፐ ꬎቂያ ጾሳ ጌሻ አሳቶ እመታና። አ ካዉተꬃይካ መꬍና ካዉተꬃ ግዳናዋ፤ ሳኣ ሞድያዋንቱ ኡባቱ አዉ አዛዘታናነ አዉ ኦꬃና’ ያጌዳ። [n]

28 “ታ ሳጻባይ ሀዋን ዉሬዳ። ታን ዳኔል፥ ታ ቆፋን ዳሮ ሻባረታድ፤ ታ ሶምኢካ ሄዋ ኤርሴ። ሽን ኡባባካ ታን ታ ዎዛናን ዎꬃድ” ያጊደ ጻፌዳ።

<- ዳኔላ 6ዳኔላ 8 ->