1 ኡባ ሞድያ መꬍና ጎዳይ ታና ሀራ ሳፃ በሴዳ፤ ሄዌካ፥ ቴራይ ኩሜዳ ኬሻ። 2 እ ታና፥ “አሞጻ፥ ሀ ኔን በእያዌ አዬ?” ያጊደ ኦቼዳ።

ታን፥ “ቴራይ ኩሜዳ ኬሻ በአይ” ያጋድ።

ያትና መꬍና ጎዳይ ታዉ ሀዋዳን ያጌዳ፤ “ታ አሳ እስራኤላዉ ዉርሰꬃይ[a] ጋኬዳ፤ ሀዋፐ ስንꬃናዉ ታን ኡንቱንታ ሙረናን አꬍከ” ያጌዳ።

3 ኡባ ሞድያ መꬍና ጎዳይ ሀዋዳን ያጌ፤ “ሄ ጋላስ ካትያ ጎልያን የጽያ የꬃይ ዬኮ ላመታናዋ፤ ሀይቄዳ አሳ አሃይ ሙለ ሳኣን ዳራና፤ ቃይ ጮኡ ጊና፥ ያን ሃን ኦለታና” ያጌ።

4 ህንተኖ፥ መቶታንቻቱዋ የꬍያዋንቶ፥ ጋድያን ደእያ ህዬሳቱዋካ ꬋይሳናዉ ኮይያዋንቶ፥ ሀዋ ስስተ! 5 ህንተ ሀዋዳን ያጊታ፤ “ኑን ካꬃ ዛልአናዉ አግናይ ጼርያ ባላይ አዉደ አꬋኔ! ቃይ ኑን ኑ ዛልእያ ዶማናዉ ሳምባታይ አዉደ አꬋንዴሻ! ያትንቶ ኑን ካꬃ ጉꬃባን ማክ ማኪደ፥ ዳሮ ሚሻ አኪደ ባይዛና። ቃይ ዎርዶ ሚዛናን ልኪ ልኪደ፥ አሳ ጭማና። 6 ኑን ህዬሳ ብራን፥ መቶታንቻካ መጽ ላኡ ገድያ ጫማን ሻማና፤ ቃይ ዛርጋ ሀርቁዋ ሙሩታ ዛርጋ ጋትያን ባይዛና” ያጊታ።

7 መꬍና ጎዳይ ያቆብ ጬቀትያ ባረ ሱንꬃን ሀዋዳን ያጊደ ጫቄዳ፤ “ታን ኡንቱንቱ ኦꬄዳ ኢታ ኦሱዋ ሙለካ ዶግከ። 8 ቢታይ ቃጽያዌነ ጋድያን ደእያ አሳይ ኡባይ ዬክያዌ ሄዋ ጋሱዋና ግደኔየ? ኤ ናይለ ሻፋይ ኩንꬂደ ቃጽያዋዳን፥ ቢታ ኡባይ ቃጺደ ባልቡቀታና፤ ቃይ ሄ ኩንꬁ ዎꬍያዋዳን ዎꬋና” ያጌዳ።

9 ኡባ ሞድያ መꬍና ጎዳይ ሀዋዳን ያጌ፤ “ሄ ጋላስ ታን አዋ ሴታ ጋላስ ዉልሳና፤ ሳኣካ ጋላስ ꬉምሳና። 10 ታን ህንተ ባላ ናሸቻ ካዮ፥ ህንተ የꬃካ ዬኮ ላማና። መጽ እት ናአይ ሀይቂና ዬክያ አሳዳን፥ ህንተ ህንተ ሁጲያ ሜደቲደ ዋሩዋ ማያናዳን፥ ታን ህንተና ኦꬃና። ሄ ጋላሳ ዉርሰꬃይ ዳሮ ጫሞ ግዳናዋ” ያጌ።

11 ኡባ ሞድያ መꬍና ጎዳይ ሀዋዳን ያጌ፤ “በእተ፥ ታን ቢታ ኡባ ቦላን ኮሻ የድያ ጋላሳቱ ዪኖ። ታን ኮሻ የድያ ጋላስ፥ አሳይ ስሳናዉ መꬍና ጎዳ ቃላ ꬋዪደ ኮሻታናፐ አትና፥ ካꬃ ꬋዪደ ኮሻተና ዎይ ሃꬃ ꬋዪደ ሳመተና። 12 አሳይ አዋይ ዉልያ ባጋ አባፐ አዋይ ዶልያ ባጋ አባ ጋካናዉነ ሁጲሳፐ ገድሳ ጋካናዉ ብቻራና። ኡንቱንቱ መꬍና ጎዳ ቃላ ኮያናዉ ያነ ሃነ ዎጻና፥ ሽን ደምክኖ። 13 ሄ ጋላስ ማላ ሎኦ ዎዶራቱነ ዎዳላቱ ሳሙዋን ዚል አጋና። 14 ሳማርያ ኤቃቱዋን ጫቂያዋንቱ፥ ‘ዳና ጾሳይ ኤሮ!’ ያግያዋንቱነ፥ ‘በርሳቤሀ ጾሳይ ኤሮ’ ያግያዋንቱ ኩንዳና። ኡንቱንቱ ላኤንꬆ ሙለካ ደንድክኖ” ያጌ።

<- አሞጻ 7አሞጻ 9 ->