1 መꬍና ጎዳይ ሀዋዳን ያጌ፤ “ሞኣባ ጋድያ አሳይ ዛር ዛሪደ ኦꬄዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ ኤዶማ ጋድያ ካትያ መቀꬃ ብድንꬃ ከሳና ጋካናዉ ጹጌድኖ። [a] 2 ሄዋ ድራዉ፥ ታን ሞኣባ ጋድያን ታማ የዳና፤ ሄ ታማይ ቅርዮታ ካታማ ጌሶቱዋ ማና። ሞኣባ ጋድያ አሳይ ሻቢርሳ ግዶን፥ ኦላ ዋሱዋ ግዱዋንነ ማላካታ ፑኑዋ ግዶን ሀይቂ ዉራና። 3 ታን ሞኣባ ጋድያ ሞድያዋ ꬋይሳና፤ ቃይ ካፓቱዋ ኡባካ አናና እትፐ ዎꬋና” ያጌ መꬍና ጎዳይ።

4 መꬍና ጎዳይ ሀዋዳን ያጌ፤ “ይሁዳ ጋድያ አሳይ ዛር ዛሪደ ኦꬄዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ መꬍና ጎዳ ህግያ እጼድኖ፤ አ አዛዙዋካ ናግበይክኖ። ኡንቱንቱ አዎቱ ካሌዳ ዎርዶ ጾሳቱ ኡንቱንታካ ባለꬄድኖ። 5 ሄዋ ድራዉ፥ ታን ይሁዳ ጋድያ ቦላ ታማ የዳና፤ ሄ ታማይ የሩሳላመ ጌሶቱዋ ማና” ያጌ።

6 መꬍና ጎዳይ ሀዋዳን ያጌ፤ “እስራኤልያ አሳይ ዛር ዛሪደ ኦꬄዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ ሚሻ አካና ድራዉ፥ ጽሉዋ ዛልኢኖ፤ ቃይ ጫማ አጩዋ አካና ግሻዉካ ህዬሳ ዛልኢኖ። 7 ማንቆቱዋ ጋድያ ባናን ኩንድሲደ፥ ኡንቱንቱ ሁጲያ የꬊኖ፤ ናቀቴዳዋንቱ ፕርዳካ ጌላዪኖ። ቃይ አዉነ ናአይ ላኡ እት ምሽራቶ ዎሹምያዋን ታ ጌሻ ሱንꬃ ሎይꬅ ቱንሲኖ። 8 ኡንቱንቱ አሳፐ አጮ ኦይቄዳ ማዩዋ ያርሽያ ሳኣን ኡባ ማታን ሂጺደ፥ አን ግሲኖ፤ ቃይ አሳፐ ማቃጮ ኦꬂደ አኬዳ ዎይንያ ኤሳ ባረንቱ ጾሳ ጎልያን ኡሺኖ።

9 “ግዶፐነ፥ ዝጋዳን አዱቂደ፥ ዎላዳን ምኔዳ አሞረ ጋድያ አሳቱዋ ኡንቱንቱ ስንꬃፐ ꬋይሴዳዌ ታና። ታን ኡንቱንቶ ቦላ አይፍያናካ ጋርሳ ጻጱዋናካ ኡባ ꬋይሳድ።[b] 10 ታን ህንተና ግብጼ ጋድያፐ ከሳደ፥ ባዙዋን ኦይታሙ ላይꬃ ካለꬃድ፤ ቃይ አሞረቱ ቢታካ ህንተንቶ ላታ ኦꬃደ እማድ።

11 “ህንተ አቱማ ናናቱ ግዶፐ ትምቢትያ ኦድያዋንታ፥ ህንተ ያላጋ አሳ ግዶፐካ ባረና ጾሳዉ ዱማዬዳ ናዝራዌቱዋ ደንꬃድ። ህንተኖ፥ እስራኤልያ አሳቶ፥ ሀዌ ቱማ ግደኔ? ሀዋ ታን ጾሳይ ኦዳድ። [c] 12 ሽን ህንተ ሄ ናዝራዌቱዋ ጫቁዋ ኮልሲደ፥ ዎይንያ ኤሳ ኡሼድታ፤ ትምቢትያ ኦድያዋንታካ፥ ‘ትምቢትያ ኦዶፕተ’ ያጊደ አዛዜድታ።

13 “በእተ፥ ካꬃ ዳርሲደ ጫኔዳ ጋሪ መእያዋዳን፥ ታን ህንተና መንꬃና። 14 ፓላ ዎጽያዌ ባቃቲደ ከስ አከና፤ ምኖ ዎልቃይ እጻና፤ ኦላንቻይካ ባረ ሸምፑዋ አሸና። 15 ዎንዳፍያን ዱክያዌ ባረ ሳኣን ኤቃናዉ ዳንዳየና፤ ገድያ ኤሱካ ከስ አከና፤ ፓራዉካ ባረ ሸምፑዋ አሸና። 16 ሄ ጋላስ ሀራይ አቶ ኦላንቻቱዋ ግዶን ሎይꬅ ጻላንቻ ግያዋንቱካ ካሎ ጺራ ባቃታና” ያጌ መꬍና ጎዳይ።

<- አሞጻ 1አሞጻ 3 ->