1 ኑን ኤፈሶነ ጭማቱዋፐ ሻከቲደ፥ ቆሳ ጌተትያ ሃꬃን ዶደቶ ሳኣ ዪ አጌዶ፤ ዎንትሳ ጋላስ ሮዳ ጋኬዶ፤ ሄዋፐ ጳጽራ ቤዶ። 2 ፕንቀ ፕንያ ማርካብያ ደሚደ፥ አን ገሊደ ባናዉ ደንዴዶ። 3 ኑን ቆጲሮሳፐ በአናዉ ዳንዳይያሳ ዪደ፥ አዋይ ከስያሳ ጼልያ ዎደ ቆጲሮሳ ሀድርሳ ባጋ የጊደ፥ ሶርያ ቤዶ፤ ሄዋፐ ጉይያን ጺሮሳ ጋኬዶ፤ አያዉ ጎፐ፥ ማርካቢ ባረ ጫና ጺሮሳን ዎꬄ። 4 ያን ካልያዋንታ ደሚደ፥ ኡንቱንቱና ላፑ ጋላሳ ኡቴዶ፤ ጳዉሎስ የሩሳላመ ቤና ማላ፥ ኡንቱንቱ አዉ አያናን ኦዴድኖ። 5 ኑን ኡንቱንቱና ኡትያ ዎዲ ዉርና፥ ከሲደ ቤዶ፤ ኡንቱንቱ ኡባቱ ባረንቱ ማጫዋንቱናነ ባረንቱ ናናና እትፐ ካታማፐ ካረዉ ከሳና ጋካናዉ፥ ኑና ሞይዜድኖ፤ ኑን አባ ዶናን ጉልባቲደ፥ ጾሳ ዎሴዶ። 6 ሄዋፐ ጉይያን፥ እቱ እቱዋ ሳሮቲደ፥ ማርካብያን ገሌዶ፤ ኡንቱንቱ ባረንቱ ሶይ ስሜድኖ።

7 ኑን አባ ኦግያ ዉርሲደ፥ ጺሮሳፐ ጰጸለማይሰ ጋኬዶ፤ እሻቱዋ ሳሮቲደ፥ ኡንቱንቱ ማታን እት ጋላሳ ፔሼዶ። 8 ዎንትሳ ጋላስ ከሲደ፥ ቂሳርያ ቤዶ፤ ዎንጋላ ምሽራቹዋ ኦድያ ፕልጶሳ ሶይ ጋኪደ፥ አ ማታን ኡቴዶ፤ የሩሳላመን ዶረቴዳ ላፑናቱዋፐ እ እቱዋ። 9 ፕልጶሳዉ ናባቱዋ ግዴዳ ኦይዱ ዎዶሮ ማጫ ናናቱ ደኢኖ።

10 ኑን ኡንደኔዳ ጋላሳ ኡቴዳ ዎደ፥ ናብያ አጋቦሳ ግያ ብታኒ ይሁዳፐ ቂሳርያ ዬዳ። 11 ኑኮ ዪደ፥ ጳዉሎሳ ሳቂያ አኪደ ባረ ኩሽያነ ባረ ገድያ ቃቺደ፥ “ጌሻ አያናይ ግያዌ ሀዋ፤ ሀ ሳቂያ ጎዳ የሩሳላመን አይሁዳቱ ሀዋዳን ቃቺደ፥ አይሁዳ ግደና አሳቶ አꬂደ እማና” ያጌዳ።

12 ኑን ሄዋ ስሴዳ ዎደ፥ ኑንነ ያን ደእያ አሳቱ ጳዉሎስ የሩሳላመ ቤና ማላ ዎሴዶ። 13 ሽን ጳዉሎስ ዛሪደ፥ “ህንተንቱ ዬኪደነ ታ ዎዛና ቃረትሲደ ዋኒቴ? ታን ጎዳ የሱሳ ሱንꬃ ድራዉ ቃሸታናዋ ጻላላ ግደናን፥ ሀራይ አቶ የሩሳላመን ሀይቃናዉካ ጊጋ ኡታድ” ያጌዳ።

14 ዞርያ እ አከናን እጽና፥ “ጎዳይ ጌዳዌ ሀኖ” ያጊደ ጮኡ ጌዶ።

15 ያን አማሬዳ ዎድያ ጋምኤዳዋፐ ጉይያን፥ ጊገቲደ የሩሳላመ ባናዉ ከሴዳ። 16 ቂሳርያን ደእያ ካልያዋንቱፐ አማሬዳዋንቱ ቃይ ኑናና ቤድኖ፤ ኡንቱንቱ ኑን አቃናሳ ምናሶና ግያ ቆጲሮሳ ብታንያ ሶይ ኑና አፌድኖ፤ ምናሶን ዳሮ ዎድያፐ ዶሚደ ካልያዋ።

17 ኑን የሩሳላመ ጋኬዳ ዎደ፥ እሻቱ ኑና ናሸቻን ሞኬድኖ። 18 ዎንትሳ ጋላስ፥ ጳዉሎስነ ኑን ያቆባና ጋከታናዉ ቤዶ። ዎሳ ጎለ ጭማቱ ኡባቱካ ደኢኖ። 19 ጳዉሎስ ኡንቱንታ ሳሮቴዳዋፐ ጉይያን፥ አይሁዳ ግደና አሳ ግዶን ባረ ባጋና ጾሳይ ኦꬄዳዋ ኡንቱንቶ ዉርሲደ ኦዴዳ።

20 ኡንቱንቱ ሄዋ ስሴዳ ዎደ ጾሳ ጋላቲደ፥ ጳዉሎሳ ሀዋዳን ያጌድኖ፤ “ኑ እሻዉ፥ አይሁዳቱዋ ግዶን ጾሳ አማኔዳዋንቱፐ አፑን ሻአይ ደኢኖንቶ በኣሳ፤ ኡንቱንቱ ኡባይ ህግያ ምንስ ናጊኖ። 21 የሩሳላመ አይሁዳቱ፥ አይሁዳ ግደናዋንቱ ጋድያን ደእያ አይሁዳ ኡባቱ ባረንቱ ናና ቃጻረና ማላ፥ ዎይ አይሁዳቱ ኦꬅያዋ ካለና ማላ፥ ሙሴ ህግያካ ባይዛና ማላ ኔን ታማርስያዋ ስሴድኖ። 22 ያትና፥ አዬ ሎኡ? ኔን ዬዳዋ ጮራቱ ስስያ ድራዉ፥ ሺቀናን አግክኖ።

23 “ሄዋ ድራዉ፥ ሀዋ ኑን ነዉ ኦድያዋ ኦꬃ፤ እትፐ ሺቁ ደእያ ኦይዱ አሳቱ ኑ ማታን ደኢኖ። [a] 24 ኡንቱንታ አካደ ኡንቱንቱና ጌያ፤ ቃይ ኡንቱንቱ ባረንቱ ሁጲያ ሜደታና ማላ፥ ኡንቱንቶ ሚሻ እማ፤ ኡንቱንቱ ኡባይ ነዋ ሲሴዳዌ ቱማ ግደናዋነ ኔን ነ ሁጰዉካ ቃይ ሙሴ ህግያ ናጋደ ማራን ደእያዋ ኤራና።

25 “ሽን አማኔዳ አይሁዳ ግደና አሳቱዋ ግዶፐ፥ ኡንቱንቱ ኤቃዉ ያርሼዳዋ ሜና ማላነ ሱꬃ ኡሸና ማላ፥ ባኩቴዳ መህያ አሹዋ ሜና ማላነ ዎሹመና ማላ፥ ኑን የዉዋ ቃቺደ፥ ኡንቱንቶ ዳብዳቢያ ጻፌዶ” ያጌድኖ።

26 ሄዋፐ ጉይያን፥ ጳዉሎስ ዎንትሳ ጋላስ አሳቱዋ አኪደ፥ ኡንቱንቱና ጌዬዳ፤ እ ባረንታ ጌሹሳ አዉደ ፖልንቶ ኤርሳናዉነ ቃይ ያርሹዋ ሁጲያን ሁጲያን አዉደ እማነንቶ ኤርሳናዉ ጌሻ ጎልያ ገሌዳ።

27-28 ላፑ ጋላሳይ ዉራና ሀኖደ፥ ኢስያፐ ዬዳ አይሁዳቱ ጌሻ ጎልያን ጳዉሎሳ በኢደ፥ አሳ ኡባ ሀንቀꬂደ፥ “እስራኤልያ አሳዉ፥ ኑና ማድተ፤ እስራኤልያ አሳ፥ ሙሴ ህግያነ ሀ ጌሻ ጎልያ እጺደ፥ ኡባ ሳን አሳ ኡባ ታማርስያዌ ሀ ብታንያ፤ ጉጂደ ቃይ ግሪከ አሳካ ጌሻ ጎልያ ገልሲደ፥ ሀ ጌሻ ሳኣ ቱንሴዳ” ያግ ዋሲደ፥ ጳዉሎሳ ኦይቄድኖ። 29 ኡንቱንቱ ካሰ ኤፈሶነን ደእያ ጽሮፍሞሳ ጳዉሎሳና ካታማን በኤዳ ድራዉ፥ ጌሻ ጎልያ ጳዉሎስ አ ገልሴዳዋ ኡንቱንቶ ማላቴዳ።

30 ካታማ ኡባይ ሻቢረቴዳ፤ አሳይ ኡባይ ሺቂደ ጳዉሎሳ ኦይቂደ፥ ጌሻ ጎልያፐ ካረዉ ጎች ከሴዳ፤ ሄ ማንእያን ጌሻ ጎልያ ፐንገቱ ቃሸት አጌድኖ። 31 አሳይ ጳዉሎሳ ዎꬋና ሀንሽን፥ “የሩሳላመ ካታማይ ሙለካ ሻቢረት ድጌዳ” ግያ ሃሳያይ ሮመ ጋድያ ኦላ ካፖ ጋኬዳ። 32 ሄ ኦላ ካፑ ዎታዳራቱዋነ ጼታቱዋ ካፓቱዋ እትፐ አኪደ፥ ዎጺደ አሳ ቦላ ከስ ዎꬌዳ፤ አሳይ ኦላ ካፑዋነ ዎታዳራቱዋ በኤዳ ዎደ፥ ጳዉሎሳ ሾጭያዋ ባሽ አጌዳ።

33 ሄ ዎደ፥ ሄ ኦላ ካፑ ሺቅ፥ ጳዉሎሳ ኦይቂደ፥ ላኡ ሳንꬃላታን ቃሸታና ማላ አዛዚደ፥ እ ኦነንቶነ ቃይ አያ ኦꬄደንቶነ አሳ ኦቼዳ። 34 አሳፐ ባጋይ እትባዉ ዋስያ ዎደ፥ ባጋይ ሀራባዉ ዋሴ፤ ዋሱ ጮሬዳ ድራዉ፥ ኦላ ካፖ ቱሙዋ ኤራናዉ ዳንዳየተናን እጽና፥ ዎታዳራቱ ጳዉሎሳ ባረንቱ ደኢያሳ አፋና ማላ፥ ኡንቱንታ አዛዜዳ። 35 የꬊደ ከስያ ደꬃ ጳዉሎስ ጋኬዳ ዎደ፥ አሳ ሱገꬃ ድራዉ፥ ዎታዳራቱ አ ቶኬድኖ። 36 አያዉ ጎፐ፥ ጮራ አሳይ፥ “አ ዎꬋ!” ያጊድነ ዋሲደ ካሌ።

37 ዎታዳራቱ ጳዉሎሳ ባረንቱ ደኢያሳ አፋና ሀንሽን ጳዉሎስ ኦላ ካፑዋ፥ “ታን ነዉ እትባ ኦዶ?” ያጌዳ።

ሄ ኦላ ካፑ ጳዉሎሳ፥ “ኔን ግሪከ ቃላ ኤራይ? 38 ኔን ሀዋፐ ካሰ ዎደ፥ ዋላሳ ከሳደ ሸምፑዋ ዎꬌዳዋንቱፐ ኦይዱ ሻአ አሳቱዋ አሳይ ባይና መላ ሳኣ ካለꬄዳ ግብጼ ብታንያ ግድኪ?” ያጌዳ።

39 ሽን ጳዉሎስ፥ “ታን አይሁዳ አሳ፤ ቃይ ክልቂያን ደእያ ጸርሴሰን የለቴዳ ሁጰ ካታማን ደእያ አሳ። ሀያና ታና አሳዉ ሃሳይሳርኪ?” ያጌዳ።

40 ኦላ ካፑ አ፥ “ሃሳያ” ያግና፥ ጳዉሎስ የꬊደ ከስያ ደꬃን ኤቂደ፥ አሳይ ጮኡ ጋና ማላ፥ ባረ ኩሽያን አሳኮ ጾርሴዳ። አሳይ ጮኡ ጊና፥ እብራይስጸ ቃላን ሃሳዪደ፥ ሀዋዳን ያጌዳ።

<- ኪቴዳዋንቱ ኦሱዋ 20ኪቴዳዋንቱ ኦሱዋ 22 ->