1 ዳዊተ ባረ አሳቱዋ ኡባ እትፐ ሺሺደ ሻላቃቱዋነ ጼቱዋ ካፓቱዋ ኡንቱንቱ ቦላ ሱንꬄዳ። 2 ዳዊተ አሳ ሄዙ ጩጉዋን ሻኬዳ፤ እት ጩጉዋ እዮኣበ አዛዜዳ፤ ላኤንꬆ ጩጉዋ እዮኣባ እሻይ፥ ጻሩይ ናአይ አብሻይ አዛዜዳ፤ ሄዘንꬆ ጩጉዋ ቃይ ጋትያ እታይ አዛዜዳ። ካቲ አሳ፥ “ታን ታ ሁጲያዉካ ህንተናና እትፐ ባና” ያጌዳ።

3 ሽን አሳይ አ፥ “ኔን ባናዉ በሰና! ኑን ባቃትንቶነ፥ ኡንቱንቱ ኑባ ኮይክኖ፤ ሀራይ አቶ ኑን ባጋይ ሀይቂንቶነ፥ ኑባ ኡንቱንቱ ጉዳ ጊክኖ። ሽን ኔን ኑፐ ታሙ ሻአቱዋፐ ዳራሳ፤ ሄዋ ድራዉ፥ ኔን ካታማን ኡታደ፥ ኑዉ ማዱዋ ኪቶፐ ሎአ” ያጌዳ።

4 ካቲ ኡንቱንታ፥ “ህንተና ሎኤዳባ ታን ኦꬃና” ያጌዳ።

ዳዊተ ድርሳ ፐንግያን ኤቂደእሽን፥ አሳይ ኡባይ ጼቱ ጼቱ፥ ሻአይ ሻአይ ባረ ጩጉዋን ጩጉዋን ሳልፒደ ከሴዳ። 5 ያትና፥ ካቲ እዮኣባ አብሻያነ እታያ፥ “ታ ድራዉ ጊደ፥ ሄ ያላጋ ብታንያ አበሰሎማ ቆሆፕተ” ያጊደ አዛዜዳ። ካቲ አበሰሎማባ ጋዳዋቱ ኡባዉ ኦድያ ዎደ፥ ኦላንቻቱ ኡባይ ስሴድኖ።

6 ዳዊታ ኦላንቻቱ እስራኤላቱዋና ኦለታናዉ ጋጻርያን ሳልፔድኖ፤ ኦላ ሳአይ ኤፍሬማ ዎራና። 7 ሄ ሳኣን ዳዊታ ኦላንቻቱ እስራኤልያ ኦላንቻቱዋ ጾኔድኖ፤ ሄ ጋላስ ሎይꬅ ዳሮ አሳይ፥ ላታሙ ሻአ አሳይ ሀይቄዳ። 8 ኦላይ ጋጻርያ ኡባ ጋኬዳ፤ ሄ ጋላስ ዎራይ ዉርሴዳ አሳይ ማሻይ ዉርሴዳ አሳፐ ዳራ።

9 አበሴሎም አኬከናን ደኢደ ዳዊታ አሳቱዋና ጋከቴዳ፤ አበሴሎም ባረ ባቁሉዋ ቶጊደ፥ ዳሮ ዳሻይ ደእያ ዎላ ጋርሳ ባቁሉ ገሌዳ፤ አበሰሎማ ሁጲ ዎላ ባላን ኦይቀቴዳ። አበሴሎም ሳኣፐነ ሳሉዋፐ ግዱዋን ካቀት ደእሽን፥ እ ቶጌዳ ባቁሉ ስንꬃዉ ብ አጌዳ። 10 አሳፐ እቱ ሄዋ በኢደ እዮኣባ፥ “በአ! አበሴሎም እት ዎላ ቦላ ካቀቴዳዋ ታን በኣድ” ያጊደ ኦዴዳ።

11 እዮኣበ ባረዉ ኦዴዳ ብታንያ፥ “ሄ? በኣድ ጋይ? አያዉ ቢታዉ ዱገ ሾጫበይኪ? ኔን ሾጬዳዋ ግድንቶ፥ ታን ነዉ ታሙ ጻጋራ ብራነ እት ሳቂያ እማናዋ ሽን” ያጌዳ።

12 ብታኒ፥ “ኔን ሻአ ጻጋራ ብራ ታ ኩሽያን ዎꬅንቶካ፥ ታን ካትያ ናኣ ቦላ ታ ኩሽያ ደንꬅከ! ኑን ኡባይ ስስሽን፥ ካቲ ኔናነ አብሻያ እታያ፥ ‘ታ ድራዉ ጊደ፥ ያላጋ ብታንያ አበሰሎማ አሽተ’ ያጊደ አዛዜዳ። 13 ታን ካትያ አዛዙዋ ሻራደ አበሰሎማ ዎꬌዳዋ ግድንቶ፥ ካቲ ኡባባ ስስያዋዳን ሄዋካ ስሳናዌ አተና። ኔን ሄ ዎደ ታፐ ሃኩዋን ኤቃና” ያጌዳ።

14 እዮኣበ አ፥ “ታን ኔናና ሀዋዳን ጋምእከ” ያጌዳ፤ ሄዙ ቶራ ባረ ኩሽያን አኪደ፥ አበሴሎም ዎላን ካቀቲደ ፓጻ ደእያዋ ዎዛና አይፍያን ጫዴዳ። 15 እዮኣባ ኦላ ሚሻ ቶክያ ታማቱ አበሰሎማ ዶዲደ፥ ሾጭ ዎꬌድኖ።

16 ሄዋፐ ጉይያን፥ እዮኣበ ኦላ ኤሳናዉ ማላካታ ፑኔዳ፤ አሳይ እስራኤላቱዋ የደርስያዋ አጌዳ። 17 ኡንቱንቱ አበሰሎማ አክ አፊደ፥ ዎራን ደእያ ዎልቃማ ኦላ ግዶን የጊደ፥ ዳሮ ሹቻ አ ቦላ ዶሬድኖ። ሄ ዎደ እስራኤልያ አሳይ ኡባይ ባረ ሶ ባረ ሶ ባቃቴዳ።

18 አበሴሎም ፓጻ ደኢደ፥ “ታ ሱንꬃ ሀሳይስያ ናእ ታዉ ባዋ” ያጊደ፥ ባረና ሀሳይስያ ሹቻ ማሴዳ ቱሳ ካትያ ሀዉልትያ ኤሴዳ፤ ሄ ቱሳ ባረ ሱንꬃን ጼሴዳ። ሀቼ ጋካናዉ፥ ሄ ቱሳይ “አበሰሎማ ቱሳ” ጌተቴ።

19 ሄዋፐ ጉይያን፥ ጻዶቃ ናኣ አህማኣጽ እዮኣባ፥ “አ ሞርከቱዋ ኩሽያፐ መꬍና ጎዳይ አ አሼዳ ምሽራቹዋ ስሳናዉ፥ ታን ካትያኮ ዎጻ ባደ ኦዳይ” ያጌዳ።

20 እዮኣበ አህማኣጻ፥ “ቱይት! ሀቼ ኔን ምሽራቹዋ ኦድያ ጋላሳ ግደና፤ ሀራ ጋላስ ኦዳናዉ ዳንዳያሳ። ካትያ ናአይ ሀቼ ሀይቄዳ ድራዉ፥ ኔን ሀቼ ኦዳናዉ ኮሸና” ያጌዳ።

21 እዮኣበ ቶጵያ አሳ ግድያ እት ብታንያ ጼሲደ፥ “ባ፤ ኔን በኤዳዋ ካትያዉ ኦዳ” ያጌዳ፤ ሄ ብታኒ እዮኣባዉ ጎይኒደ ዎጼዳ።

22 ጻዶቃ ናአይ አህማኣጽ ላኤንꬁዋ እዮኣባ፥ “አይነ ሀኖ፤ ታን ሀ ቶጵያ ብታንያ ጌዱዋ ዎጻይ” ያጌዳ።

እዮኣበ፥ “ታ ናአዉ፥ ነዉ ዎይታ አህያ ኦዱ ባይናሽን፥ ኔን አያዉ ዎጻናዉ ኮያይ?” ያጌዳ።

23 አህማኣጽ እዮኣባ፥ “አይነ ሀኖ፤ ታን ዎጻናዉ ኮያድ” ያጌዳ።

እዮኣበ አ፥ “ያኖፐ ዎጻ” ያጌዳ። ሄዋ ድራዉ፥ አህማኣጽ ደምባ ኦግያ ኦይቂደ ዎጼዳ፤ ቶጵያ ብታንያ የጊደ አꬌዳ።

24 ግምቢያ ፐንግያዉ ካረ ዶየትያ ሳንቃፐነ ሶ ዶየትያ ሳንቃፐ ግዱዋን አኮ ሳኣን ዳዊተ ኡት ደእሽን፥ ናግያ ብታኒ ግምቢያና ኦይቀቴዳ ፐንግያ ጼራ ሁጲያ ፑደ ከሴዳ፤ ጼሊደ፥ እት ብታኒ ባረካ ዎጽያዋ በኤዳ። 25 ናግያ ብታኒ ካትያ ጼሲደ ኦዴዳ።

ካቲ፥ “እ ባረካ ደኦፐ፥ ምሽራቹዋ አኪደ ዬ” ያጌዳ። ዎጽያ ብታኒ ኡንቱንቱኮ ማቲደ ዬዳ።

26 ናግያዌ ሀራ አስካ ዎጽያዋ በኤዳ፤ ፐንግያ ናግያ ብታንያ፥ “በአ! ሀራ ብታኒካ ባረካ ዎጼ” ያጌዳ።

ካቲ፥ “ሀ ብታኒካ ቃይ ምሽራቹዋ አኪደ ዬ” ያጌዳ።

27 ናግያዌ፥ “ኮይሮ ብታንያ ዎꬃይ ጻዶቃ ናኣ አህማኣጻ ዎꬃ ታዉ ማላቴ” ያጌዳ።

ካቲ፥ “እ ሎኦ አሳ፤ እ ሎኦ ኦዱዋና ዬ” ያጌዳ።

28 አህማኣጽ ካትያ ጼሲደ፥ “ኡባባይካ ሎኦ!” ያጌዳ። ካትያ ስንꬃን ግስ ጉፋኒደ፥ “ታ ጎዳ ካትያ ቦላ ባረንቱ ኩሽያ ደንꬄዳ አሳቱዋ ነዉ አꬂደ እሜዳ መꬍና ጎዳይ ነ ጾሳይ ጋላተቶ” ያጌዳ።

29 ካቲ፥ “ያላጋ ብታኒ አበሴሎም ሳሬ?” ያጊደ ኦቼዳ።

አህማኣጽ፥ “እዮኣበ ታና ኪታና ሀንያ ዎደ፥ ዎልቃማ ጉሩባይ ደእያዋ በኣድ፤ ሽን እ አዬንቶነ ታን ኤራበይከ” ያጌዳ።

30 ካቲ አ፥ “ያ ሺቃ ኤአ” ያጌዳ፤ እ ያቶፐ ሺቂደ ኤቄዳ።

31 ሄዋፐ ጉይያን፥ ቶጵያ ብታኒ ጋኪደ ካትያዉ፥ “ታ ጎዳዉ ካትያዉ፥ ምሽራቹዋ! ነ ቦላ ደንዴዳዋንቱ ኡባ ኩሽያፐ መꬍና ጎዳይ ሀቼ ኔና አሼዳ” ያጌዳ።

32 ካቲ ቶጵያ ብታንያ፥ “ያላጋ ብታኒ አበሴሎም ሳሬ?” ያጊደ ኦቼዳ።

ቶጵያ ብታኒ ካትያ፥ “ታ ጎዳዉ ካትያዉ፥ ነ ሞርከቱነ ነ ቦላ ኢታባ ኦꬃናዉ ደንድያዋንቱ ኡባቱ ሄ ያላጋ ብታንያዳን ሀንኖ” ያጌዳ።

33 ካቲ ዳሮፐ ካዮቴዳ፤ ግምቢያ ፐንግያ ሁጲያን ደእያ ጎልያ ገሊደ ዬኬዳ፤ ካቲ ቢደ፥ “አየ ታ ናአዉ አበሰሎማ! ታ ናአዉ! ታ ናአዉ አበሰሎማ! ነ ድራዉ ታን ሀይቃርክታሻ! አየ ታ ናአዉ አበሰሎማ! ታ ናአዉ!” ያጊደ ዬኬዳ።

<- 2 ሳሜላ 172 ሳሜላ 19 ->