1 ጬቀትያዌ ታዉ አይነ ጎኤናዋ ግዶፐካ፥ ታን ጬቀታናዉ በሴ። ሽን ታን ሳጻባነ ጎዳፐ ቆንጬዳዋ ሃሳያና። 2 ታማነ ኦይዱ ላይꬃፐ ካሰ፥ ሄዘንꬆ ሳሉዋ ፑደ ቤዳ እት ብታንያ፥ ክርስቶሳ አማንያዋ፥ ታን ኤራይ፤ ሄ ብታኒ ባረ አሳተꬃን ቤዴ ዎይ ሳጻን ቤደንቶ፥ ታን ኤርከ፤ ጾሳይ ኤሬ። 3 ሄ ብታንያ፥ ሄዘንꬆ ሳሉዋ ፑደ ቤዳዋ፥ ኤራይ፤ እ ባረ አሳተꬃን ቤደንቶነ ዎይ ሳጻን ቤደንቶ፥ ታን ኤርከ፤ ጾሳይ ኤሬ። 4 ሄዋን ሄ ብታኒ አሳይ ሃሳያናዉ ዳንዳየናዋ፥ አሳ እንጻርሳይካ ሃሳያናዉ ዳንዳየናዋ ስሴዳ። 5 ታን ሄ ብታንያባን ጬቀታና፤ ሽን ታን ዳቡራንቻ ግድያዋ ኤርስያ ድራዉ፥ ታ ሁጲያን ጬቀትከ። 6 ታን ጬቀታናዉ ኮይያዋ ግዶፐካ ኤያ ግድከ፤ አያዉ ጎፐ፥ ታን ቱሙዋ ሃሳያይ። ሽን አሳይ ታዋ ታናን በእያዋፐነ ታፐ ስስያዋፐ አꬂደ ቆፐና ማላ ናገታይ።

7 ቃይ ጾሳይ ታዉ ዳሮ ቆንጬዳ ዎልቃማ የዉዋፐ ደንዴዳዋን ኦቶረተናዳን ድጋናዉ ታና ጫድ ኦይቂያ፥ ሴጻና ኪታንቻይ፥ ታና መቶꬃናዉነ ታን ኦቶረተና ማላ፥ ታና ናጋናዉ ታዉ እመቴዳ። 8 ሄዋ ታፐ ሻካና ማላ፥ ታን ጎዳ ሄዙ ገደ ዎሳድ። 9 ጎዳይ ታና፥ “ታ አꬎ ኬካተꬃይ ነዉ ግዳናዋ፤ አያዉ ጎፐ፥ ታ ዎልቃይ ነ ዳቡራን ፖለቴ” ያጌዳ፤ ሄዋ ድራዉ፥ ክርስቶሳ ዎልቃይ ታናን ደአና ማላ፥ ታ ዳቡራን ጬቀታናዉ ታን ዳሮ ናሸታይ። 10 ታን ክርስቶሳ ድራዉ ዳቡርያዋን፥ አሳን ቦረትያዋን፥ ዋየትያዋን፥ የደርሰትያዋን፥ መቶትያዋን ናሸታይ፤ አያዉ ጎፐ፥ ታን ዳቡርያ ዎደ፥ ሄ ዎደ ምናይ።

11 ታን ጬቀቴዳዋን ኤያድ፤ ሽን ሄዋ ህንተ ታና ዎልቃን ኦስሴድታ፤ አያዉ ጎፐ፥ ህንተ ታና ጋላታናዉ በሴ፤ ታን አያንነ ኤረተናን ꬋዮፐካ፥ የሱስ ኪቴዳ ꬎቃ ጌተቴዳ ኡባቱዋፐ ላፍከ። 12 ታና የሱስ ኪቴዳዌ ቱማ ግድያዋ ኤርስያ ማላይ፥ ኦራꬃባይነ ዎልቃማ ኦሱ ህንተ ግዶን ዳሮ ገንጫን ኦሰቴዳ። 13 ታን ታ ሁጲያን ህንተና ዋይሳቤናዋፐ አትን፥ ሀራ አማንያ አሳቱዋፐ ህንተ አያን ላፊቴ? ሀያና ታን ህንተና ናቄዳዋ ታዉ አቶ ጊተ።

14 ታን ህንተኮ ባናዉ ጊጎደፐ፥ ሀዌ ታዉ ሄዘንꬆ ዎደ፤ ታን ህንተና ዋይስከ። ታን ህንተና ኮይያዋፐ አትን፥ ህንተ ሚሻ ኮይከ፤ አያዉ ጎፐ፥ አዉነ አታ ባረንቱ ናናዉ ሚሻ ምንጅያዋፐ አትን፥ ናናይ ባረንቱ አዎነ አትዉ ምንጅክኖ። 15 ታን ህንተ ሸምፖ ታዉ ደእያዋ ታናና ጋꬃደ ናሸቻን እማና፤ ያትና፥ ታን ህንተና ሎይꬃ ሲቅያ ድራዉ፥ ህንተ ታና ላፋ ሲቂቴ?

16 ግዶፐካ፥ ታን ህንተና ዋይሳበይከ፤ ሽን ህንተ ታና፥ “ኔን ኑና ጭማደ ማካላን ኦይቃዳ” ያጋንታ። 17 ታን ሀራይ አቶ፥ ህንተኮ ኪቴዳ እት አሳ ባጋናካ ህንተፐ ጎኤታድታ? 18 ቲቶ ህንተኮ ባና ማላ፥ ታን ዎሳድ፤ ቃይ አማንያ እሻካ አናና የዳድ። ቲቶ ህንተፐ ጎኤቴዴ? ኑን ኑ ኦሱዋ እት ቆፋን ኦꬅበይኮ? ቃይ ኑ ሀኑካ እቱዋ ግደኔዬ?

19 ኑን ኡባ ዎደካ ህንተ ስንꬃን ኑ ሁጰዉ ሞተትያዋ ህንተንቶ ማላቲ? ኑን ክርስቶሳን ደእያዋንቱዳን፥ ጾሳ ስንꬃን ሀእ ጋካናስካ ሃሳዬቶ። ኑ ሲቃቶ፥ ኑን ኦꬅያ ኡባባይካ ህንተና ማዳናሳ። 20 አያዉ ጎፐ፥ ታን ህንተኮ ብያ ዎደ፥ ኦን ኤር ታን ኮይያዋ ማላ ህንተ ግደናን አጋነንቶነ፤ ቃይ ታንካ ህንተ ኮይያዋ ማላ ግደናን አጋነንቶነ። ቃይ ኦን ኤር ሄዋን ፓሉሚ፥ ቃናቲ፥ ሀንቁ፥ ዮራይ፥ ዝግርሳይ፥ ሳሮተꬃ ድጉሳይ፥ ኦቶሩ፥ መቱ ደኤናን ዋዪ አጋና፤ ታና ያሼ። 21 ታን ህንተኮ ላኤንꬁዋ ብያ ዎደ፥ ታ ጾሳይ ህንተ ስንꬃን ታና ካዉሻነንቶነ ያያይ፤ ታን ናጋራ ካሰ ኦꬂደ፥ ባረንቱ ኦꬄዳ ቱናተꬃፐ፥ ዎሹምያዋፐነ አሙዋፐ ስምቤና ዳሮ አሳቶ ዬከናን አግከ ጋደ ያያይ።

<- 2 ቆሮንቶሳ 112 ቆሮንቶሳ 13 ->