1 አሳ ናአይ ዮሳፌጸ አ ኮታን ካተቴዳ፤ ዮሳፌጸ እስራኤልያ ኦላናዉ ባረና ምንሴዳ። 2 ግምበት ኡቴዳ ይሁዳ ካታማቱዋ ኡባን ኦላንቻቱዋ ዎꬄዳ፤ ቃይ ይሁዳ ቢታንነ አ አዉ አሳይ ኦሞዴዳ ኤፍሬማ ጋድያ ካታማቱዋን ኦላንቻቱ ጌሱዋ መꬌዳ።

3-4 መꬍና ጎዳይ ዮሳፌጻ አንጄዳ፤ አያዉ ጎፐ፥ አ አዉ ኮይሮ ካትያ ግዴዳ ዎደ፥ ጾሳዉ አማነቴዳዋዳን፥ እካ አማነቴዳ። ባኣላ ኤቃ ምስልያዉ ጎይነናን እጼዳ። ዮሳፌጸ ባረ አዉዋ ኦግያን ሀመቲደ፥ ጾሳ አዛዙዋ ፖሌዳ። እ እስራኤልያ ካተቱ ኦꬄዳ ኢታ ኪታ ኦꬅቤና። 5 ሄዋ ድራዉ፥ መꬍና ጎዳይ አ ይሁዳ ካዉተꬃን ሎይꬅ ኤሴዳ። ይሁዳ አሳይ ኡባይ ዮሳፌጻዉ እሙዋ አሄድኖ፤ ያትና፥ እ ሎይꬅ ዱረቴዳነ ቦንቼቴዳ። 6 ዮሳፌጸ መꬍና ጎዳዉ ዎዛናፐ ኦꬅያ አሳ ግዴዳ። ሄዋ ቦላንካ ጎይንያ ꬎቃ ሳአቱዋነ አሼሮ ግያ ጾሳት ኤቃ ምስለቱዋ ይሁዳ ጋድያፐ ꬋይሴዳ።

7 ዮሳፌጸ ባረ ካተቴዳ ሄዘንꬆ ላይꬅ ይሁዳ ካታማቱዋን ታማርሳናዳን ባረ ኦሳንቻቱዋ በንሀይላ፥ ኦባድያ፥ ዛካራሳ ናታንኤላነ ምካያ ኪቴዳ። 8 ቃይ ኡንቱንቱና እትፐ ሌዋቱዋ ሻማእያ፥ ናታንያ፥ ዛባድያ፥ አሳሄላ፥ ሻምራሞታ፥ ዮናታና፥ አዶንያ፥ ጾቢያነ ጾባዶንያ የዴዳ፤ ቃይካ ቄሳቱ ዋ ኤልሻማአነ ዮራማ ኡንቱንቱና እትፐ ኪቴዳ። 9 ኡንቱንቱ ኡባይ መꬍና ጎዳ ህግያ ማጻፋ ባረናና አኪደ፥ ይሁዳ ቢታን ደእያ ካታማቱዋ ኡባ ቢደ፥ ያን አሳ ታማርሴድኖ።

10 ይሁዳ ቢታ ዩሹዋን ደእያ ካዉተꬃቱዋ ኡባ መꬍና ጎዳይ ያሽስና፥ ኡንቱንቱ ዮሳፌጻና ኦለትበይክኖ። 11 ፕልስጼማ አሳቱዋፐ አማሬዳዋንቱ እሙዋነ ብራ ጊራ ዮሳፌጻዉ አሄድኖ፤ ቃይ አራባቱካ አዉ ላፑን ሻአነ ላፑን ጼቱ ዶርሳ ኦርገቱዋነ ላፑን ሻአነ ላፑን ጼቱ ዴሻ ኦርገቱዋ አሄድኖ። 12 ሄዋ ድራዉ፥ ዮሳፌጸ ሎይꬅ ምን ምን ቤዳ። እ ይሁዳን ጌሶቱዋነ ምንጅያዋ ዎꬅያ ካታማቱዋ ኬጼዳ። 13 እ ሄ ካታማቱዋን ዳሮባ ምንጄዳ።

የሩሳላመን አዉ ምኖ ኦላንቻቱ ደኢኖ። 14 ኡንቱንቱ ባረንቱ አዎቱዋ ጎለን ጎለን ሀዋፐ ካሊደ ጻፈቴድኖ። ይሁዳ ዛርያፐ ሻላቃይ አድናሀ፤ አናና 300,000 ምኖ ኦላንቻቱ ደኢኖ።

15 አድናሀ ካሊደ ደእያ ካፑ ዮሀናና፤ አናና 280,000 ምኖ ኦላንቻቱ ደኢኖ።

16 መꬍና ጎዳዉ ባረ ሸንያን ከሴዳ አማሳይ አ ካሊደ ደእያ ሄዘንꬆ ካፑዋ፤ እ ዚክራ ናኣ። አማሳያና 200,000 ምኖ ኦላንቻቱ ደኢኖ።

17 ቢንያማ ዛርያፐ ካፑ ምኖ ኦላንቻ ኤልያዳአ፤ አናና ዎንዳፍያነ ጎንዳልያ ኦይቂያ 200,000 ኦላንቻቱ ደኢኖ።

18 ኤልያዳአ ካሊደ ደእያ ካፑ ይሆዛባዳ፤ አናና ኦላ ባናዉ ዳንጬዳ 180,000 ኦላንቻቱ ደኢኖ።

19 ሀ ኡባ ኦላንቻቱ ካትያዉ የሩሳላመን ኦꬄዳዋንታ፤ ሀዋንቱ ፓይዱ ይሁዳን ደእያ ግምበቴዳ ካታማቱዋን ኡባን ካቲ ዎꬄዳ ኦላንቻቱዋ ጉጀና።

<- 2 ኦዱዋ 162 ኦዱዋ 18 ->