1 ናአይ ሳመል ኤልያፐ ጋርሳና መꬍና ጎዳዉ ኦꬄ፤ መꬍና ጎዳ ቃላይ ሄ ዎደ ሎይꬅ አልአ፤ ሳጻይነ ዳረና። 2 አይፊ ጼላናዉ ለፕና፥ ዋየት ጼልያ ኤል እት ጋላስ ቃማ ባረ ሳኣን ግሴዳ። 3 ሄ ዎደ ጾሳ ጾምፒ ብሮ ቶእቤና፤ ቃይ ጾሳ ታቦታይ ደእያ መꬍና ጎዳ ጎለን ሳመል ገምእሼ። 4 መꬍና ጎዳይ ሳመላ ጼሴዳ፤ ሳሜል፥ “አቤ!” ጊደ ኮዬዳ። 5 ኤልያኮ ዎጽ ቢደ፥ “ኔን ጼስና ሄኮ ያድ” ያጌዳ።

ሽን ኤል፥ “ታን ኔና ጼሳበይከ፤ ባደ ግሳ” ያጌዳ፤ ሳመል ቢደ ግሴዳ።

6 ቃይካ መꬍና ጎዳይ፥ “ሳመላ” ያጊደ ላኤንꬁዋ ጼሴዳ፤ ሳሜል ደንዲደ፥ ኤልያኮ ቢደ፥ “ኔን ጼስና ሄኮ ያድ” ያጌዳ።

ሽን ኤል፥ “ታ ናአዉ፥ ታን ኔና ጼሳበይከ፤ ባደ ግሳ” ያጌዳ።

7 ሳመል ሄዌ መꬍና ጎዳ ግድያዋ ኤርቤና፤ አያዉ ጎፐ፥ መꬍና ጎዳ ቃላይ ብሮ አዉ ቆንጭቤና። 8 መꬍና ጎዳይ ሳመላ ሄዘንꬁዋ ጼስና ደንዲደ፥ ኤልያኮ ቢደ፥ “ኔን ጼስና ሄኮ ያድ” ያጌዳ።

ሄዋን መꬍና ጎዳይ ናኣ ጼስያዋ ኤል አኬኬዳ፤ 9 “ባደ ግሳ፤ እ ኔና ጼስያዋ ግዶፐ፥ መꬍና ጎዳዉ፥ ኦዳ፤ ታን ነ ቆማይ ስሳይ ያጋ” ያጊደ ኦዴዳ፤ ሳመል ባረ ሳኣ ቢደ ግሴዳ።

10 ሄዋፐ ጉይያን፥ መꬍና ጎዳይ ዪደ ሄዋን ኤቂደ ካሰዋዳን፥ “ሳመላ፥ ሳመላ” ያጊደ ጼሴዳ።

ሳመል፥ “ኦዳ፤ ታን ነ ቆማይ ስሳይ” ያጌዳ።

11 መꬍና ጎዳይ ሳመላ፥ “በአ! ስስያ አሳ ኡባዉ ሀይꬃዉ ኢትያ እትባ እስራኤልያ ቦላ ታን ኦꬃና ሀናይ። 12 ታን ኤልያ ሶይ አሳ ቦላ ሃሳዬዳ ኡባባ ሄ ጋላሳን ኮይሩዋፐ ዉርሰꬃ ጋካናዉ ኤልያ ቦላ አሀና። 13 ኤል ኤሬዳ ናጋራ ድራዉ፥ ታን አ ሶይ አሳ ቦላ መꬍናዉ ፕርዳናዋ አዉ ኦዳ ዎꬃድ፤ አያዉ ጎፐ፥ አ ናናይ ሸቅስያባ ኦꬅያ ዎደ፥ እ ኡንቱንታ ሴርቤና። 14 ሄዋ ድራዉ፥ ‘ኤልያ ሶይ አሳ ናጋራይ ያርሹዋንነ እሙዋን ኡባካ አቶ ጌተቶፖ’ ያጋደ ታን አ ሶይ አሳዉ ጫቃድ” ያጌዳ።

15 ሳመል ሳአይ ዎንታና ጋካናዉ ግሴዳ፤ ዎንትና ደንዲደ፥ መꬍና ጎዳ ጎልያ ፐንግያ ዶዬዳ። ሳመል ሳጻባ ኤልያዉ ኦዳናዉ ያዬዳ። 16 ኤል ሳመላ፥ “ታ ናአዉ ሳሜላ” ያጊደ ጼሴዳ።

ሳመል፥ “አቤ” ጊደ ኮዬዳ።

17 ኤል ሀዋዳን ያጊደ ሳመላ ኦቼዳ፤ “ጾሳይ ነዉ ኦዴዳዌ አዬ? ታፐ አይነ ቆሶፓ፤ ኔን ጾሳይ ነዉ ኦዴዳዋፐ እትባነ ታፐ ቆሶፐ፥ ጾሳይ ሄዋዳን ነ ቦላ ኦꬆ” ያጌዳ። 18 ሄዋፐ ጉየ ሳመል አይነ ቆሰናን ኡባባ ኤልያዉ ኦዴዳ። ኤል፥ “እ መꬍና ጎዳይ፤ እ ባረና ሎኦዋ ኦꬆ” ያጌዳ።

19 ሳመል ድጭያ ዎደ መꬍና ጎዳይ አናና ደኤ፤ ሳመል ሃሳዬዳባፐ እት ቃላይነ ሳኣን ዎꬍቤና። 20 እስራኤልያ ዛዋን ዳናፐ ቢደ በርሳበሀ ጋካናዉ፥ ሳመል መꬍና ጎዳዉ ቱሙ ትምቢትያ ኦድያዋ ግድያዋ እስራኤልያ አሳይ ኡባይ ኤሬዳ። 21 መꬍና ጎዳይ ሴሎን ቆንጬ፤ ያን ባረ ቃላን ባረናተꬃ ሳመላዉ ቆንጭሴዳ። ሳመል ሃሳዬዳ ቃላይ እስራኤልያ ኡባ ጋኬዳ።

<- 1 ሳሜላ 21 ሳሜላ 4 ->