1 ሳኦል ባረ ናኣ ዮናታናዉነ ባረ ቆማቱዋ ኡባዉ፥ “ዳዊታ ዎꬍተ” ያጊደ ኦዴዳ፤ ሽን ሳኦላ ናአይ ዮናታን ዳዊታ ሎይꬅ ሲቄዳ። 2 ሄዋ ድራዉ፥ ዮናታን ዳዊታዉ ሀዋዳን ያጊደ ኦዴዳ፤ “ታ አዉ ሳኦል ኔና ዎꬋናዉ ኮዬ፤ ዎንት ጉራ ነዉ ናገታ፤ እት ሳኣን ቆሰታደ ደአሻ። 3 ታን ታ አቡና ባደ፥ ኔን ቆሰቴዳ ጋደን ኤቃና፤ ታን ነባ አዉ ኦዳደ፥ አፐ ስሴዳባ ነዉ ኦዳና” ያጌዳ።

4 ዮናታን ዳዊተዋ ናሺደ፥ ባረ አዉዋ ሳኦላ ሀዋዳን ያጌዳ፤ “ካቲ ባረ ቆማ ዳዊታ ናቆፖ፤ አያዉ ጎፐ፥ እ ኔና ናቂቤና፤ እ ኦꬄዳባይ ኔና ሎይꬅ ጎኤዳ። 5 እ ፕልስጼምያ ዎꬍያ ዎደ ባረ ሸምፖ ቃረትቤና። መꬍና ጎዳይ እስራኤልያ ኡባዉ ዎልቃማ ጾኑዋ እሜዳ፤ ሄዋ በኣደ ኔንካ ናሸታዳ። ያትና፥ ኔን ጌሻ አሳ ናቃናዉ አያዉ ቆፓይ? ጋሱ ባይናን ዳዊታ ዎꬋናዉ አያዉ ኮያይ?” ያጌዳ።

6 ሳኦል ዮናታን ኦዴዳዋ ስሲደ፥ “መꬍና ጎዳይ ኤሮ፥ ታን ዳዊታ ዎꬍከ” ያጊደ ጫቄዳ።

7 ዮናታን ዳዊታ ጼሲደ፥ ሃሳዬዳዋ ኡባ ኦዴዳ። ያቲደ ዳዊታ ሳኦላኮ አሄዳ፤ ዳዊተ ሳኦላና ካሰዋዳንካ ደኤዳ።

8 ሀራ ኦላይካ ደንዴዳ፤ ዳዊተ ከሲደ ፕልስጼማ አሳቱዋና ኦለቴዳ፤ ኡንቱንታ ዎልቃማ ሾቻ ሾጭና፥ ኡንቱንቱ አ ስንꬃፐ ባቃቴድኖ።

9 ሄዋፐ ስሚደ፥ ሳኦል ቶራ ኦይቂደ ባረ ሶን ኡት ደእሽን፥ ኢታ አያናይ መꬍና ጎዳፐ ኪተቲደ አ ኦይቄዳ። ያትና፥ ዳዊተ ዲꬃ ዲጽሽን፥ 10 ሳኦል ዳዊታ ጎዳና ጋꬂደ ዳንꬃናዉ (ኦይꬃናዉ) ቶራ ጾንጌዳ፤ ሽን ዳዊተ አፐ ሀሌዳ፤ ቶራይ ጎዳን ኤቄዳ። ሄ ጋላሳ ቃማ ዳዊተ ባቃቲደ ከስ አኬዳ።

11 ሄዋፐ ጉይያን፥ “ዳዊታ ጎልያ ናጊደ፥ ጉራ አ ዎꬍተ” ያጊደ ሳኦል አሳ ዳዊታ ሶ ኪቴዳ።

ያትና፥ ዳዊታ ማቻታ ሚካላ፥ “ሀቼ ቃማ ኔን ነ ሸምፑዋ አሻና ꬋዮፐ፥ ዎንት ሀይቃሳ” ያጋደ ዳዊታዉ ኦዳዱ። [a] 12 ሚካላ ዳዊታ ማስኮትያና ዎꬃዱ፤ ዳዊተ ባቃቲደ ከስ አኬዳ። 13 ሚካላ ሶ ምስልያ አካደ አርሳን ግስሳዱ፤ ሁጲሳና ዴሻ እስክያ ዎꬃዱ፤ ያታደ አፍላ ማይዛዱ።

14 ዳዊታ ኦሞዲደ አሀና ማላ፥ ሳኦል አሳ ኪቴዳ፤ ሚካላ፥ “ዳዊተ ሳከቴዳ” ያጋዱ።

15 ሄዋፐ ጉይያን፥ ዳዊታ በአና ማላ፥ ሳኦል ሄ አሳቱዋ ጉየ ኪቲደ፥ ሀዋዳን ያጌዳ፤ “ታን ዳዊታ ዎꬋናዳን አ አርሳና ቶኪደ አኪደ አህተ” ያጌዳ። 16 ሽን አሳቱ ሶ ገልያ ዎደ፥ ሄ ሶ ምስሊ አርሳን ግሴዳዋ ደሜድኖ፤ አ ሁጲሳና ዴሻ እስኪ ደኤ።

17 ሳኦል ሚካሎ፥ “ኔን አያዉ ሀዋዳን ኦꬃደ ታና ጭማድ? ታ ሞርኪ ከስ አካናዳን አያዉ ባቃትሳዲ?” ያጌዳ።

ሄዋፐ ጉየ ሚካላ፥ “እ ታና፥ ‘ታና ከሳደ የዳ፤ ህና ꬋዮፐ፥ ታን ኔና ዎꬋና’ ያጌዳ” ያጋደ ዛራዱ።

18 ዳዊተ ባቃት አቲደ፥ ራማን ደእያ ሳሜላኮ ቤዳ፤ ሳኦል ባረና ኦꬄዳ ኡባባ ሳሜላዉ ኦዴዳ። እነ ሳመል ራማን ደእያ ናዮታ ግያ ሳኣን ቢደ ኡቴድኖ። 19 ሳኦል፥ “ዳዊተ ራማን ደእያ ናዮታን ደኤ” ያግያዋ ስሴዳ። 20 ዳዊታ ኦሞዳና ማላ፥ አሳ ያ ኪቴዳ። ሽን ትምቢትያ ኦድያዋንቱ ጭታይ ትምቢትያ ኦድሺንነ ሳሜልካ ኤቂደ ኡንቱንታ ካለꬅሽን ኡንቱንቱ በኤዳ ዎደ፥ ሳኦል የዴዳ አሳ ቦላ ጾሳ አያናይ ዎꬌዳ፤ ኡንቱንቱካ ትምቢትያ ኦዴድኖ። 21 ሳኦል ሄዋ ስሴዳ ዎደ፥ ሀራ አሳ የዴዳ፤ ኡንቱንቱካ ቃይ ትምቢትያ ኦዴድኖ። ሳኦል ሄዘንꬆ አሳ የዴዳ፤ ሄዋንቱካ ትምቢትያ ኦዴድኖ። 22 ያትና፥ እ ባረ ሁጲያዉ ራማ ባናዉ ደንዴዳ፤ ቢደ ሴኩን ደእያ ዎልቃማ ኦላ ጋኬዳ፤ “ሳመልነ ዳዊተነ ሀቃን ደኢኖ?” ያጊደ ኦቼዳ።

ኡንቱንቱ፥ “ህን ራማን ደእያ ናዮታን ደኢኖ” ያጊደ ዛሬድኖ።

23 ሄዋ ድራዉ፥ ሳኦል ራማን ደእያ ናዮታ ቤዳ፤ ቃይ ጾሳ አያናይ አ ቦላካ ዎꬌዳ፤ ራማን ደእያ ናዮታ ጋካናዉ፥ ትምቢትያ ኦዲደ ቤዳ። 24 ብ ጋኪደ፥ ባረ ማዩዋ ቃሪደ፥ ሳመላ ስንꬃን ትምቢትያ ኦዴዳ፤ ሄ ጋላሳ ኡባነ ቃማ ኡባ ካሎ ግሴዳ። አሳይ፥ “ሳኦለካ ትምቢትያ ኦድያዋንቱ ዛቴየ?” ጉሳይ ሀዋሳ። [b]

<- 1 ሳሜላ 181 ሳሜላ 20 ->