1-2 ሄዋዳንካ ማቼቶ፥ ህንተ አስናቱዋፐ ጾሳ ቃላዉ አዛዘተና እቱ እቱ ደኦፐካ፥ ህንተ ፓሉመተናን፥ ኡንቱንቱ ህንተ ያሻተꬃነ ህንተ ጌሻ ደኡዋ በኢደ ጾነታና ማላ፥ ኡንቱንቶ ሞደትተ። 3 ህንተ ህንተ ሁጲያ አልኦባን ጊግስያዋንነ ዎርቃ ዎꬅያዋን ዎይ አልኦ ማዩዋ ማይያዋን ህንተንቱ ቦላ ባጋ ሎይꬆፕተ። 4 ሽን ህንተ ጋርሳን ቆሰቴዳ አሳተꬃ ሎኦተꬃይ ጾሳ ስንꬃን ህንተንቶ ዳሮ አልኦ ግዲደ፥ ꬋየና አሽከነ ዎፑ ጌዳ አያና ግዶ። 5 አያዉ ጎፐ፥ ሄዋዳን ጾሳን ህዶቴዳ ጌሻ ማጫ አሳቱ በን ዎደ ባረንቱ አስናዉ ሞደቲደ፥ ባረንታ ዳሮ ሎይꬄድኖ። 6 ሄዋዳን ሳራ አብራሃማ፥ “ታ ጎዳዉ” ያጋ ጼሳደ፥ አዉ አዛዘታዱ፤ ህንተካ እትባዉነ ያየናን ሎኦባ ኦꬆፐ፥ እ ናናቱዋ። [a]

7 ሄዋዳን አስናቶ፥ ህንተ ማጫ አሳቱዋና አኬካን እትፐ ደእተ። ኡንቱንቶ ዳቡራንቻ አሳተꬃይ ደእያ ድራዉ፥ ኡንቱንታ ቦንችተ፤ ህንተ ዎሳይ ꬉበተና ማላ፥ ጾሳይ እሜዳ ደኡዋ አꬎ ኬካተꬃ ኡንቱንቱ ህንተናና እትፐ ላትኖ።

8 ዉርሰꬃን፥ ኡባይ እት ቆፋን ደእተ። እቱ እቶ ቃረትተ፤ እሻቱዋዳን ሲቀትተ፤ ቃይ እቱ እቶ ኬክያዋንታነ ህንተ ሁጲያ ካዉሽያዋንታ ግድተ። 9 ኢታ ድራዉ ኢታ ዎይ ሸቃ ድራዉ ሸቃ ዛሮፕተ፤ ሄዋ አጊደ፥ ጾሳይ ህንተንቱ አንጁዋ ላታናዳን ህንተና ጼሴዳ ድራዉ፥ አንጅተ። 10 አያዉ ጎፐ፥ ጾሳ ማጻፋይ ሀዋዳን ያጌ፤ “ደኡዋ ዶስያዌነ ሎኦ ጋላሳ በአናዉ ኮይያዌ ኦና ግዶፐነ ባረ እንጻርሳን ኢታባ ሃሳይያዋነ ዎርዱዋ ኦድያዋ አጎ። [b]

11 “ኢታባ ኦꬅያዋ አጊደ፥ ሎኦባ ኦꬆ፤ ሳሮተꬃካ ሎይꬅ ኮዮነ ካላናዉ ባጸቶ።

12 “አያዉ ጎፐ፥ ጎዳ አይፊ ጽሎቱዋኮ ጼሌ፤ ቃይ አ ሀይꬃይ ኡባ ዎደ ኡንቱንቱ ዎሳዉ ዶያ ደኤ። ሽን ጎዳይ ኢታባ ኦꬅያዋንታ ባረ ሀንቁዋ ሶምእያን ጼሌ” ያጌ።

13 ህንተ ሎኦባ ኦꬃናዉ አሞቶፐ፥ ህንተና ቆሀናዌ ኦኔ? 14 ሽን ሀራይ አቶ፥ ጽሎተꬃ ድራዉ ህንተ ዋየቶፐካ፥ አንጀቴዳዋንታ። አሳዉ ያዮፕተነ ህርጎፕተ። [c] 15 ሽን ክርስቶሳ ህንተ ዎዛናን ቦንችተነ አ ህንተ ጎዳ ኦꬅተ። ጾሳይ ህንተንቶ ህዶቴዳ ደኦ ጋሱዋ ኦችያ ኦስነ ዛሩዋ እማናዉ ኡባ ዎደ ጊግ ኡትተ፤ 16 ሽን ሄዋ አሽከተꬃንነ ያሻተꬃን ኦꬅተ። ቃይ ክርስቶሳን ህንተ ደእያ ሎኦ ደኡዋ ኢታባ ኦꬄዳዋዳን፥ ህንተ ቦላን ኢታባ ሃሳይያ አሳይ ባረ ዝግርያዋን ዬላታና ማላ፥ ህንተ ዎዛናይ ጌሻ ግዶ። 17 አያዉ ጎፐ፥ ጾሳይ ጌዳዋ ግዶፐ፥ ኢታባ ኦꬄዳ ድራዉ ዋየትያዋፐ፥ ሎኦባ ኦꬄዳ ድራዉ ዋየትያዌ ኬካ። 18 አያዉ ጎፐ፥ ክርስቶስ ኑና ጾሳኮ አፋናዉ፥ ባረዉ ጽሎ ግዲደ፥ ማካላንቻቱዋ ድራዉ፥ እት ገደ ኡባ ናጋራዉ ሀይቄዳ፤ እ ባረ አሳተꬃን ሀይቄዳ፤ ሽን አያናን ፓጼዳ። 19 ቃይ ሄ አያናን፥ ቃሹዋን ደእያ አያናቱዋኮ ቢደ፥ ኡንቱንቶ ቃላ ኦዴዳ። 20 ሄ አያናቱ አማሬዳ፥ ሆስፑን አሳቱ ሃꬃን አቴዳ ማርካብያ ኖሄ ኬጽሽን፥ ጾሳይ ዳንዳዪደ ጋምኤዳ ዎደ፥ ጾሳዉ አዛዘትቤና አሳ አያናቱዋ። [d] 21 ሄዌ ጽንቃታዉ ሌምሱዋ ግዲደ፥ ህንተና ሀእ አሼ፤ ሱረ ዎዛናፐ ጾሳ ዎስያዋፐ አትን፥ ቦላ ቅታ ሜጭያዋ ግደና፤ ሄዌ ህንተና የሱስ ክርስቶስ ሀይቁዋፐ ደንዴዳዋን አሼ። 22 ሳሉዋ ቢደ ጾሳፐ ኡሸቻ ባጋን እ ኡቲደ፥ ኪታንቻ ኡባ፥ ማታና ደእያዋንታነ ዎልቃማቱዋ ሞዴ።

<- 1 ጰጽሮሳ ኪታ 21 ጰጽሮሳ ኪታ 4 ->