1 እዝራኤልያ ናቡተዉ ሳማርያ ካትያ አካባ ጎልያ ማታን እዝራኤላን ዎይንያ ቱራ ሳአይ ደኤ። 2 አካብ ናቡታ፥ “ታ ጎልያ ማታን ደእያ ድራዉ፥ ታን ታዉ አታክልትያ ሳኣ ኦꬃናዉ ታዉ ነ ዎይንያ ቱራ ሳኣ እማ። አ ድራዉ ነዉ ታን ሀራ ሎኦ ዎይንያ ቱራ ሳኣ እማና፤ ዎይ ኔን ዶሶፐ፥ አ ጋትያ ታን ነዉ ጭጋና” ያጌዳ።

3 ናቡተ አካባዉ፥ “ታን ታ አዎቱዋፐ ላቴዳ ጋድያ ታና ነዉ እምስያባፐ መꬍና ጎዳይ አሾ” ያጌዳ።

4 እዝራኤልያ ናቡተ፥ “ታን ታ አዎቱዋፐ ላቴዳ ጋድያ ነዉ እምከ” ጌዳ ድራዉ፥ አካብ ይሎቲደነ ላንጪደ ባረ ሶ ቤዳ። ባረ ግሱዋን ጎዳኮ ስም ግሲደ፥ ቁማ ሜናን እጼዳ።

5 አ ማቻታ ኤልዛቤላ አኮ ገላደ፥ “ኔን ሀዋ ኬና አያዉ ሀንቀታዲ? አያዉ ቁማ ሜናን እጻይ?” ያጋደ ኦቻዱ።

6 አካብ እዝዉ፥ “እዝራኤልያ ናቡታ ታን፥ ‘ነ ዎይንያ ቱራ ሳኣ ታዉ ዛልአ፤ ዎይ ነ ዶሶፐ፥ አ ድራዉ ታን ነዉ ሀራ ዎይንያ ቱራ ሳኣ እማና’ ያግና፥ እ፥ ‘ታ ዎይንያ ሳኣ ነዉ እምከ’ ያጌዳ። ታን ሄዋ ድራዉ ሀንቀታድ” ያጌዳ።

7 ማቻታ ኤልዛቤላ አ፥ “ኔን እስራኤልያ ቦላ ካትያ ግዳደ ሀዋዳን ሀናይ? ደንዳደ ማ! ዎዛናፐ ናሸታ! እዝራኤልያ ናቡተ ዎይንያ ቱራ ሳኣ ታን ነዉ እማና” ያጋዱ።

8 ሄዋ ድራዉ፥ ማቻታ አካባ ሱንꬃን ዳብዳበቱዋ አ ማታፋን አታማደ ናቡተና እትፐ ካታማን ደእያ ጭማቶነ ዎልቃማ አሳቶ ኪታዱ። 9 ሄ ዳብዳበቱዋ ሀዋዳን ያጋደ ጻፋዱ፤ “እት ጋላሳዉ ጾማ አዋይተ፤ ያቲደ አሳ ግዱዋን ናቡታ ቦንቾ ሳኣን ኡትስተ። 10 ላኡ ፓና አሳቱዋ አ ስንꬃን ኡትስተ። ሄ አሳቱ፥ ‘ናቡተ ጾሳነ ካትያ ቦሬዳ ያጊደ ማርካታናዳን ኦꬅተ። ሄዋፐ ጉይያን ጋጻ ከሲደ፥ ሹቻን ጫድ ዎꬍተ’ ” ያጋደ ጻፋዱ።

11 ሄዋ ድራዉ፥ ናቡተና እትፐ ካታማን ደእያ ጭማቱነ ዎልቃማ አሳቱ ኤልዛቤላ ኡንቱንቶ ጻፌዳ ዳብዳበቱዋን ጌዳዋዳን ኦꬄድኖ። 12 ኡንቱንቱ ጾማ አዋዪደ፥ ናቡታ አሳ ግዶን ቦንቾ ሳኣን ኡትሴድኖ። 13 ሄዋፐ ጉይያን ላኡ ፓꬄና አሳቱ ዪደ፥ አኮ ስም ኡቲደ፥ አሳ ስንꬃን፥ “ናቡተ ጾሳነ ካትያ ቦሬዳ” ያጊደ ዎርዱዋ ማርካቴድኖ። ናቡታ ካታማፐ ጋጻ ከሲደ፥ ሹቻን ጫዲደ ዎꬌድኖ።

14 ሄዋፐ ጉይያን ጭማቱ ኤልዛቤልኮ ኪቲደ፥ “ናቡተ ሹቻን ጫደቲደ ሀይቄዳ” ያጌድኖ።

15 ናቡተ ሹቻን ጫደቲደ ሀይቄዳዋ ኤልዛቤላ ስሶ ሳናካ፥ አካባ፥ “እዝራኤልያ ናቡተ ነዉ ሻሉዋን ዛልአናዉ እጼዳ ዎይንያ ቱራ ሳኣ ደንዳ ባደ፥ ነዉ አካ። እ ሀእ ፓጻ ባዋ፤ ሀይቂክቼዳ” ያጋዱ። 16 እዝራኤልያ ናቡተ ሀይቄዳዋ አካብ ስሲደ፥ ናቡተ ዎይንያ ቱራ ሳኣ ባረዉ አካናዉ ደንዲደ፥ ዱገ ቤዳ።

17 ሄዋፐ ጉይያን ትሽቢያ ኤላሳኮ መꬍና ጎዳ ቃላይ ዪደ፥ 18 “ሳማርያን ካተቴዳ እስራኤልያ ካትያ አካባና ጋከታናዉ ዱገ ዎꬋ። እ ሀእ ናቡተ ዎይንያ ቱራ ሳኣ አካናዉ ቢደ፥ ያን ደኤ። 19 ኔን አ ሀዋዳን ያጋ፤ ‘መꬍና ጎዳይ ኔና፥ “ብታንያ ዎꬋደ፥ አ ጋድያ ነዉ አካዳ ግድኪ?” ያጌ’ ያጋ። ቃይካ አ፥ ‘መꬍና ጎዳይ ኔና፥ “ናቡተ ሱꬃ ካናቱ ላጬዳ ሳኣን ነ ሱꬃካ ካናቱ ላጫና” ያጌ’ ያጋ” ያጌዳ። [a]

20 ሄዋፐ ጉይያን አካብ ኤላሳ፥ “ሀይ ታ ሞርክያዉ፥ ታና ደማድጋዲ?” ያጌዳ።

“ኤ፥ ታን ኔና ደማ ድጋድ፤ አያዉ ጎፐ፥ ኔን መꬍና ጎዳ ስንꬃን ኢታባ ኦꬃናዉ፥ ነ ሁጲያ ናጋራዉ ዛልኣዳ። 21 ጾሳይ ኔና ሀዋዳን ያጌ፤ ‘ስሳ፥ ታን ነ ቦላ ኢታባ አሀና። ታን ነ ዘረꬃ ꬋይሳና፤ ታን እስራኤልያ ቢታን አካባ ጎልያ አሳፐ አይልያ ግድና ሎኡዋ ግድና፥ እት አቱማ አስነ አተናን ꬎቆላና። 22 ታን ነ ሶ አሳ ናባጻ ናኣ እዮርባማ ሶ አሳዳንነ አኪያ ናኣ ባእሻ ሶ አሳዳን ኦꬃና። አያዉ ጎፐ፥ ኔን እስራኤልያ አሳ ናጋራ ኦስሳደ፥ ታና ሀንቀꬃዳ’ ያጌ። 23 ቃይ መꬍና ጎዳይ ኤልዛቤልባ ኦዲደ፥ ‘እዝራኤላ ካታማ ግምቢያ ምይያን ካናቱ ኤልዛቤሎ ማና’ ያጌ። [b] 24 አካባ ዛርያ ግዴዳ ካታማን ሀይቂያ ኦናነ ካናይ ማና፤ ቃይ ጋጻርያን ሀይቂያ ኦናነ ሳሉዋ ካፎቱ ማና” ያጌዳ።

25 ባረ ማቻታ ኤልዛቤላ ደንꬅና፥ መꬍና ጎዳ ስንꬃን ኢታባ ኦꬃናዉ ባረ ሁጲያ ናጋራዉ ዛልኤዳ፥ አካባ ማላ አሳይ ኡባካ ባዋ። 26 መꬍና ጎዳይ እስራኤልያ አሳ ስንꬃፐ ላጊደ ከሴዳ አሞረቱዋዳን ኤቃዉ ጎይንያዋን አካብ አꬍያ ሸነይያባ ሀኔዳ።

27 አካብ ሀ ሃሳያ ስሴዳ ዎደ፥ ባረ ማዩዋ ፔꬊደ፥ ዋሩዋ ማዬዳ፤ ያቲደ ጾሜ። ዋሩዋ ማዮሳና ግሴዳ፤ ካዮቲደ ሀመቴዳ።

28 ሄዋፐ ጉይያን መꬍና ጎዳ ቃላይ ትሽቢያ ኤላሳኮ ዪደ፥ 29 “አካብ ባረ ሁጲያ ታ ስንꬃን ካዉሼዳዋ በኣዲ? እ ታ ስንꬃን ባረ ሁጲያ ካዉሼዳ ድራዉ፥ ታን ሀ ባሻ አ ዎድያን አህከ። ሽን ታን አ ናኣ ዎድያን አ ሶ አሳ ቦላ ሀ ባሻ አሀና” ያጌዳ።

<- 1 ካታቱዋ 201 ካታቱዋ 22 ->