5 “ቃይ ጻሩይ ናአይ ዮኣበ እስራኤልያ ኦላ ጋዳዋቱዋ ላኡዋ፥ ኔራ ናኣ አባኔራነ የተራ ናኣ አማሳ ዎꬊደ፥ እ ታና ኦꬄዳዋ ኔን አኬካሳ። ሄዌነ፥ ኡንቱንቱ ኦላ ዎደ ዎꬌዳዋ ሀሉዋ ኡንቱንታ ስጋ ዎደ ዎꬊደ፥ ሄ ሱꬃን ባረ ጼሳ ሳቂያነ ባረ ገድያ ጫማ አሌቄዳ። [a] 6 ኔን አ ነ አꬌዳ ኤራተꬃዳን ኪተታ፤ ባረዉ ማታ እ ጭሚደ ሳሮ ሀይቃናዳን ኦꬆፓ።
7 “ሽን ጋላኣደ ጌተትያ ቢታን ደእያ ባርዝላያ ናናዉ ሎአ፤ ኡንቱንቱ ነ ማዳን ምያ አሳና ሚኖ። አያዉ ጎፐ፥ ታን ነ እሻ አበሰሎማፐ ባቃትያ ዎደ፥ ኡንቱንቱ ታ ባጋ ግዴድኖ። [b]
8 “ታን ማህናይማ ካታማ ቤዳ ዎደ፥ ታና ኢታ ሸቃ ሸቄዳ ቢንያማ ጋድያን ባሁሪማ ካታማፐ ዬዳ ጌራ ናኣ ሽምእ ኔናና ደእያዋ ሀሳያ። እ ታናና ጋከታናዉ ዮርዳኖሳ ሻፋ ዱገ ዬዳ ዎደ፥ ‘ታን ኔና ዎꬍከ’ ጋደ መꬍና ጎዳን አዉ ጫቃድ። [c] 9 ሽን ሀእ ኔን አ ጽሎ አሳዳን ፓይዶፓ። ኔን አꬌዳ ኤራይ ደእያ አሳ፤ ኔን አ ዋታነንቶ ኤራሳ። ኔን ሄ ጭማ ብታንያ ሀይቁዋን ሙራ” ያጌዳ።
15 እ ሀዋዳን ያጌዳ፤ “ካተታናዉ በስያዌ ታና ግዴዳዋነ እስራኤልያ አሳይ ኡባይ ታና ባረንቱ ካትያዳን ጼሌዳዋ ኔን ነ ሁጲያዉ ኤራሳ። ሽን የዎቱ ላመትና ካዉተꬃይ ታ እሻዉ ዩዬዳ፤ ሄዌነ፥ አዉ መꬍና ጎዳፐ ዬዳ። 16 ሀእ ታን ኔና እትባ ኦቻና። ሀያና ታዉ እጾፓ” ያጌዳ።
17 እ፥ “ካቲ ሶሎሞነ ነዉ እጻድ ጌና፤ ሄዋ ድራዉ፥ ሹኔማ ካታማፐ ዬዳ አብሻጎ ግያ ዎዶራቶ ታን አካናዳን እ እዞ ታዉ እማና ማላ፥ ሀያና አ ታዉ ኦቻርክ” ያጌዳ። [e]
18 በርሳባ፥ “ዳሮ ሎአ፤ ታን ሄዋ ነ ድራ ካትያዉ ኦዳና” ያጋዱ።
19 ሄዋ ድራዉ፥ በርሳባ አዶንያ ኪታ ኦዳናዉ ሶሎሞነኮ ገልና፥ ካቲ እዞ ሞካናዉ ደንድ ኤቂደ፥ እዝዉ ጎይን ስሚደ ባረ ካዉተꬃ አራታን ኡቴዳ። ቃይ ባረ አትዉ ሀራ ካዉተꬃ አራታ አህሲደ፥ አን ባረፐ ኡሸቻ ባጋና ኡትሴዳ።
20 ኡቴዳዋፐ ጉይያን፥ “ኔና ታን እት ጉꬃባ ኦችያዌ ደኤ። ሀያና ታዉ እጾፓ” ያጋዱ።
21 አ፥ “ሹኔማ ካታማፐ ዬዳ አብሻጎ ነ እሻይ አዶንያስ አካና ማላ አዉ እማርኪ” ያጋዱ።
22 ካቲ ሶሎሞነ ዛሪደ ባረ ዳዮ፥ “ሹኔማ ካታማፐ ዬዳ አብሻጎ ኔን አዶንያሳዉ አያዉ ኦቻይ? እ ታ ባይራ ግደኔ? ኔን አዉ ካዉተꬃካ ኦቻናዋ ሽን አጋዳ! ኤ፥ ኔን አዉ፥ ቄስያ አብያታራዉነ ጻሩይ ናኣ ዮኣባዉ ካዉተꬃካ ኦቻናዋ አጋዳ!” ያጌዳ።
23 ካቲ ሶሎሞነ ጾሳን ጫቂደ፥ “አዶንያስ ሀዋ ኦቼዳ ድራዉ ታን አ ዎꬋና ꬋዮፐ፥ መꬍና ጎዳይ ታና ዎꬎ! 24 ሀእ ስም ታና ታ አዉዋ ዳዊታ ካዉተꬃ አራታን ኡትሲደ፥ ታ ካዉተꬃ ሎይꬅ ኤሲደ፥ ታ ዛራቱ ደኤናዳን ኦꬄዳ መꬍና ጎዳይ ኤሮ! አዶንያሳ ሀቼ ዎꬋና!” ያጌዳ። 25 ካቲ ሶሎሞነ ዮዳሄ ናኣ ባናያ አዛዝና፥ እ ቢደ አዶንያሳ ሾጪደ ዎꬌዳ።
30 ባናይ መꬍና ጎዳ ዱንካንያ ግዶ ገሊደ ዮኣባ፥ “ካቲ ኔና፥ ‘ሀዋፐ ከሳ’ ያጌ” ያጌዳ።
31 ካቲ ባናያ፥ “እ ጌዳዋዳን አ ኪተታ፤ አ ዎꬋደ ሞጋ! ያቶፐ፥ ዮኣበ ጽሎ አሳቱዋ ሱꬃ ጉሴዳ ዳባፐ ታናነ ታ አዉዋ ጎልያ አሳ ጌሻሳ። 32 እ ጉሴዳ ሱꬃ አጩዋ መꬍና ጎዳይ አዉ ጭጋና። አያዉ ጎፐ፥ እ ታ አዉ ዳዊተ ኤረናን ደእሽን ላኡ አሳቱዋ ማሻን ዎꬌዳ፤ እስራኤልያ ኦላ ጋዳዋይ ኔራ ናአይ አባኔርነ ይሁዳ ኦላ ጋዳዋይ የተራ ናአይ አማስ፥ ኡንቱንቱ ላአቱካ አፐ ኬካነ ሱርያ ዳሮ አሳ። 33 ዮኣበ ሀ አሳቱዋ ዎꬌዳ ድራዉ፥ ኡንቱንቱ ሱꬃ ዳባይ መꬍናዉ ዮኣባ ሁጲያንነ አ ዘረꬃቱዋ ሁጲያን ዎꬎ። ዳዊታ ቦላነ አ ጎልያ አሳ ቦላ፥ አ ዘረꬃቱዋ ቦላነ አ ካዉተꬃ አራታ ቦላ መꬍናዉ መꬍና ጎዳ ሳሮተꬃይ ግዶ” ያጌዳ።
34 ሄዋ ድራዉ፥ ዮዳሄ ናአይ ባናይ ፑደ ከሲደ፥ ዮኣባ ሾጪደ ዎꬌዳ፤ እ ዎራን ደእያ ባረ ጋደን ሞገቴዳ። 35 ካቲ ዮዳሄ ናኣ ባናያ ዮኣባ ሳኣን ኦላ ጋዳዋ ኦꬂደ ሱንꬄዳ፤ ቃይ አብያታራ ኮታን ቄስያ ሳዶቃ ሱንꬄዳ።
38 ሽምእ ዛሪደ ካትያ፥ “ኔን ግያዌ ሎአ፤ ታን ነ ቆማይ ኔን ታ ጎዳይ ካቲ ጌዳዋዳን ኦꬃና” ያጌዳ። ሽምእ የሩሳላመን ዳሮ ዎድያ ደኤዳ።
39 ሽን ሄዙ ላይꬃፐ ጉይያን፥ ሽምአ ቆማቱዋፐ ላአቱ በቲደ፥ ማእካ ናኣ፥ ጋተ ካትያ አኪሻኮ ቢና፥ “ነ ቆማቱ ጋተን ደኢኖ” ጊደ ሽምአዉ ኦዴድኖ። 40 እ ባረ ሀርያ ኮሪደ፥ ባረ ቆማቱዋ ኮያናዉ አኪሻኮ ጋተ ቤዳ፤ ጋተፐ ባረ ቆማቱዋ ዛሪደ አሄዳ።
41 ሽምእ የሩሳላመፐ ጋተ ካታማ ቢደ ስሜዳዋ ሶሎሞነ ስሴዳ ዎደ፥ 42 ሽምአ ጼስሲደ ሀዋዳን ያጌዳ፤ “ ‘ኔን ያፐ ደንዳደ ሀራሳ ሀቃነ ቤዳ ጋላስ፥ ሀይቂያዋ ኤራ’ ጋደ ታን ኔና መꬍና ጎዳን ጫቀꬃደ ሴራበይክታ? ሄ ዎደ ኔን ‘ነ ግያዌ ሎአ፤ ኤኖ፥ ታን አዛዘታና’ ጋዳ። 43 ያትና፥ መꬍና ጎዳዉ ጫቄዳ ጫቁዋነ ታ አዛዙዋ አያዉ ናጋበይኪ?” ያጌዳ።
44 ቃይካ ካቲ ሽምአ፥ “ታ አዉዋ ዳዊታ ቦላ ኔን ኦꬄዳ ኢታ ኪታ ኡባ ነ ዎዛናይ ኤሬዳ። ሀእ ስም ነ ኢታ ኪታ መꬍና ጎዳይ ነዉ ዛራና። 45 ሽን ካቲ ሶሎሞነ አንጀታና፤ ዳዊታ ካዉተꬃ አራታይካ መꬍና ጎዳ ስንꬃን መꬍናዉ ሳሮ ደአና” ያጌዳ። 46 ካቲ ዮዳሄ ናኣ ባናያ አዛዜዳ፤ ባናይ ቢደ፥ ሽምአ ሾጪደ ዎꬌዳ።