1 እዮርባም እጻና ጩዋያናዉ ያርሹዋ ያርሽያ ሳኣ ማታን ኤቂደእሽን፥ መꬍና ጎዳ ቃላን ኪተቴዳ፥ ጾሳ አሳ ጌተትያ እት ብታኒ ይሁዳፐ ዬዳ። 2 መꬍና ጎዳይ አዛዝና ሄ ያርሽያ ሳኣ ቦላ ሀዋዳን ያጊደ ዋሴዳ፤ “ያርሽያ ሳአዉ፥ ያርሽያ ሳአዉ፥ መꬍና ጎዳይ ኔና ሀዋዳን ያጌ፤ ‘ዳዊታ ዛርያዉ ዮስያሳ ጌተትያ እት ናአይ የለታናዋ። ሄ ናአይ ሀእ ሀዋን ያርሺደ ደእያ ꬎቃ ሳአቱ ቄሳቱ ዋ ነ ቦላ ያርሻና፤ ነ ቦላ አሳ መቀꬃይ ጹገታና’ ያጌ” ያጊደ ዋሴዳ። [a] 3 ሄ ጋላስ ጾሳ አሳይ ማላታ እሚደ፥ “መꬍና ጎዳይ ኦዴዳ ማላታይ ሀዋ፤ ሀ ያርሽያ ሳአይ ጳልቀታና፤ አ ቦላን ደእያ ብድንꬃይካ ዎራ ላለታናዋ” ያጌዳ።

4 ካቲ እዮርባም ጾሳ አሳይ ቤቴለን ደእያ ያርሽያ ሳኣ ቦላ ዋሴዳዋ ስሴዳ ዎደ፥ ያርሽያ ሳኣፐ ባረ ኩሽያ የዲደ፥ “ሄ ብታንያ ኦይቂተ!” ያጌዳ። ሽን እ ብታንያዉ የዴዳ ኩሺ ኤለካ ጺጊደ ስሌዳ፤ ሄዋ ድራዉ፥ ባረ ኩሽያ ጉየ ዛሪደ አካናዉ ዳንዳይቤና። 5 ቃይ ጾሳ አሳይ መꬍና ጎዳ ቃላን እሜዳ ማላታዳን ያርሽያ ሳአይ ጳልቀት ዎꬍና፥ አ ቦላን ደእያ ብድንꬃይካ ዎራ ላለቴዳ። 6 ያትና፥ ካቲ እዮርባም ጾሳ አሳ፥ “ታ ኩሺ ካሰዋዳን ሀናና ማላ ታዉ ጋናታደ መꬍና ጎዳ ነ ጾሳ ዎሳርኪ!” ያጌዳ። ሄዋ ድራዉ፥ ጾሳ አሳይ ካትያዉ ጋናቲደ መꬍና ጎዳ ዎስና፥ ካትያ ኩሺ ስሚደ ካሰዋዳን ሀኔዳ።

7 ካቲ ጾሳ አሳ፥ “ታናና ታ ሶ ደንዳ፤ ቁማ ማ። ቃይ ታን ነዉ እሞታ እማና” ያጌዳ።

8 ሽን ጾሳ አሳይ ካትያዉ ሀዋዳን ያጊደ ዛሬዳ፤ “ሀራይ አትና ኔን ነ አቆ ባጋ ታዉ እምንቶካ፥ ታን ኔናና ቢከ፤ ሀዋን ኡክꬃካ ሚከ፥ ሃꬃካ ኡሽከ። 9 አያዉ ጎፐ፥ መꬍና ጎዳ ቃላይ ታና፥ ‘ኔን ኡክꬃካ ሞፓ፥ ሃꬃካ ኡሾፓ፥ ነ ዬዳ ኦግያናካ ስማደ ቦፓ’ ያጊደ አዛዜዳ” ያጌዳ። 10 ሄዋ ድራዉ፥ ብታኒ ሀራ ኦግያና ቤዳ፤ እ ቤቴለ ዬዳ ኦግያና ስሚደ ብቤና።

11 ትምቢትያ ኦድያ እት ጭማ ብታኒ ቤቴለ ካታማን ደኤ። ቤቴለን ሄ ጋላስ ጾሳ አሳይ ኦꬄዳ ኡባባ ሄ ጭማ ብታንያ ናናይ ዪደ ኦዴድኖ፤ ቃይ ሄ ብታኒ ካትያዉ ኦዴዳ ቃላ ኡንቱንቱ ባረንቱ አዎ ኦዴድኖ። 12 አዉ ኡንቱንታ፥ “ሀቃ ኦግያና ቤዴ?” ያጌዳ፤ ይሁዳፐ ዬዳ ጾሳ አሳይ ቤዳ ኦግያ አዉ ማላቴድኖ። 13 ሄዋፐ ጉይያን እ ባረ ናና፥ “ታዉ አነ ሀርያ ኮርተ” ያጌዳ፤ ኡንቱንቱ አዉ ሀርያ ኮርና ቶጌዳ። 14 ጾሳ አሳ ጌዱዋ ካሊደ ቤዳ፤ እት ዎላ ኩዋን ኡቴዳዋ ደሚደ፥ “ይሁዳፐ ዬዳ ጾሳ አሳይ ኔኔየ?” ያጌዳ።

ብታኒ፥ “ኤ ታና” ያጌዳ።

15 ትምቢትያ ኦድያ ጭማ ብታኒ አ፥ “ቁማ ማናዉ ታ ሶ ታናና ደንዳ” ያጌዳ።

16 ጾሳ አሳይ ዛሪደ፥ “ታን ጉየ ስማደ ኔናና ባናዉ፥ ዎይ ሀ ኮሽያን ኔናና ኡክꬃ ማናዉ፥ ዎይ ሃꬃ ኡሻናዉ ዳንዳይከ። 17 አያዉ ጎፐ፥ መꬍና ጎዳይ ቃላይ ታና፥ ‘ኔን ሄ ሳኣን ኡክꬃካ ሞፓ፥ ሃꬃካ ኡሾፓ፥ ነ ዬዳ ኦግያናካ ስማደ ቦፓ’ ያጊደ አዛዜዳ” ያጌዳ።

18 ትምቢትያ ኦድያ ጭማ ብታኒ፥ “ታንካ ኔናዳን ትምቢትያ ኦድያዋ። ኪታንቻይ መꬍና ጎዳይ ቃላን ታና፥ ‘ኡክꬃ እ ማና ማላነ ሃꬃ ኡሻና ማላ፥ አ ዛራደ ነ ሶ ኔናና አካደ ያ’ ያጌዳ” ያጌዳ። ሽን ጭማ ብታኒ ሄዋ አዉ ዎርዱዋ ኦዴዳ። 19 ሄዋ ድራዉ፥ ጾሳ አሳይ አናና ስሚደ፥ አ ሶን ሜዳነ ኡሼዳነ።

20 ኡንቱንቱ ማዳን ኡት ደእሽን፥ መꬍና ጎዳ ቃላይ ብታንያ ጉየ ዛሬዳ ትምቢትያ ኦድያ ጭማ ብታንያኮ ዬዳ። 21 ብታኒ ይሁዳፐ ዬዳ ጾሳ አሳዉ ባረ ቃላ ꬎቁ ኦꬂደ፥ “መꬍና ጎዳይ ሀዋዳን ያጌ፤ ‘ኔን መꬍና ጎዳ ቃላ እጻዳ፤ መꬍና ጎዳይ ነ ጾሳይ ኔና አዛዜዳ አዛዙዋካ ናጋባካ። 22 ኔን ጾሳይ፥ “ሄ ሳኣን ሞፓ ዎይ ኡሾፓ” ጌዳ ሳኣ ጉየ ስማደ ባደ፥ ያን ኡክꬃ ማዳ፤ ሃꬃካ ኡሻዳ። ሄዋ ድራዉ፥ ነ አሃይ ነ አዎቱዋ ዱፉዋን ሞገተና’ ያጌ” ያጌዳ።

23 ጾሳ አሳይ ምያዋነ ኡሽያዋ ፖሌዳዋፐ ጉይያን፥ ትምቢትያ ኦድያዌ ባረ ጉየ ዛሪደ አሄዳ ብታንያዉ ሀርያ ኮሬዳ። 24 እ ኦግያን ቢሽን ጋሙ አናና ጋከቲደ፥ አ ዎꬌዳ። አሃይ ኦግያን ፓንጋራሬዳ፤ ሀሪነ ጋሙነ ላአቱካ አሃ ምይያን ኤቄድኖ። 25 ሄ ኦግያና አꬍያ አሳይ አሃይ ፓንጋራሬዳዋነ ጋሙ አሃ ምይያን ኤቄዳዋ በኤዳ፤ ቢደ ትምቢትያ ኦድያ ጭማ ብታኒ ደእያ ካታማን ኦዴዳ።

26 ብያ ሳፐ ብታንያ ጉየ ዛሬዳ ትምቢትያ ኦድያ ጭማ ብታኒ ሄዋ ስሴዳ ዎደ ሀዋዳን ያጌዳ፤ “ሄዌ ቃላዉ አዛዘተናን እጼዳ ጾሳ አሳ። ሄዋ ድራዉ፥ መꬍና ጎዳ ቃላይ አዉ ካሰቲደ ኦዴዳዋዳን፥ መꬍና ጎዳይ ጋሙዋን አ ጋꬄዳ፤ ያትና፥ ጋሙ አ መንሬꬂደ ዎꬌዳ” ያጌዳ።

27 ሄዋፐ ጉይያን ጭማ ብታኒ ባረ ናና፥ “ታዉ ሀርያ ኮርተ” ያጌዳ። ኡንቱንቱ አዉ ሀርያ ኮሬድኖ፤ 28 ብታኒ ከሲደ ቤዳ። ኦግያን ፓንጋራሬዳ አሃነ አሃ ማታን ኤቄዳ ሀርያነ ጋሙዋ ደሜዳ፤ ጋሙ አሃ ምቤና ዎይ ሀርያካ መንꬅቤና። 29 ትምቢትያ ኦድያ ጭማ ብታኒ ጾሳ አሳ አሃ ደንꬂደ፥ ሀርያ ዞክያን ዎꬂደ፥ ዬካናዉነ ሞጋናዉ ጉየ ባረ ካታማ አኪደ አሄዳ። 30 ባረዉ ማክ ዎꬄዳ ዱፉዋን አሃ ዎꬄዳ፤ አ ቦላ፥ “አየ ታ እሻዉ! አየ ታ እሻዉ!” ያጊደ ዬኬድኖ።

31 ሞግ ስሚደ ባረ ናና ሀዋዳን ያጌዳ፤ “ታን ሀይቂያ ዎደ፥ ጾሳ አሳይ ሞገቴዳ ዱፉዋን ታና ሞግተ፤ ታ መቀꬃቱዋካ አ መቀꬃቱዋ ጋጻን ዎꬅተ። 32 አያዉ ጎፐ፥ ቤቴለ ካታማን ደእያ ያርሽያ ሳኣ ቦላነ ሳማርያ ካታማቱዋን ደእያ ጎይንያ ꬎቃ ሳአቱ ቦላ መꬍና ጎዳይ አዛዝና ሄ ብታኒ ዋሶዌ ቱሙ ፖለታና” ያጌዳ።

33 ሄዋፐ ጉየና እዮርባም ባረ ኢታ ኦግያፐ ስምቤና፤ ሽን ጎይንያ ꬎቃ ሳቶ ኡባ ቆሞ አሳፐ ቄሳቱ ዋ ጉጂደ ሱንꬄዳ፤ ቄሳቱዋ ግዳናዉ ኮይያ ኦናነ ጎይንያ ꬎቃ ሳኣን ዎꬄዳ። 34 እዮርባማ ጎልያ አሳ ኡንጋናዉነ ቢታ ቦላፐ ꬋይሳናዉ ጋꬄዳ ናጋራይ ሄዋ።

<- 1 ካታቱዋ 121 ካታቱዋ 14 ->