1 ህንተንቱ ታዉ ጻፌዳ የዎ አቱማ አሳይ ማጫዉኖ ቦቼነንቶ ሎአ። 2 ሽን ዎሹማ ጋሱዋ ድራዉ፥ አቱማ አሳዉ ሁጲያን ሁጲያን ማቻታ ደኡ። ቃይ ማጫ አሳዉካ ሁጲያን ሁጲያን አስናይ ደኦ።

3 አስናይ ባረ ማቻትዉ አስናተꬃን በስያባ ኦꬆ፤ ቃይ ሄዋዳን፥ ማቻታካ ባረ አስናዉ ማቼተꬃን በስያባ ኦꬁ። 4 ማቻታ ባረ አሳተꬃዉ ጎዳ ግዱኩ፤ ሽን እዝ አስናይ ጎዳ። ሀዋዳንካ፥ ቃይ አስናይ ባረ አሳተꬃዉ ጎዳ ግደና፤ ሽን አ ማቻታ ጎዳ። 5 ህንተንቱ ህንተ ግዶን ጾሳ ዎሳን ገንጫናዉ ሄ ዎድያዉ ዞረታን ድገታናፐ አትን፥ እቱ እቱዋ ድጎፕተ። ህንተንቱ ህንተንታ ናገና ድራዉ፥ ሴጻናይ ህንተንታ ፓጨናዳን፥ እትፐ ደእተ። 6 ሽን ታን ህንተንታ ሄዋ ህንተ ዶሶዋዳን ሀንተ ጋይፐ አትን፥ አዛዝከ። 7 ታን አሳይ ኡባይ ታናዳን ሀንንቶ ዶሳይ። ሽን ጾሳይ አሳዉ ሁጲያን ሁጲያን ዱማ ዱማ እሞታ እም ዎꬄዳ፤ እቶ ሀዋዳን፥ ቃይ የኮ ሄዋዳን እም ዎꬄዳ።

8 ሄዋ ድራዉ፥ ታን ማቻቶ አክቤናዋንቱነ አስናይ ሀይቆ ማጫዋንቱ ታናዳን ጮ ደኢኖንቶ፥ ኡንቱንቶ ሎአ ጋይ። 9 ሽን አሙዋን ጉደትያዋፐ አክያዌነ ገልያዌ ሎአ ግድያ ድራዉ፥ ኡንቱንቱ ባረንታ ናጋናዉ ዳንዳያና ꬋዮፐ፥ አክኖነ ገልኖ።

10-11 ማቻታ ባረ አስናፐ ሻከቱፑ። ሽን ሻከቶፐነ ገለናን ደኡ፤ ዎይ ባረ አስናና ስገቱ። አስናይካ ባረ ማቻቶ የዶፖ ያጋደ፥ አኬዳዋንታነ ገሌዳዋንታ አዛዛይ። ሽን ሀዋ አዛዝያዌ ጎዳፐ አትን፥ ታና ግድከ።

12 ታን ሀራቱዋ ሀዋዳን ጋይ፤ ጎዳ ግደና። አማነና ማቻታ ደእያ አማንያ አሳይ ኦንነ ደኦፐ፥ አ ማቻታ አናና እትፐ ደእያዋ እ ዶሶፐ፥ እዞ የዶፖ። 13 ቃይ አማነና አስናይ ደእያ አማንያ ማቻታ ደኦፐ፥ እዝ አስናይ እዝና እትፐ ደእያዋ እዛ ዶሶፐ፥ አፐ ሻከቱፑ። 14 አያዉ ጎፐ፥ አማነና አስናይ ባረ አማንያ ማቻትና ደኢደ ጌዬዳ። ቃይ አማነና ማቻታ ባረ አማንያ አስናና ደኣደ ጌያዱ። ሄዌ ባዌንቶ፥ ህንተንቱ ናናይ ቱና፤ ሽን ሀእ ኡንቱንቱ ጌሻ። 15 ሽን አማነናዌ ሻከታና ኮዮፐ ሻከቶ። አማንያ ማቻቶ ግድና፥ ዎይ አስና ግድና፥ ሀዋ ማላ የዉዋን ቃሸትክኖ። አያዉ ጎፐ፥ ጾሳይ ኑና ሳሮተꬃን ደአናዉ ጼሴዳ። 16 አማንያ ማቻቴ፥ ኔን ነ አስና አሻንንቶነ ኦ ኤር? ዎይ አማንያ አስናዉ ኔን ነ ማቻቶ አሻንንቶነ ኦ ኤር?

17 ግዶፐነ፥ አሳይ ሁጲያን ሁጲያን ጎዳይ አዉ እሜዳዋዳንነ ቃይ ጾሳይ ባረና ጼሴዳዋዳን ደኦ። ሄዌ አማንያ አሳ ኡባ ታን ታማርሴዳ ህግያ። 18 ኦንነ ቃጻረት ኡቲደ፥ ጾሳ አማኔዳዋ ግዶፐ፥ ባረ ቃጻራ ማላ ድጎፖ። ቃይ ኦንነ ቃጻረተናን ደኢደ፥ ጾሳ አማኔዳዋ ግዶፐ ቃጻረቶፖ። 19 አያዉ ጎፐ፥ ጾሳ አዛዙዋ ናጋናፐ አትን፥ ቃጻረትና ቃጻረታና ꬋይና አላሊ ባዋ።

20 አሳይ ሁጲያን ሁጲያን ጾሳይ ባረና ጼስያ ዎደ ደእያዋዳን ደኦ። 21 ጾሳይ ኔና ጼስያ ዎደ ኔን አይለ? አይነ ባዋ፤ ሽን ኔን አይለተꬃፐ ከሳናዉ ዳንዳዮፐ ከሳ። 22 አያዉ ጎፐ፥ አይለ ግድ ኡቴዳ አሳ ጎዳይ ጼሶፐ፥ እ ጎዳይ አይለተꬃፐ ከሴዳ አሳ። ሀዋዳንካ፥ አይለ ግደና አሳ ክርስቶስ ጼሶፐ፥ እ ክርስቶሳ አይለ። 23 ጾሳይ ህንተንታ ጋትያን ሻሜዳ። አሳ አይለ ግዶፕተ። 24 ታናዳን አማንያዋንቶ፥ አሳይ ሁጲያን ሁጲያን ጾሳይ አ ጼስያ ዎደ ደእያ ደኡዋዳን፥ ጾሳና ደኦ።

25 ዎዶራቶ ጎዳይ ታና አዛዜዳባይ ባዋ። ሽን ታን ጎዳዉ አማነቴዳዋ ግዴዳ ድራዉ፥ አፐ ማሮተꬃ አኬዳዋዳን፥ ህንተንታ ዞራይ። 26 ስም ሀእ መቶ ታዉ ሀዌ ሎአ ማላቴ፤ አሳይ ሀዋዳን ሀኒደ ደኦፐ ሎአ። 27 ኔን ማቻቶ አካ ድጌዳዋ ግዶፐ፥ እዞ የዳናዉ ኮዮፓ። ማቻቶ አካቤናዋ ግዶፐ፥ አካናዉ ኮዮፓ። 28 ሽን ኔን ማቻቶ አኮፐ፥ ናጋራ ኦꬃበይካ። ወዶራታካ አስና ገሎፐ፥ ናጋራ ኦꬃበይኩ። ሽን አከትያዋንቶነ ገለትያዋንቶ ኡንቱንቱ ደኡዋን ዎልቃማ መቱ ደኤ። ታን ህንተንታ ሄ መቱዋፐ አሻናዉ ኮያይ።

29 ሽን ታናዳን አማንያዋንቶ፥ ታን ግያዌ ሀዋ፤ ዎዲ ዉሬዳ። ሀዋፐ ስንꬃዉ አኬዳ አሳቱ፥ አክቤና አሳዳን ሀንኖ። 30 ዬክያዋንቱ ዬከናዋዳን፥ ናሸትያዋንቱ ናሸተናዋዳን፥ ሻምያዋንቱካ ሻሚደ አይነ ባይናዋዳን፥ 31 ሀ አላምያ ደኡዋን ማደትያዋንቱ ኡባካ ማደተናዋዳን ሀንኖ። አያዉ ጎፐ፥ ሀ አላምያ ደኡ አትያዋ።

32 ህንተንቱ ህርገናን ደአናዋ ታን ዶሳይ። አክቤናዌ ጎዳ ናሸቻናዉ ኮይያ ድራዉ፥ አ ኦሱዋባ ቆፔ። 33 ሽን አኬዳዌ ባረ ማቻቶ ናሸቻናዉ ኮይያ ድራዉ፥ ሳኣባ ቆፔ። 34 አ ቆፋይ ሻከቴዳ። አስና ገላቤና ወዶራታ ባረ አሹዋንነ ባረ ሸምፑዋን ጌያናዉ ኮይያ ድራዉ፥ ጎዳ ኦሱዋባ ቆፓዉ። ሽን አስና ገሌዳዉና ባረ አስና ናሸቻናዉ ኮይያ ድራዉ፥ ሳኣባ ቆፓዉ።

35 ታን ሀዋ ህንተንታ ማዳና ማላ ጋይፐ አትን፥ ህንተንታ ꬉባናዉ ጊከ። ሽን ህንተ በስያዋዳን ደኢደ፥ ጎዳ ኦሱዋ ህንተና እሚደ ኦꬃና ማላ ኮያይ።

36 ኦንነ ባረ ጊግሴዳ ዎዶራቶ አክያ ዎዲ ጋክና፥ ባረና ናጋናዉ አዉ ዳንዳየተናን እጾፐ፥ እዞ አኮ። እ እዞ አኮፐ፥ ሄዋን ናጋራይ ባዋ። 37 ሽን እ ባረ ዎዛናን ምኖፐ፥ አከናን ጋምአና ዳንዳዬ። ቃይ ባረና ናጊደ፥ ባረ ጊግሴዳ ዎዶራቶ አከናን ጋምአና ጎፐ፥ ኦንነ ዎልቃንናን ባረ ዎዛናን ቆፋ ቃቼዳዋ ግዶፐ ሎይꬄዳ። 38 ሄዋ ድራዉ፥ ዎዶራቶ አክያ ኡራይ ሎይꬄዳ፤ ቃይ አከናዌ ኡባ አꬅ ሎይꬄዳ።

39 አስና ገሌዳ ምሽራታ ባረ አስናይ ደኤዳ ኬናን አናና እትፐ ደአናዳን ቃሸታ ኡታዱ። ሽን እ ሀይቆፐ፥ ጎዳ አማንያ አሳ ኦናነ ግዶፐ፥ ባረ ዶሴዳ አስና ገላናዉ ዳንዳያዉ። 40 ታ ቆፋ ግዶፐ፥ ገለናን ደአንቶ፥ እዛ ናሸቻን ደአና። ቃይ ታናን ጾሳ አያናይ ደእያዋ ታን ኤራይ።

<- 1 ቆሮንቶሳ 61 ቆሮንቶሳ 8 ->