1 ጾሳ አሳቶ ሚሻ ሺሻናዉ ጋላትያን ደእያ አማንያ አሳቶ ታን ቃላ ገሌዳዋዳን፥ ህንተንቱካ ቃይ ሄዋዳን ኦꬅተ። 2 ህንተንቱ ታን ያ ብያ ዎደ፥ ሚሻ ሺሸና ማላ፥ ህንተ ኡባይ ዎጋ ጋላስ ጋላስ፥ ህንተ ደምያ ኬናፐ ህንተ ጎለን ዳጋይተ። 3 ታን ያ ጋክያ ዎደ፥ ህንተ አማንያ አሳ ኦና ግዶፐነ፥ ህንተ እሜዳዋ ጋꬃና ማላ፥ ዳብዳቢያና ኡንቱንታ የሩሳላመ ኪታና። 4 ቃይ ታን ኡንቱንቱና ባናዉ ኮሾፐ፥ ኡንቱንቱ ታናና እትፐ ባናዋንታ።

5 ታን ማቅዶንያና አꬋአደ፥ ህንተንቱኮ ባና፤ አያዉ ጎፐ፥ ታን ማቅዶንያና አꬋይ። 6 ታን ብያሳ ሀቃ ግዶፐነ፥ ታ ቡሳን ህንተ ታና ማዳና ማላ፥ ህንተ ማታን አማሬዳ ዎድያ ጋምኤናን አግከ። ዎይ ባልጉዋካ ህንተ ማታን ሻጨናን ዋያ አጋና። 7 አያዉ ጎፐ፥ ታን ሀእ ያና አꬋአደ ሄ ኦግያና ህንተንታ በአናዉ ኮይከ። ጎዳይ ጎፐ፥ ህንተ ማታን አማሬዳ ዎድያ ታካናዉ ቆፓይ።

8 ሽን ታን ጰንጸቆስተ ግያ ጋላሳይ ጋካናዉ ኤፈሶነን ጋምአና። 9 ታዉ ኦሱ ኩሜዳ አኮ ፐንጊካ ያን ዶየቴዳ። ቃይ ታዉ ጮራ ሞርከቱ ደኢኖ።

10 ጽሞቶሰ ህንተንቱኮ ዮፐ፥ ህንተ ማታን እ ያየናን ደአናዳን፥ አ ሎይꬅ ኦይቂተ። አያዉ ጎፐ፥ እካ ቃይ ጎዳ ኦሱዋ ኦꬄ። 11 ሄዋ ድራዉ፥ ኦንነ አ ካꬎፖ። ሽን እ ታኮ ሳሮ ስማና ማላ፥ አ ማዲደ ሳሮተꬃን ሞይዝተ። አያዉ ጎፐ፥ ታን እ እሻቱዋና ስማናዋ ናጋ ኡታድ።

12 ሽን ኑ እሻ አጲሎስ የኮ እሻቱዋና ህንተንቱኮ ባና ማላ፥ ታን አ ምንሳ ዎሳድ። ሽን ሀእ ህንተንቱኮ ባናዉ ኮይቤና፤ እ ባረዉ ሚክያ ዎደ ህንተንቱኮ ባናዋ።

13 ቤጎትተ። አማኑዋን ምን ኤቂተ። ጻልተ። ጎብተ። 14 ኦሱዋ ኡባ ሲቁዋን ኦꬅተ።

15-16 ታናዳን አማንያዋንቶ፥ እስጽፋኖስነ አ ሶይ አሳይ ግሪከን ኮይሮ አማኔዳዋንታ ግድያዋነ ጾሳ አሳቶ ኦꬃናዉ ባረንታ እሜዳዋ ህንተ ኤሪታ። ህንተንቱካ ኡንቱንቱ ማላ አሳዉነ፥ ኡንቱንቱና ኦꬅያ ኡባዉ ዳቡርያ ኡባዉ ኤኖ ጋናዳን፥ ታን ህንተንታ ዎሳይ።

17 እስጽፋኖስ፥ ፓርዶናጽስነ አካይቆስ ህንተ ባይናሳን ታና ቦራስስቤና ድራዉ፥ ኡንቱንቱ ዩሳን ታን ናሸታይ። 18 ኡንቱንቱ ህንተንታ አያናን ምንሴዳዋዳን፥ ታናካ አያናን ምንሴዳ ድራዉ፥ ሄዋንቱ ማላ አሳቱዋ ዶጎፕተ።

19 ኢስያን ደእያ አማንያ አሳይ ህንተንታ፥ “ሳሬ፥ ሎኤ” ጊኖ። አቂላይነ ጵርስቂላ ባረንቱ ሶይን ሺቅያ ዎሳ ጎለ አሳናካ ህንተንቶ ጎዳ ሳሮታ ዎዛናፐ ኪቲኖ። 20 እሻቱ ኡባይ ህንተንቶ ሳሮታ ኪቲኖ።

እቱ እቱዋና ጌሻ የረታ የረቲደ ሳሮተትተ። 21 ታን ጳዉሎስ ሀ ሳሮታ ታ ኩሽያን ጻፋድ።

22 ጎዳ የሱስ ክርስቶሳ ሲቀና አሳይ ደኦፐ፥ እ ሸቀቴዳዋ ግዶ። ኑ ጎዳዉ፥ ሃያ።

23 ጎዳ የሱስ ክርስቶሳ አꬎ ኬካተꬃይ ህንተንቱና ግዶ።

24 ክርስቶሳ የሱሳን ደእያ ህንተንቱ ኡባና ታ ሲቁ ግዶ። አመንእ።

<- 1 ቆሮንቶሳ 15