6 እስራኤልያ ጎልያ አሳቱዋ ካፓቱ፥ ዛራቱዋ ካፓቱ፥ ሻኣ ካፓቱ፥ ጼቱዋ ካፓቱነ ካትያ ኦሳንቻቱ ካፓቱ ባረንቱ ሸንያን ባረንቶ ደእያዋ እሜድኖ። 7 ኡንቱንቱ ጾሳ ጌሻ ጎልያ ኦሶ እት ጼታነ ላፑን ታሙ ሻአ ኪሎ ግራመ ዴጽያ ዎርቃ፥ ሄዙ ጼታነ ኦይታሙ ሻአ ኪሎ ግራመ ዴጽያ ብራ፥ ኡሱፑን ጼታነ ላታሙ ሻአ ኪሎ ግራመ ዴጽያ ናሃስያ ብራታነ ሄዙ ሚልዮነነ ኦይዱ ጼቱ ሻአ ኪሎ ግራመ ዴጽያ ብራታ እሜድኖ። 8 አልኦ ሹቻይ ደእያ አሳይ ኡባይ ሚሻ ናግያ ሌዊያ ገርሾና ያራ ግድያ ይህኤላ ባጋና መꬍና ጎዳ ጌሻ ጎልያ ሚሻ ምንጅያ ጎለዉ እሜዳ። 9 አሳይ ባረ ሸንያን ባረ ኩመንꬃ ዎዛናን መꬍና ጎዳዉ እሜዳ ድራዉ ናሸቴዳ፤ ካቲ ዳዊተካ ሎይꬅ ናሸቴዳ።
14 “ኑን ሀዋ ኬሻባ እማናዉ ታነ ታ አሳይነ ኦኔ? አያዉ ጎፐ፥ ኡባባይ ኔፐ ዬ፤ ኑን ነ ኩሽያፐ አኬዳዋ ነዉ ዛረꬅ እሜዳ። 15 ካሰ ኑ አዎቱዋ ኡባዳን ኑንካ ነ ስንꬃን በተነ እማꬃ። ሀ ሳኣ ቦላን ኑ ደኡዋ ላይꬃይ ኩዋዳን አꬍያዋ፤ ኑን ሀይቆፐ አታናዉ ዳንዳዮኮ። 16 አቤት መꬍና ጎዳዉ፥ ኑ ጾሳዉ፥ ነ ጌሻ ሱንꬃዉ ኑን ጌሻ ጎልያ ኬጻናዉ ሺሼዳ ኡባይ ነ ኩሽያፐ ዬዳዋ፤ ሀዌ ኡባይ ነባ።
17 “ታ ጾሳዉ፥ ኔን ዎዛና ፓጭያዋነ ሱረተꬃ ዶስያዋ ታን ኤራይ። ታን ታ ዎዛና ሱረተꬃን ታ ሸንያን ሀዋ ኡባ እማድ። ሀ ሳኣን ደእያ ነ አሳይካ ነዉ ባረ ሸንያን ናሸቻን እሜዳዌ ታን በኣድ። 18 አቤት መꬍና ጎዳዉ፥ ኑ ማይዛ አዎቱዋ አብራሃማ፥ ይሳቃነ እስራኤልያ ጾሳዉ፥ ነ አሳ ዎዛናን ሀ ዎልቃማ ሲቁዋ መꬍናዉ ናጋ፤ ኡንቱንቱ ዎዛናካ ኔኮ ሺሻ። 19 ነ ዎጋ፥ ነ አዛዙዋነ ነ ህግያ ናጋናዳንነ ታን ሀልቻደ ጊግሳ ዎꬄዳባን ጌሻ ጎልያ እ ኬጻናዳን ታ ናኣ ሶሎሞናዉ ኩመንꬃ ዎዛና እማ” ያጊደ ጋላቴዳ።
20 ሄዋፐ ጉይያን፥ ዳዊተ ያአዉ ኡባዉ፥ “መꬍና ጎዳ ህንተንቱ ጾሳ ጋላትተ” ያጌዳ። ያአይ ኡባይ መꬍና ጎዳ ባረንቱ አዎቱዋ ጾሳ ጋላቴድኖ። መꬍና ጎዳዉ ጉፋኒደ ጎይኔድኖነ ካትያዉካ ኩንዳ ጊደ ጉፋኔድኖ።
21 ዎንተꬃ ጋላስ አሳይ መꬍና ጎዳዉ ያርሹዋ ያርሼዳ። ቃይ ጹግያ ያርሹዋካ ጾሳዉ ያርሼዳ፤ እት ሻአ ኮሩማቱዋ፥ እት ሻአ ዶርሳ ኦርገቱዋ፥ እት ሻአ ዶርሳ ማራቱዋ፥ ኡሻ ያርሹዋነ ዳሮ ያርሾቱዋ ያርሼዳ። 22 አሳይ ሄ ጋላስ መꬍና ጎዳ ስንꬃን ሎይꬅ ናሸትደ፥ ሜዳነ ኡሼዳነ። ያቲደ አሳይ ካትያ ዳዊታ ናኣ ሶሎሞና ላኤንꬁዋ ዛይትያ ኦኪደ፥ አ ካዉተꬃን ምንሴዳ። ጻዶቃካ ቄሰ ግዳናዳን መꬍና ጎዳ ስንꬃን ኦኬዳ።
23 ሄዋፐ ጉይያን፥ ሶሎሞነ ባረ አዉዋ ዳዊታ ኮሽያን መꬍና ጎዳ ካዉተꬃ አራታን ኡቴዳ። አዉ ኡባባይ ሀኔዳ፤ እስራኤልያ ኡባይካ አዉ አዛዘቴዳ። [c] 24 ካፓቱ ኡባይ፥ ምኖ አሳቱነ ካትያ ዳዊታ ናናይ ካትያ ሶሎሞናዉ አዛዘታናዉ ቃላ ገሌድኖ። 25 መꬍና ጎዳይ ሶሎሞና እስራኤልያ አሳ ኡባ ስንꬃን ꬎቁ ꬎቁ ኦꬄዳ፤ አፐ ካሰ እስራኤልያ ካተቶ እመትቤና ቦንቹዋ ሶሎሞናዉ እሜዳ።
26 እሰያ ናአይ ዳዊተ እስራኤልያ ኡባ ቦላ ካተቴዳ። 27 ዳዊተ እስራኤልያ ቦላ ኦይታሙ ላይꬃ ካተቴዳ፤ ከብሮናን እ ላፑን ላይꬃ ካተቴዳ፤ የሩሳላመን ሀታማነ ሄዙ ላይꬃ ካተቴዳ። [d] 28 ዳዊተ ዳሮ ላይꬃ ደኢደ፥ ዱረቲደ፥ ቦንቼቲደ፥ ሎኦ ጭሚደ ሀይቄዳ። አ ኮታን አ ናአይ ሶሎሞነ ካተቴዳ። 29 ዳዊተ ኮይሮፐ ዶሚደ ዉርሰꬃ ጋካናዉ ኦꬄዳባይ፥ ትምቢትያ ኦድያ ሳመላ ታርክያ ማጻፋን፥ ትምቢትያ ኦድያ ናታና ታርክያ ማጻፋንነ ትምቢትያ ኦድያ ጋደ ታርክያ ማጻፋን ጻፈት ኡቴዳ። 30 እ ዎት ሞዴደንቶነ እ ዋኔዳ ዎልቃማ አሳኮ፥ እ ሀኔዳባይ፥ እስራኤልያ አሳይነ ሄራን ደእያ ካዉተꬃቱ ኡባይ ሀኔዳባይ ሄ ማጻፋቱዋን ጻፈት ኡቴዳ።
<- 1 ኦዱዋ 28