8
Tɑcɑɑ sɩɩ ɩ yəlɑɑ kɛ nɔɣɔ kʋpɑŋkɑ
1 Ḿpʋɣʋ Pə tənɑ pə tʋ Tɑcɑɑ heelɑ-m sɩ:
2 Mɑɣɑ Tɑcɑɑ mɑ luɣu sʋʋ Yosɑlɛm
nyə́mɑ kɛ teu nɑ mɑ́ səkɩ pɑ səm.
Nɑ mɑ tɑɑ kpɑɑkənɑ pɑ kolontunɑɑ.
3 Pə tɔɔ kɛ́ mɑ yɔɣɔtɑɑ sɩ mɑɑ məlɩ Yosɑlɛm.
Mɑɑ tɑsɑ Siyɔŋ ɩcɑtɛ tɑɑ kɛ́ cɑɣɑʋ tɔtɔ.
Hɑlɩ mɑɑ yɑɑ Siyɔŋ sɩ tɑmpɑnɑ ɩcɑtɛ.
Mɑɑ lɑɣɑsɩ Siyɔŋ ɩcɑtɛ pulɑɣɑ sɩ nɑŋŋ nyəŋkɑ.
4 Kʋkpɑtəlɑɑ kɑ́ nyəkɩ pɑ kpɑtəŋ tɔɔ
nɑ pɑ́ kɔɔ pɑ́ cɑɣɑ Yosɑlɛm tɑɑ.
5 Yəlɑɑ kɑ́ tɑsɑ Yosɑlɛm tɑɑ kɛ məlʋɣʋ.
Piyɑ kɑ́ tɑsɑ lɩɩʋ kɛ tuutuumɑ nɑ pɑ́ liɣiliɣi
ɩcɑtɛ hɑpɛɛ tɔɔ.
6 Ɩsɛɣɛlɩ yəlɑɑ kɑkɑɑsɑɣɑ ɩɩ hʋʋkɩ sɩ mpʋ ɩnɩ pə wɛ lɑpʋ.
Amɑ Pə tənɑ pə tʋ Tɑcɑɑ nɑ́ pəsəɣənɑ nɑ ɩ́ lɑ piti təmlɛ ńtɛ́.
7 Mɑɑ wɑɑsɩ mɑ yəlɑɑ mpɑ mɛ pɑ kpɑwɑ yomle tɔ.
Ilim təlɩɩlɛ nɑ pə tətʋlɛ ɑcɑlɛɛ tɑɑ kɛ pɑ ponɑ-mɛ.
8 Mɑɑ kɔnɑ-mɛɣɛ Yosɑlɛm nɑ ɩ́ wɛɛ mɑ yəlɑɑ.
Mɑɑ wɛɛ mə Ɩsɔ,
nɑ mɑ́ tɔkɩ mə tɔɔ kɛ́ kɑwulɑɣɑ nɑ siɣisuɣu.
9 Ḿpʋɣʋ Pə tənɑ pə tʋ Tɑcɑɑ yɔɣɔtɑɑ sɩ:
Ɩ́ kɑɑsɩ mə tɩ.
Mpi tɔ, nɔɔnɔɔ ɩ́ nɩɩkɩ mɑ nɔɔsɩ nsi mɑɑ sɩɩwɑ tɔ.
Nsəɣɩ Ɩsɔ kʋyɔɣɔtʋtʋ tɛləsəlɑɑ kɑ kpɑɑlɑ wɑɑtʋ wei
pɑ tɑɣɑnɑ Ɩsɔ təsɛɛlɛ kite sɩɩʋ sɩ pɑ ŋmɑɑkɩ-tɛ tɔ.
10 Nɑ pə́cɔ́ pə́ tɑkɩ wɑɑtʋ ɩnɩ tɔ,
yəlɑɑ yɑɑ tɔlɑ tɑɑ hikiɣi kʋfɛlʋɣʋ.
Pə́cɔ́ pɑ sʋʋkɩ pɑɑ lɩɩkɩ.
Mɑ yelɑ yəlɑɑ kɛ́ sɩ pɑ́ lɑkɩ təmɑɣɑ ɩsənɑ pɑ sɔɔlɑɑ tɔ.
11 Amɑ pənɛntɛ mɑ heeliɣi-mɛ sɩ,
mɑ kɑɑ tɑsɑ mɛ mpɑ pə kɑɑsɑɑ
tɔɣɔ lɑpʋ ɩsɩɩ lɔŋtɑɑ nyə́mɑ.
12 Mɑɑ lɑ-mɛɣɛ kʋpɑntʋ ntɩ tə tənɑ.
Tɛʋ kʋpɑŋkʋ kɑ́ nɩɩ.
Lɛsɛŋnɑɑ nɑ kʋtutuum kɑ́ lɑ teu nɑ ɩ́ hɛɛsɩ.
13 Yutɑ nɑ Ɩsɛɣɛlɩ pɑ kɑwulɑsɩ mɛ.
Ɩ́ kɑ wɛ piitimnɑɑ lɛmpɑ hɛkʋ kɛ́ ɩsɩɩ mpusinɑɑ.
Amɑ pənɛntɛ mɑɑ wɑɑsɩ-mɛ.
Ɩ́ kɑ́ pəsɩ piitimnɑɑ mpi pɑ təŋsɑ nɔɔsɩ kʋpɑŋsɩ tɔ.
Ɩlɛ ɩ́ kɑɑsɩ mə tɩ, ɩ́ tɑɑ nyɑ́.
14 Mɑɑ tʋ mɑ tɑɑ kɛ́ sɩ mɑ lɔɔkɩ-mɛɣɛ wɑhɑlɑ tɑɑ.
Mpi tɔ, mə cɑɑnɑɑ kɑ kpɑɑsɑ mɑ pɑ́ɑ́nɑ́ kɛ́,
nɑ mɑ́ tɔkɑ-yɛ.
15 Amɑ nɔɔnɔɔ mɑ tʋ mɑ tɑɑ sɩ mɑɑ kɑtɩ
Yosɑlɛm nɑ Yutɑ nyə́mɑ mɛɣɛ kʋpɑntʋ.
Ɩlɛ ɩ́ tɑɑ nyɑ́.
16 Ɩsənɑ ɩ́ kɑ́ lɑ tɔɣɔlɛ sɩ
pɑɑ wei ɩ́ heeli ɩ tɔɣɔntəlɛ kɛ tɑmpɑnɑ.
Ɩ́ təŋəɣɩ siɣisuɣu kɛ mə hʋʋlɛnɑɑ tɑɑ,
nɑ ɩ́ pɛɛkəɣɩ hɛɛsʋɣʋ.
17 Ɩ́ tɑɑ lɑ təmɑɣɑ ɩsɑɣɑtʋ yɑɑ ɩ́ tuunɑ yem.
Mpi tɔ, Tɑcɑɑ mɑ́, mɑɑ cɑɑkɩ yɑɑsinɑɑ mpɛ pɑ tɑkɑ.
Nɔhɔkʋtʋ kʋyɛɛŋ pəsɑ ɑcimɑ nyəŋ
18 Ḿpʋɣʋ Pə tənɑ pə tʋ Tɑcɑɑ heelɑ-m sɩ, 19 mɑ́ tɛləsɩ-mɛ sɩ: Nɔhɔkʋtʋ nti ɩ́ hɔkəɣɩ ɩsɔtʋ liɣiti nyəŋ nɑ kɑkpɑsɩ nyəŋ nɑ nɑɑtosompɔɣɔlɑɣɑ nyəŋ nɑ nɑɑnʋwɑ nyəŋ kɛ pənɑɣɑ tɑɑ tɔ. Tɩɩ tɛ nɑ tə́ pəsɩ ɑcimɑ sɔsɔɔnɑ kɛ Yutɑ nyə́mɑ. Amɑ ɩ́ sɔɔlɩ siɣisuɣu nɑ hɛɛsʋɣʋ kɛ́. 20 Pə tənɑ pə tʋ Tɑcɑɑ yɔɣɔtɑɑ sɩ:
Piitimnɑɑ kpɑɩ nyə́mɑ nɑ ɑcɑlɛɛ pɑɣɑlɛ
yəlɑɑ kɑ́ tɑɣɑnɩ Yosɑlɛm kɛ kɔntɛ.
21 Hɑlənɑ ɩcɑtɛ lɛntɛ yəlɑɑ heeli lɛntɛ nyə́mɑ sɩ:
Tə́ polo nɑ tə́ sɛɛ Pə tənɑ pə tʋ Tɑcɑɑ nɑ tə́ wiinɑ-ɩ.
Ɩlɛnɑ pɛlɛ pɑ́ tisi.
22 Piitimnɑɑ toŋ nyəm
nɑ yəlɑɑ pɑɣɑlɛ kɑ́ kɔɔ
Yosɑlɛm nɑ pɑ́ sɛɛ-m nɑ pɑ́ wiinɑ-m.
23 Mɑ heeliɣi-mɛ sɩ,
wɑɑtʋ ɩnəɣɩ piitimnɑɑ wɑɑnɩ wɑɑnɩ nɑɑnʋwɑ
yəlɑɑ kɑ́ kpɑ Yutɑ tʋ nɔɣɔlʋ ɩ toko tɑɑ sɩ:
Tə cɑɑ tə́ təŋ-mɛɣɛ ɩsɔsɛɛlɛ.
Mpi tɔ, tə nɩɩwɑ sɩ Ɩsɔ wɛ mə wɑɑlɩ.