Lom 3

1 Kɑwɑɑɣɑ wɛ Yutɑɩtʋ tɑɑ kɛ? Pɛlʋɣʋ nɑ́ wɛnɑ kɑsǝyɑɣɑ nɑ? 2 Kɑwɑɑɣɑ wɛ pǝ tǝnɑɣɑ mpʋ pǝ tɑɑ kɛ́ sɔsɔm mɛɛ. Pǝ tɑɣɑ pʋlʋ, kɑncɑɑlɑɣɑ ɩlɛ, Yutɑ nyǝ́mɑ mpɛɣɛ Ɩsɔ yelinɑ ɩ tɔm nti ɩ kɑɣɑ ɩ heeli yǝlɑɑ tɔ. 3 Ɩlɛ ye pɑ tɑɑ lɛlɑɑ kisɑ tǝ mʋɣʋ, pɩɩ lɑ nɑ Ɩsɔ nɑ́ɑ́ kɛɛ nti ɩ kɑ yɔɣɔtɑɑ tɔ? 4 Aɑɩ, pǝ kɑɑ lɑ mpʋ se, pɑɑ pǝcɔ. Pɑɑ yǝlɑɑ tǝnɑ kɑ́ lɑ kɑloolutʋnɑɑ, ɩsɩɩ Ɩsɔ lɑpɑ tɑmpɑnɑ tʋ kɛ tɑm. Pɑ ŋmɑɑwɑ ḿpʋ́ɣʋ́ Ɩsɔ Tɔm tɑɑ sɩ:

Ɩsɩɩ yǝlɑɑ tǝnɑ nyǝmɑ́ sɩ

tɑmpɑnɑ kɛ n yɔɣɔtǝɣɩ.

Nɑ ye pɑ tɩɩ yɑɑ-ŋ hʋʋlɛ,

nyɑ́ tɔm teenɑ.

5 Amɑ ye ɩsɑɣɑtʋ nti tǝ lɑkɩ tɔ tǝ kʋsɑ Ɩsɔ nyʋɣʋ, hɑlǝnɑ pɑ́ sɑ ɩ tɑmpɑnɑ tǝŋʋɣʋ, ɩlɛ tɩɩ tɑsɑ suweɣe yɔɣɔtʋɣʋ tɔtɔ? Yɑɑ tɩɩ tɔ sɩ timpi ɩ tʋkʋɣʋ-tʋɣʋ cɛɣɛcɛɣɛ kɛ́ tɑ́ ɩsɑɣɑtʋ tɔɔ tɔ ɩ yʋwɑɣɑlɛ? Aɑɩ. (Amɑ nti yǝlɑɑ yɔɣɔtǝɣɩ tɔɣɔ mɑ yɔɣɔtǝɣɩ cǝnɛ.) 6 Tɔfɔ ye pɩɩ wɛ mpʋ, ɩlɛ ɩsǝnɑɣɑ Ɩsɔ kɑ́ tɛ nɑ ɩ́ lɑ nɑ ɩ́ hʋʋnɑ yǝlɑɑ tǝnɑ tǝpɑɩ kɛ́ tɔm?

7 Ye mɑ pɔpɔtʋ lɑkǝnɑ nɑ pǝ́ hʋ́lǝ́ɣɩ́ Ɩsɔ tɑmpɑnɑ tǝkelekele nɑ ɩ́ hikiɣi teeli, ɩlɛ pepe tɔɔ kɛ́ pɑ nyǝnǝɣɩ-m ɩsɑɣɑʋ tɔtɔ? 8 Yɑɑ pepe tɔɔ kɛ́ tǝ kɑɑ tɔ sɩ tǝ́ lɑ ɩsɑɣɑtʋ nɑ pǝ́ kɔnɑ kʋpɑntʋ ɩlɛ? Hɑlǝnɑ lɛmpɑ cɑɑkɑɣɑ mɑ nyʋɣʋ kʋɣʋ, ɩlɛnɑ pɑ́ wɑɑnɑ sɩ ḿpʋ́ɣʋ́ mɑ tɔŋnɑ sɛɣɛsʋɣʋ. Pɑɑ kʋ yǝlɑɑ mpɑ pɑ wɑɑnɑ-m mpʋ tɔ pɑ tɔm, nɑ pɑ tɔm kʋɣʋ mɑɣɑɑ.

Yʋlʋ kʋpɑŋ fɛɩ

9 Ɩlɛ ɩsǝnɑ tɔɔ kɛ́ pǝ wɛɛ? Yutɑ nyǝ́mɑ tɑ́ tǝ tɛɛ piitim lɛmpɩ nyǝ́mɑ yɑɑ ɩsǝnɑ? Aɑɩ, pǝ tɑɣɑ mpʋ. Mɑ tɛmɑ hʋ́lʋ́ɣʋ́ sɩ ɩsɑɣɑtʋ tɔkɑ yǝlɑɑ tǝnɑɣɑ tǝkem, pɑɑ Yutɑ nyǝ́mɑ, pɑɑ yǝlɑɑ mpɑ te. 10 Ɩsɔ Tɔm tɑɑ pɑ ŋmɑɑwɑ mpʋ sɩ:

Yʋlʋ fɛɩ wei ɩ siɣisɑɑ tɔ,

pɑɑ kʋlʋm kʋŋ.

11 Nɔɣɔlʋ tɑ cɛkǝnɑ pʋlʋpʋɣʋ pɑɑ pǝcɔ.

Pǝyele nɔɣɔlʋ ɩɩ pɛɛkǝɣɩ Ɩsɔ.

12 Pɑ tǝnɑ pɑ toolɑɑ nɑ pɑ́ hɑtǝlǝnɑ Ɩsɔ,

pɑ kpɛntɑ pɑ tǝnɑ nɑ pɑ́ lɑ yem.

Pɑ tɑɑ kʋlʋm mɑɣɑmɑɣɑ ɩɩ lɑkɩ kʋpɑntʋ.

13 Pɑ nɔɣɔ tɑɑ wɛ ɩsɩɩ pǝlɑɑʋ ŋku kʋ kulɑɑ tɔ.

Pɑ puɣusiɣi lɛlɑɑ nɑ pɑ nɔɔleleŋ.

Pɑ ntompee ɩ́ nyǝpǝtɑɑ,

pǝ wɛ kɛ́ ɩsɩɩ ɑkɑlɑ sɔtʋ.

14 Mpusi koolee nɑ tɔm ɩsɑɣɑtʋ wɛnnɑ pɑ nɔɔsɩ tɑɑ.

15 Pɑ niŋ wɛ lɔŋ kɛ yǝlɑɑ tǝkʋlɛ.

16 Pɑ́ kʋlɑ timpi,

wɑkǝlʋɣʋ nɑ ɩsɑɣɑtʋ kɛ n mɑkǝnɑ.

17 Pɑ tɑ nyɩ ɩsǝnɑ pɑɑ lɑ nɑ pɑ́ lɩɩ

pǝ tɑɑ nɑ pɑ́ hɛɛsɩ tɔ.

18 Pɑ fɛɩnɑ Ɩsɔ sɔɣɔntʋ kɛ pʋlʋ tɑɑ.

19 Tɔʋ, tǝ nyǝmɑ́ sɩ Ɩsɔ kʋsǝsɩɩtʋ yɔɣɔtǝɣɩ pǝ tǝnɑ mpi tɔ, pɑ tǝnɑ mpɑ pɑ tǝŋǝɣɩ-tɩ tɔɣɔ pǝ nɑwɑ. Ɩlɛnɑ pǝ́ tǝkɩ sɑmɑɑ tǝnɑ nɔɔsɩ, nɑ pɑ́ tɑɑ hiki tǝwɑɑnlɛ kɛ tiili, yɑɑ nɔɣɔlʋ fiti Ɩsɔ hʋʋnɑʋ tɑɑ. 20 Pǝ tɑɣɑ kʋsǝsɩɩtʋ lɑkǝnɑ nɑ Ɩsɔ nyǝnǝɣɩ yʋlʋ kɛ yʋlʋpɑŋ, pɑɑ pʋntʋ kɛ́ ɑwe. Amɑ kʋsǝsɩɩtʋ tǝmlɛ ntɛ́ sɩ pǝ́ hʋlɩ-ŋ nyɑ́ tǝpǝntǝlɛ, pǝ tǝnɑ ntɛ́.

Ɩsǝnɑ Ɩsɔ yɑkɩ yǝlɑɑ tɔ

21 Amɑ pǝnɛntɛ Ɩsɔ hʋlɑ-tʋɣʋ ɩsǝnɑ ɩ lɑkɩ nɑ tǝ́ pǝsǝɣɩ yʋlʋpɑmɑ kɛ ɩ ɩsɛntɑɑ nɑ pǝ tɑ́ lɩɩ kʋsǝsɩɩtʋ tǝŋʋɣʋ tɔm tɔ. Hɑlɩ kʋsǝsɩɩtʋ tɑkǝlɑsɩ nɑ Ɩsɔ kʋyɔɣɔtʋtʋ tɛlǝsǝlɑɑ nyǝnsɩ tɑɑ kɛ́ pɑ yɔɣɔtɑ pǝ tɔm kɛ mpʋ sɩ: 22 Ɩsɩɩ yʋlʋ tɛŋʋɣʋ ɩ tɑɑ nɑ Yesu Kilisiti tɔ, mpʋ pǝ yekinɑ nɑ ɩ́ pǝsɩ kʋpɑŋ. Wei ɩ́ tɩɩ lɑɑlɑɑ nɑ ɩ́ tɛmɩ-ɩ nɑ ɩ tɑɑ te, ɩ lɑkɩ nɑ ɩ́lɛ́ ɩ́ pǝsɩ kʋpɑŋ kɛ ḿpʋ́ɣʋ́. Ɩsɔ nɑɑ fɑɣɑsǝɣɩ yǝlɑɑ. 23 Pǝ tɑɣɑ pʋlʋ, yǝlɑɑ tǝnɑ lɑpǝnɑ ɩsɑɣɑtʋ, ɩlɛnɑ pǝ́ pɛ-wɛɣɛ Ɩsɔ teeli. 24 Amɑ Ɩsɔ kʋpɑntʋ tɔɔ ɩ yelɑɑ nɑ Yesu Kilisiti wei ɩ wɑɑsǝɣɩ-wɛ tɔ ɩ́ lɑ nɑ pɑ́ pǝsɩ yʋlʋpɑmɑ kɛ Ɩsɔ ɩsɛntɑɑ kɛ fɑɑlɑɑ. 25 Sǝm mpi ɩ sǝpɑ tɔ, Ɩsɔ lɑpǝnɑ-ɩ kɔtɑɣɑ sɩ ɩ́ pǝsɩ wei ɩ kiŋ yǝlɑɑ mpɑ pɑ nɩɩkǝnɑ-ɩ tɔ pɑɑ hikinɑ suulu kɛ pɑ ɩsɑɣɑtʋ tɔm tɑɑ nɑ pǝ́ hɩɩsɩ-wɛɣɛ-tɩ tɔ. Ɩsɔ lɑpɑ ḿpʋ́ɣʋ́ sɩ pǝ́ hʋ́lɩ́ sɩ ɩ siɣisɑɑ. Hɑtuu lɔŋ Ɩsɔ hʋlɑ suulu nɑ ɩ́ yele yǝlɑɑ kɛ pɑ ɩsɑɣɑtʋ pɔɔsʋɣʋ. 26 Amɑ kɑɣɑnɑ ɩlɛ ɩ pɑɑsǝnɑ ɩsɑɣɑtʋ ntɩ ɩnɩ, nɑ ɩ́ hʋ́lǝ́ɣɩ́ ɩsǝnɑ ɩ lɑkɩ nɑ yǝlɑɑ pǝsǝɣɩ kʋpɑmɑ kɛ ɩ ɩsɛntɑɑ tɔ. Mpʋ ɩnɩ pǝ tɑɑ kɛ́ ɩ hʋ́lǝ́ɣɩ́ sɩ ɩ mɑɣɑmɑɣɑ ɩ kɛ́ kʋpɑŋ, pǝyele ɩ lɑpɑ nɑ mpɑ pɛlɛ pɑ nɩɩkǝnɑ Yesu tɔ pɑ́ pǝsɩ kʋpɑmɑ tɔtɔ.

27 Ye mpʋ pʋlʋ kɑɑsɑɑ mpi yʋlʋ kɑ́ hɔŋnɑ ɩ tɩ tɔ? Pɑɑ pǝcɔ pʋlʋ fɛɩ. Ɩlɛ pepe tɔɔ? Pɑ tǝŋǝɣɩ kʋsǝsɩɩtʋ tɔ pǝ tɔɔ yɑɑ? Aɑɩ, tɑɑ tɛmnɑʋ tɔɔ kɛ́. 28 Pǝ tɑɣɑ pʋlʋ, tǝ nɑwɑ sɩ tɑɑ tɛm tɔɔ kɛ́ Ɩsɔ lɑkɩ nɑ yʋlʋ pǝsǝɣɩ yʋlʋpɑŋ kɛ ɩ ɩsɛntɑɑ, pǝ tɑɣɑ kʋsǝsɩɩtʋ tǝŋʋɣʋ tɔɔ. 29 Yɑɑ Ɩsɔ ɩnɩ ɩ kɛ́ Yutɑ nyǝ́mɑ tike nyǝŋ, nɑ piitim lɛmpɩ nyǝ́mɑ nyǝŋ nɑ ɩlɛ? Aɑɩ pǝ tɑɣɑ mpʋ. Kʋlʋm ɩnɩ ɩ kɛnɑ pɑ tǝnɑ pɑ Ɩsɔ. 30 Pǝ tɑɣɑ pʋlʋ tɔɔ, Ɩsɔ kʋlʋm ɩnɩ ɩ wɛnnɑ nɑ ɩ́ lɑkɩ, nɑ Yutɑ nyǝ́mɑ pǝsǝɣɩ kʋpɑmɑ kɛ ɩ ɩsɛntɑɑ kɛ́ pɑ tɛmnɑ-ɩ nɑ pɑ tɑɑ tɔ pǝ tɔɔ. Tɑɑ tɛmnɑʋ kʋlʋmǝm mpɩ pǝ tɔɔ kɛ́ ɩ kɑ́ lɑ nɑ mpɑ pɑ tɑ kɛ Yutɑ nyǝ́mɑ tɔ pɛlɛ pɑ́ pǝsɩ kʋpɑmɑ kɛ mpʋ tɔtɔ. 31 Ye mpʋ pǝ mǝlɑɑ kɛlɛ sɩ tǝ lɔɔ kʋsǝsɩɩtʋ nɑ tǝ́ pɑɑsǝnɑ Ɩsɔ tɑɑ tɛmnɑʋ tɔm yɑɑ ɩsǝnɑ? Pɑɑ pǝcɔ. Hɑlɩ tǝ tɩɩ kʋsǝɣɩ kʋsǝsɩɩtʋ ntɩ tǝ nyʋɣʋ kɛ kʋkʋsʋ kɛ́.

<- Lom 2 Lom 4 ->