1 Ɩwǝyɑɣɑ kɔmɑ nɑ kɑ́ kɔɔlɩ kʋtɑɑlǝtʋ nɑɑtosompɔɣɔlɑɣɑ nyǝntʋ ɩlɛnɑ pǝ́ su ɩsɔtɑɑ tǝkɛtɛkɛtɛ hɑlǝnɑ pǝ́ polo ɩsɩɩ kɑlǝfu hɛkʋ tɑɑ kɛ́ mpʋ. 2 Pǝ wɑɑlɩ kɛ́ mɑ nɑ́ ɩsɔtɑɑ tillɑɑ nɑɑtosompɔɣɔlɑɣɑ mpɑ pɑ sǝŋǝɣɩ Ɩsɔ ɩsɛntɑɑ tɔ. Ḿpʋ́ɣʋ́ pɑ cɛlɑ-wɛɣɛ ɑkɑntɛɛ nɑɑtʋsʋmpɣɔlɑɣɑ. 3 Tǝnɑɣɑ ɩsɔtɑɑ tillu nɔɣɔlʋ nɑ́ kɔmɑ nɑ ɩ́ sǝŋ kɔtɑɣɑ tǝlɑtɛ nɑ ɩ́ tɔkɑ ɩ niŋ tɑɑ kɛ́ wʋlɑ cofolo wei ɩ tɑɑ pɑ wɔkɩ tulɑɑlʋ tɔ. Ḿpʋ́ɣʋ́ pɑ cɛlɑ-ɩ tulɑɑlʋ kɛ́ sɔsɔm sɩ ɩ́ kpɛnnɑ Ɩsɔ yǝlɑɑ sǝlǝmʋɣʋ nɑ ɩ́ lɑ́ kɔtɑɣɑ kɛ kɔtɑɣɑ tǝlɑtɛ nte pɑ lɑpǝnɑ wʋlɑ nɑ tǝ́ wɛ kumte ɩsɛntɑɑ tɔ tǝ tɔɔ. 4 Ɩsɔtɑɑ tillu wei ɩ sǝŋɑ Ɩsɔ ɩsɛntɑɑ nɑ ɩ́ tɔkɑ tulɑɑlʋ nɑ ɩ́ wɔkɩ tɔ tulɑɑlʋ ɩnɩ ɩ nyɔɔsɩ nɑ Ɩsɔ yǝlɑɑ sǝlǝmʋtʋ pǝ kpɛntɑɑ kɛ́ nɑ pǝ́ kpɑɑkɩ. 5 Pǝ wɑɑlɩ kɛ́ ɩsɔtɑɑ tillu kpɑɣɑ tulɑɑlʋnɑɑ cofolo ɩnɩ nɑ ɩ́ hɑɑ kɔtɑɣɑ tǝlɑtɛ tɔɔ kɛ́ mɑmɑlɑ kɛ ɩ lǝpɑm nɑ ɩ́ mǝŋnɑ nɑ ɩ́ pɛtɩ-ɩ tɛtʋ tɔɔ. Ḿpʋ́ɣʋ́ tɛʋ sʋʋ holɑ kɛ kpɑŋ kpɑŋ, nɑ pǝ́ yɔɣɔtǝɣɩ yem yem, nɑ tɛʋ nyǝɣǝsǝɣɩ ŋmɛlɛʋ ŋmɛlɛʋ, nɑ tɛtʋ nɑ́ɑ́ sele.

6 Ɩsɔtɑɑ tillɑɑ nɑɑtosompɔɣɔlɑɣɑ mpɑ pɑ tɔkɑ ɑkɑntɛɛ nɑɑtosompɔɣɔlɑɣɑ tɔ pɛlɛ pɑ tɑɣɑnɑ pɑ tǝɣɩ sɩ pɑ cɑɑ hʋlʋɣʋ. 7 Ḿpʋ́ɣʋ́ ɩsɔtɑɑ tillu kɑncɑɑlɑɣɑ nyǝŋ hʋlɑ ɑkɑntǝlɛ. Tǝnɑɣɑ pǝ pɛtɑ ɑtɛɣɛ tɔmpɛɛ nɑ kɔkɔ nɑ pǝ́ sitinɑ cɑlǝm, ɩlɛnɑ ɑntulinyɑ hɔɣɔlǝŋ tooso tɑɑ hɔɣɔlʋɣʋ kʋlʋmʋɣʋ nyɑɣɑ, nɑ pǝ́ nyɑɣɑ nyɩɩtʋ lʋm nyǝntʋ tǝnɑ.

8 Pǝ wɑɑlɩ kɛ́ ɩsɔtɑɑ tillu nɑɑlɛ nyǝŋ nɑ́ hʋlɑ ɩ́lɛ́ ɩ nyǝntɛ. Ɩlɛnɑ pǝ́ pɛtɩ pʋlʋ ɩsɩɩ pʋɣʋ sɔsɔɔŋkʋ kɛ teŋku tɑɑ nɑ pǝ mʋɣɩ kɔkɔ. Ḿpʋ́ɣʋ́ teŋku hɔɣɔlǝŋ tooso tɑɑ hɔɣɔlʋɣʋ kʋlʋmʋɣʋ lʋm pǝsɑ cɑlǝm. 9 Nɑ weesuɣu nyǝm mpi pɩɩ wɛ teŋku tɑɑ tɔ pǝ tintikɑ tooso tɑɑ kʋlʋmtǝlɛ sɩ, nɑ kpɩɩlǝŋ tǝnɑ tintikɑ tooso tɑɑ tintiɣile kʋlʋmtǝlɛ wɑkǝlɩ.

10 Pǝ wɑɑlɩ kɛ́ ɩsɔtɑɑ tillu tooso nyǝŋ hʋlɑ ɩ ɑkɑntǝlɛ. Ḿpʋ́ɣʋ́ ɩsɔtʋlʋŋɑ sɔsɔɔŋkɑ ŋkɑ kɑ mʋkɑɣɑ kɔkɔ ɩsɩɩ kɑhulɑɣɑ tɔ kɑ kpɛsɑ ɩsɔtɑɑ nɑ kɑ hoti. Nɑ pusi sɔsɔɔnsɩ nɑ lʋm sɛɛlɑɑ pǝ tintikɑ tooso tɑɑ tintiɣile kʋlʋmtǝlɛ tɔɔ kɛ́ kɑ nyǝkɑɑ. 11 Ɩsɔtʋlʋŋɑ ŋkɛ kɑ hǝtɛ ntɛ́ sɩ Nyɑŋ. Tǝnɑɣɑ lʋm huwɑ tooso tɑɑ huɣule kʋlʋmtǝlɛ lɑpɑ nyɑŋ, nɑ yǝlɑɑ pɑɣɑlɛ nyɔɔ-wɩ ɩlɛnɑ pɑ́ sɩ.

12 Pǝ wɑɑlɩ kɛ́ ɩsɔtɑɑ tillu liɣiti nyǝŋ nɑ́ hʋlɑ ɩ́lɛ́ ɩ nyǝntɛ. Ḿpʋ́ɣʋ́ pǝ hikɑ ilim hɔɣɔlǝŋ tooso tɑɑ hɔɣɔlʋɣʋ kʋlʋmʋɣʋ, nɑ pǝ hikɑ ɩsɔtʋ kɛ ɩ hɔɣɔlǝŋ tooso tɑɑ hɔɣɔlʋɣʋ kʋlʋmʋɣʋ kɛ mpʋ tɔtɔ, nɑ ɩsɔtʋlʋŋɑsɩ tintikɑ tooso tɑɑ kɛ́ tintiɣile kʋlʋmtǝlɛ. Nɑ timpi timpi pǝ hikɑ mpʋ tɔ pǝ nɑʋ sɩ́. Ḿpʋ́ɣʋ́ sǝkpɛtʋɣʋ lɑpɑ ilim tɑɑ wɑɑtʋnɑɑ tooso tɑɑ wɑɑtʋ kʋlʋm. Nɑ ḿpʋ́ɣʋ́ nɑ ɑhoo, ɩsɔtʋ nɑ ɩsɔtʋlʋŋɑsɩ pǝ yelɑ nɑʋ kɛ wɑɑtʋnɑɑ tooso tɑɑ wɑɑtʋ nɔɣɔlʋ.

13 Mɑ tɑsɑ nyǝnʋɣʋ tɔtɔ ɩlɛ cɔlɔʋ ntɛ́ hɑtuu ɩsɔtɑɑ nɑ ɩ́ kʋlǝɣɩ, nɑ mɑ́ nɩɩ ɩ yɔɣɔtǝɣǝnɑ nɔɣɔ sɔsɔɣɑ sɩ wɑɩyo wɑɩyo. Ɩsɔtɑɑ tillɑɑ tooso wei pǝ kɑɑsɑɑ tɔ ɩ kɔŋ nɑ ɩ́ hʋlǝɣɩ ɩ ɑkɑntɛɛ tɔɣɔlɛ ɩsɩɩ ɑtɛ yǝlɑɑ tɔm kɑ́ lɑ wɑɩyo te.

<- Kukulutu 7Kukulutu 9 ->