Kukulutu 15

Kɑntǝkɑɣɑ nɑɑsʋɣʋ

1 Ḿpʋ́ɣʋ́ mɑ nɑ́ ɩsɔtɔnʋɣʋ tɑɑ kɛ́ kɔkɔlɔ nɔɣɔlʋ ɩ́lɛ́ tɔtɔ. Ɩ tɔɔwɑɣɑ nɑ ɩ tɔm wɛ hɑ. Ɩsɔtɑɑ tillɑɑ nɑɑtosompɔɣɔlɑɣɑ tɔkǝnɑ kʋnɑɑsǝnɑm kɛ tɔm nɑɑtosompɔɣɔlɑɣɑ. Mpǝɣɩ pǝ tɛɛsǝɣǝnɑ nɑɑsǝnɑʋ ɩlɛ pǝ tɛmɑ. Nɑ kɑntǝkɑɣɑ nyǝntʋ tǝnɛɣɛ Ɩsɔ nɑ́ tɩɩ yekinɑ ḿpʋ́ɣʋ́ ɩ pɑ́ɑ́nɑ́.

2 Ḿpʋ́ɣʋ́ mɑ nɑ́ tiŋ pɔ ɩsɩɩ teŋku, nɑ ɩ́ nɑ kɔkɔ pǝ sitɑɑ. Nɑ mɑ́ nɑ́ tɔtɔɣɔ mpɑ pɑɑ kǝlɑ wontuɣu nɑ kʋ lɛɛsʋɣʋ nɑ ŋku kʋ kʋkɑlǝtʋ ntɛ́ kʋ hǝtɛ tɔ. Pɑ sǝŋɑ tiŋ wei ɩ pɔ mpʋ ɩsɩɩ teŋku tɔ ɩ nɔɣɔ, nɑ pɑ́ tɔkɑ sɑŋkʋnɑɑ mpɑ Ɩsɔ cɛlɑ-wɛ tɔ. 3 Nɑ pɑ́ yooki Ɩsɔ tǝmlɛ tʋ Moisi yontu nɑ Ɩwǝyɑɣɑ nyǝntʋ sɩ:

Tɑcɑɑ Ɩsɔ kɑwulɑɣɑ tʋ,

nyɑ́ tǝmɑ kʋlɑpɛɛ tɔɔʋ wɛ sɔɣɔntʋ,

nɑ ɑ tɔm wɛ piti.

Piitimnɑɑ tǝnɑ tǝpɑɩ wulɑʋ.

Mpi n sɩɩwɑ nɑ ń tǝŋǝɣɩ nɑ ń lɑkɩ tɔ,

pǝ siɣisɑɑ nɑ pǝ́ wɛnɑ tɑmpɑnɑ.

4 Tɑcɑɑ, wei ɩ kɑɑ nyɑnɑ-ŋ tɔ pʋntʋ wɛɛ?

Awe kɑ́ kisinɑ-ŋ teeli tʋɣʋ?

Pǝ tɑɣɑ pʋlʋ, nyɑ́ tike n wɛnnɑ tǝnɑŋŋ.

Piitimnɑɑ tǝnɑ yǝlɑɑ kɑ́ tɛ nɑ pɑ́ kɔɔ,

nɑ pɑ́ luŋ nyɑ́ tɛɛ nɑ pɑ́ sɛɛ-ŋ.

Pǝ tɑɣɑ pʋlʋ, pǝ kulɑ nyɑ́ kʋlɑpʋtʋ

kʋpɑntʋ tɔɔ kɛ́ nɑ pǝ́ hʋ́lɩ́ tǝkeelee.

5 Pǝlɛ pǝ wɑɑlɩ kɛ́ mɑ nɑ́ ɩsɔtɑɑ Ɩsɔ tǝsɛɛlɛ sɔsɔɔlɛ tʋlɑɑ, nɑ tǝ tɑɑ kɛ́ cokǝle nte tǝ hʋ́lǝ́ɣɩ́ sɩ Ɩsɔ wɛɛ tɔ. 6 Ḿpʋ́ɣʋ́ ɩsɔtɑɑ tillɑɑ nɑɑtosompɔɣɔlɑɣɑ wei ɩ kɑ tɔkɑ kʋnɑɑsǝnɑm tɔm nɑɑtosompɔɣɔlɑɣɑ ɩnɩ tɔ pɑ lɩɩ Ɩsɔ tǝsɛɛlɛ sɔsɔɔlɛ ntɛ tǝ tɑɑ. Nɑ pɑ́ suu kpoŋkpontu toŋ nyǝntʋ wontu kʋhʋlʋmtʋ nɑ tǝ́ mʋɣɩ kɔkɔ kɛ nyǝnǝnyǝnɩ, nɑ pɑ́ lǝlɑ pɑ lɑŋɑ tɑɑ kɛ́ wʋlɑ tɑmpɑlɑnɑɑ. 7 Tǝnɑɣɑ weesiŋ nyǝ́mɑ liɣiti ɩnɩ ɩ tɑɑ nɔɣɔlʋ ɩ cɛlɑ ɩsɔtɑɑ tillɑɑ nɑɑtosompɔɣɔlɑɣɑ ɩnǝɣɩ wʋlɑ kɔpʋnɑɑ kɛ nɑɑtosompɔɣɔlɑɣɑ, nɑ pɑ́ sunɑ Ɩsɔ wei ɩ wɛ tɑm tɔɔ tɔ ɩ pɑ́ɑ́nɑ́. 8 Ḿpʋ́ɣʋ́ Ɩsɔ teeli nɑ ɩ tomɑ pǝ nyɑlǝnɑ Ɩsɔ tǝsɛɛlɛ sɔsɔɔlɛ tǝkpǝmm. Nɔɣɔlʋ tɑ pǝsɩ nɑ ɩ́ sʋʋ Ɩsɔ tǝsɛɛlɛ sɔsɔɔlɛ tɑɑ, hɑlǝnɑ ɩsɔtɑɑ tillɑɑ yoosi kʋnɑɑsǝnɑm tɔm nɑɑtosompɔɣɔlɑɣɑ ɩnɩ nɑ pǝ́cɔ́.

<- Kukulutu 14 Kukulutu 16 ->