1 Pǝ tɛmɑ tɔɣɔ pǝ cɛlɑ-m cɑmlʋɣʋ ŋku pɑ mɑɣɑsǝɣǝnɑ nɑ kʋ nǝɣǝsǝnɑ ɩsɩɩ kpɑ́tʋ́ɣʋ́ tɔ. Ɩlɛnɑ pǝ́ tɔ-m sɩ: Kʋlɩ nɑ ń kɛɛsɩ Ɩsɔ tǝsɛɛlɛ sɔsɔɔlɛ nɑ kɔtɑɣɑ tǝlɑtɛ tɔtɔ, nɑ ń kɑlɑ mpɑ pɑ sɛɛ Ɩsɔ kɛ́ Ɩsɔ tǝsɛɛlɛ sɔsɔɔlɛ tǝnɛ tǝ tɑɑ tɔ. 2 Amɑ yelinɑ tǝ wɑɑlɩ tɔɔ tɑɑsɩ, tɑɑ mɑɣɑsɩ. Pǝ tɑɣɑ pʋlʋ tɔɔ, pɑ yelinɑ kpɑɩ nyǝ́mɑ kɛ ɩcɑtɛ nɑŋŋ nyǝntɛ kɛ́ sɩ pɛlɛ pɑ́ yɑɣɑ-tɛɣɛ nɔɔhɛɛ kɛ ɩsɔtʋnɑɑ nɩɩlɛ nɑ nɑɑlɛ tɑɑ. 3 Mɑɑ kʋsɩ mɑ tɔm tɑmpɑnɑ hʋllɑɑ nɑɑlɛ mpɑ pɑ suu lǝyɑɣɑ wontu nti tǝ wɛ ɩsɩɩ fɔlǝtɔnɑɑ tɑkɑ tɔ nɑ mɑ́ tili. Pɑɑ kpɑɑlɩ Ɩsɔ kʋheelitu kɛ kʋyɛɛŋ iyɑɣɑ nɑ kʋyɛɛŋ ŋmʋnʋɣʋ nɑ nɩɩtoso (1260) ɩnɩ ɩ tɑɑ.

4 Mɑ tɔm tɑmpɑnɑ hʋllɑɑ nɑɑlɛ ɩnǝɣǝlɛ Olifinɑɑ nɑɑlɛ nɑ fǝtǝlɑnɑɑ nɑɑlɛ wei ɩ sǝŋǝɣɩ kɑteŋɑ tǝnɑ Cɑɑ ɩsɛntɑɑ tɔ. 5 Ye nɔɣɔlʋ kʋlɑɑ sɩ ɩ lɑkɩ-wɛɣɛ ɩsɑɣɑtʋ, kɔkɔ lɩɩkǝnɑ pɑ nɔɔsɩ tɑɑ kɛ́ nɑ kɑ́ kʋɣɩ pɑ kolontunɑɑ. Nɑ mpʋ tɔtɔɣɔ pǝ wɛɛ, ye wei ɩ́ kʋlǝɣɩ sɩ ɩ lɑkɩ-wɛɣɛ ɩsɑɣɑtʋ, kɑ kʋ-ɩ kɛlɛ mpʋ. 6 Pɑ wɛnɑ pǝsʋɣʋ sɩ pɑ́ kpɑ tɛʋ nɑ kʋ tɑɑ nɩɩ pɑ Ɩsɔ kʋheelitu kpɑɑlʋɣʋ wɑɑtʋ tǝnɑ tɑɑ. Nɑ pɑ wɛnɑ pǝsʋɣʋ tɔtɔ sɩ pɑ́ lɑ nɑ lʋm pǝsɩ cɑlǝm, nɑ tɔtɔ sɩ pɑ́ nɑɑsɩ ɑtɛ nɑ wɑhɑlɑnɑɑ tǝnɑɣɑ kotokoto kɛ́ ɩsǝnɑ mpi pɑ cɑɑ tɔ.

7 Pɑ kɔŋ nɑ pɑ́ tɛ nti pǝ heelɑ-wɛ tɔɣɔ kpɑɑlʋɣʋ ɩlɛnɑ lumɑŋ pʋ́ʋ́ɣʋ́ sɔsɔɔʋ tɑɑ wontuɣu kʋlɩ pɑ tɔɔ. Nɑ kɩɩ kǝlɩ-wɛ nɑ kʋ́ kʋ-wɛ. 8 Nɑ pɑɑ hǝntɩ ḿpʋ́ɣʋ́ ɩcɑtɛ sɔsɔɔlɛ pɑtǝmɑ tɑɑ. Tǝ tɑɑ tǝnɑɣɑ pɑ tɛmɑ pɑ Sɔsɔ kɛ sǝm tesikɑ tɔɔ kɛ́ kɑm. Ye pǝ kɛɛsɑɑ, pɑ yɑɑkʋɣʋ sɩ Sɔtɔm nɑ Icipiti tɔ, ɩcɑtɛ sɔsɔɔlɛ ntɛɣɛ pɑ wɛnɑ. 9 Nɑ piitim tǝnɑ nɑ kpekɑ tǝnɑ nɑ nsǝmɑ tǝnɑ nɑ kɑteŋɑsɩ tǝnɑ tɑɑ pǝ yǝlɑɑ kɑ́ nyǝnǝɣɩ sǝtɑɑ mpɛɣɛ kʋyɛɛŋ tooso nɑ kʋyɑkʋ hɛkʋ tɑɑ nɑ pɑ́ hǝntɑ mpʋ. Pɑ kɑɑ tisi sɩ pɑ́ pi-wɛ. 10 Tɛtʋ tɔɔ yǝlɑɑ tǝnɑ lɑŋlɛ kɑ́ hɛɛ ɩsɩɩ yǝlɑɑ pɑnɛ pɑ sǝpʋ tɔ. Pɑɑ pɑɑ teu nɑ pɑ́ lɑ́ tǝmɑɣɑ kʋcɔɔŋ. Pǝ tɑɣɑ pʋlʋ tɔɔ, Ɩsɔ kʋyɔɣɔtʋtʋ tɛlǝsǝlɑɑ pɑnɛ pɑ nɑɑlɛ pɑɑ pɑɑsɑɑ kɛ́ nɑ pɑ́ tʋ ɑtɛ yǝlɑɑ kɛ wɑhɑlɑ. 11 Kʋyɛɛŋ ɩnɩ ɩ tooso nɑ kʋyɑkʋ hɛkʋ tɑɑ kɔmɑ nɑ pǝ́ tɛɛ ɩlɛnɑ weesuɣu feesiŋ lɩɩnɑ ɩsɔ nɑ ɩ́ sʋʋ pɑ tɑɑ nɑ pɑ́ kʋlɩ. Mpɑ pɑ tǝnɑ pɑ nɑ-wɛ tɔ sɔɣɔntʋ kpɑ-wɛɣɛ sɔsɔm. 12 Ḿpʋ́ɣʋ́ pǝ yɔɣɔtǝnɑ ɩsɔtɑɑ kɛ́ Ɩsɔ kʋyɔɣɔtʋtʋ tɛlǝsǝlɑɑ mpɛ pɑ nɑɑlɛ sɩ: Ɩ́ kpɑ cǝnɛ. Tǝnɑɣɑ pɑ sʋʋ pʋlʋ ɩsɩɩ ɩsɔŋmʋntʋɣʋ tɑɑ nɑ pɑ́ kpɑ ɩsɔ, nɑ pɑ kolontunɑɑ tɔŋnɑ-wɛɣɛ nyǝnʋɣʋ kɛ mpʋ. 13 Tǝnɛ ɩnǝɣɩ kpɑkpɑɑ kɛ tɛtʋ sʋʋ seluɣu kɛ sɔsɔm, ɩlɛnɑ ɩcɑtɛ sɔsɔɔlɛ hɔɣɔlǝŋ nɑɑnʋwɑ tɑɑ lɛŋkʋ kutuluŋ hoti, nɑ pǝ́ kʋ́ yǝlɑɑ iyisi nɑɑtosompɔɣɔlɑɣɑ (7000) kɛ tɛtʋ seluɣu mpʋ tɔ. Sɔɣɔntʋ kpɑ yǝlɑɑ lɛlɑɑ kɛ sɔsɔm, ɩlɛnɑ pɑ́ sʋʋ ɩsɔtɑɑ Ɩsɔ kɛ́ teeli hɑʋ.

14 Wɑhɑlɑ nɑɑlɛ nyǝŋ tɛɛwɑɣɑlɛ. Amɑ tooso nyǝŋ kɑ́ kɔnɑ nɔɔnɔɔ.

15 Ḿpʋ́ɣʋ́ ɩsɔtɑɑ tillu nɑɑtosompɔɣɔlɑɣɑ nyǝŋ hʋlɑ ɩ ɑkɑntǝlɛ. Ɩlɛnɑ pǝ́ yɔɣɔtǝnɑ ɩsɔtɑɑ nɑ toŋ sɩ: Pǝnɛntɑɑ Tɑcɑɑ nɑ ɩ Mesii pɑɑ tɔkǝnɑ tɛtʋ tɔɔ kɛ́ kɑwulɑɣɑ, nɑ tɑm tɔɔ kɛ́ pɑɑ tɔkɩ-kɛ. 16 Tǝnɑɣɑ sɔsɑɑ hiu nɑ liɣiti wei ɩ cɑɣɑ kumlee tɔɔ kɛ́ Ɩsɔ ɩsɛntɑɑ tɔ ɩ kʋlɑɑ, nɑ ɩ́ hǝntɩ ɑtɛ nɑ pɑ́ sɛɛ Ɩsɔ sɩ: