yontunɑɑ tɑɑ ɩsɩɩ Yetutuŋ kɛɛsʋɣʋ tɔɣɔlɔ.

2 Ɩsɔ kɛ́ mɑ pɛtɑ mɑ tɩ.

Ɩnɩ ɩ kiŋ kɛ mɑ nyʋɣʋ yɑpʋ lɩɩkənɑ.

3 Ɩnəɣəlɛ mɑ kʋkpɑmʋɣʋ nɑ mɑ́ tʋɣʋ-ɩ kpʋlʋɣʋ

mɑ nyʋɣʋ yɑpʋ ntɛ́, nɑ mɑ koluŋɑ ɩcɑtɛ.

Pʋlʋpʋ ɩɩ cɛŋləɣɩ-m ɩ kiŋ.

4 Pəlee kɛ́ mə tənɑ ɩ́ kɑ́ yele kpɛntʋɣʋ

nɑ ɩ́ huliɣi yʋlʋ sɩ ɩ́ kʋɣʋ-ɩ?

Ɩsɩɩ koluŋɑ wɛɛlʋɣʋ tɔ,

yɑɑ kɑlɑɑ wei ɩ seliɣi tɔ?

5 Ɩ́ kpɛntɑ nɔɣɔ sɩ ɩ́ tusɩ-ɩ ɩ təcɑɣɑlɛ sɔsɔɔlɛ tɑɑ.

Pɔpɔtʋ wɛ-mɛɣɛ teu kɛ́,

mə nɔɔsɩ kɛ ɩ́ kooliɣinɑ kʋpɑntʋ

nɑ mə lotu tɑɑ nɑ mpusi.

6 Ɩsɔ kiŋ tike kɛ mɑɑ pɛɛkɩ hɛɛsʋɣʋ.

Mpi tɔ, ɩnɩ ɩ yekinɑ nɑ mɑ́ tɛɛləɣɩ.

7 Ɩnəɣəlɛ mɑ kʋkpɑmʋɣʋ nɑ mɑ́ tʋɣɩ-ɩ kpʋlʋɣʋ.

Mɑ nyʋɣʋ yɑpʋ ntɛ́,

nɑ mɑ koluŋɑ ɩcɑtɛ.

Pʋlʋpʋ ɩɩ cɛŋləɣɩ-m ɩ kiŋ.

8 Ɩsɔ yɑkənɑ mɑ nyʋɣʋ nɑ ɩ́ tʋɣʋ-m teeli.

Ɩnɩ ɩ kentiɣinɑ mɑ tɔɔ nɑ toŋ,

Ɩsɔ kɛlɛ mɑ kpʋlʋɣʋ tətʋlɛ.

9 Hɑɩ, yəlɑɑ mɛ, ɩ́ pɛtɩ-ɩ mə təɣɩ pɑɑ wɑɑtʋ wei,

nɑ ɩ́ tʋlɩ-ɩ mə lotu,

Ɩsɔ kɛlɛ tɑ́ kpʋlʋɣʋ tətʋlɛ.

10 Tɑmpɑnɑ tɔɔ,

yəlɑɑ tɔm cɛkənɑʋ wɛ kɑtɛ kɛ́,

pɑ wɛ kɛ́ ɩsɩɩ ɩlɛɛməŋ.

Pɑ tənɑ pɑ fɛɩ yuŋ kɛ sɑnəyɑ tɔɔ.

11 Ɩ tɑɑ hɑ mə təɣɩ mʋsʋŋ tɑɑ,

ɩ tɑɑ tɛɛlɩ wɛnɑʋ mpi pɑ lɛɛkənɑ tomɑ tɔ.

Pɑɑ wɛnɑʋ hukiɣi, ɩ tɑɑ cɛlɑ-wəɣɩ mə tɩ.

12 Ɩsɔ yɔɣɔtɑɑ nɑ ɩ́ lɛlɩ nɑ mɑ́ nɩɩ sɩ,

ɩnəɣəlɛ tomɑ tʋ.

13 Tɑcɑɑ nyɑ́ tike ntɛ́ kʋpɑŋ

nɑ ń fɛləɣɩ pɑɑ wei ɩsɩɩ ɩ lɑpɑ tɔ.

<- Yontu 61Yontu 63 ->