59
Ɩsɔ wɑɑsɩ-m mpɑ pɑɑ cɑɑkɩ-m tɔ pɑ niŋ tɑɑ
1 Tɑfiiti yontu nti tə wɛ yonyoolɑɑ nyʋɣʋ tʋ
yontunɑɑ tɑɑ nɑ pɑ́ yɑɑkɩ-tɩ sɩ:
Tɑɑ kʋ tɔɣɔlɔ.
Tə tɑɑ kɛ́ Tɑfiiti kɛɛsəɣɩ ɩsənɑ Sɑyuli tilɑɑ sɩ
pɑ́ feŋ ɩ təyɑɣɑ nɑ pɑ́ kʋ-ɩ tɔ.
Yontu ntəɣəlɛ sɩ:
2 Mɑ Ɩsɔ wɑɑsɩ-m mɑ kolontunɑɑ niŋ tɑɑ,
kenti mɑ tɔɔ kɛ́ mpɑ pɑɑ cɑɑ-m tɔ pɑ tɔɔ.
3 Wɑɑsɩ-m mpɑ pɑ pɛɛkəɣənɑ-m ɩsɑɣɑtʋ tɔ pɑ niŋ tɑɑ,
yɑ-m yʋlʋkʋlɑɑ mpɛ pɑ nɔɣɔ tɑɑ.
4 Asɑɣɑɑ mpɛɣɛlɛ nɑ pɑ́ cɛŋəɣɩ-m,
yʋlʋkʋlɑɑ mpɛ pɑ cɑɑ pɑ tii mɑ tɔɔ kɛ́.
Tɑcɑɑ ɑnɩ mɑ tɑ lɑ ɩsɑɣɑtʋ nɑtəlɩ,
pəyele mɑ tɑ sɛkɩ mɑ kʋlɑpəlɛ.
5 Pɑɑ nɑ mɑ tɑ lɑ pʋlʋ tɔ,
pɑ kpɑkəɣɩ sewɑ nɑ pɑ́ tɑɣɑnəɣɩ pɑ tɩ.
Hɑɩ, Ɩsɔ fe nɑ ń kɔɔ mɑ kiŋ nɑ ń nɑ́.
6 Tɑcɑɑ ɑtɛ nɑ ɩsɔtɑɑ pə tʋ,
Ɩsɛɣɛlɩ Ɩsɔ nyɑ́,
kʋlɩ nɑ ń wɑɑsɩ-m mpɑ pɑ tɑ nyɩ-ŋ tɔ pɑ niŋ tɑɑ,
kisinɑ wɑɑlɩ lɩɩlɑɑ mpɛɣɛ nyɑ́ kʋpɑntʋ.
7 Pɑɑ tɑɑnɑɣɑ ŋkɑɣɑ pɑ kɔŋ
ɩsɩɩ hɑsɩ tintiɣile.
Pɑ cɑsəɣɩ kɑpusi nɑ pɑ́ cɔɔkənɑ ɩcɑtɛ.
8 Ɩsɑɣɑtʋ sunɑ pɑ nɔɔsɩ tɑɑ təpɑm,
nɑ pɑ kʋyɔɣɔtʋtʋ wɛ ɩsɩɩ lɑɣɑlɛɛ.
Pɑ tɔŋ sɩ ɑwe kɑ́ nɩɩnɑ pɑ tɔm?
9 Amɑ Tɑcɑɑ nyɑ́ woŋiɣi-wɛɣɛ,
nɑ ń pɑɑkənɑ mpɑ pɑ tɑ nyɩ-ŋ tɔ pɑ tənɑ.
10 Pɑɑ pɑ toŋ kɑ́ wɛɛ ɩsɩɩ cənɛ nɑ lé,
Ɩsɔ nyɑɣɑlɛ mɑ kentulu.
11 Mɑ Ɩsɔ kʋpɑŋ n kɑ́ kɔɔ mɑ cɔlɔ,
nɑ ń hʋlɩ-m mɑ kolontunɑɑ nɑ pə́ wɑkəlɑ-wɛ.
12 Tɑɑ kʋ-wɛɣɛ lɔŋ,
nɑ pə́ kɔɔ nɑ mɑ yəlɑɑ sɔɔ nyɑ́ toŋ tɔɔ.
Amɑ ciɣiti-wɛ nɑ toŋ ɩlɛnɑ ń pɛtɩ-wɛ.
Tɑcɑɑ, nyɑɣɑlɛ tɑ́ kʋkentuɣu.
13 Pɑ́ kulɑ pɑ nɔɣɔ tɔɔ te, pɑ wɑkələnɑ-ŋ kɛ́.
Pɑ mɑɣɑmɑɣɑ pɑ kɑlɑmpɑɑnɩ kɑtɔkɑ ɩ́ kpɑ-wɛ.
Mpi tɔ, kʋtʋɣʋ nɑ kɑloolɑɣɑ tike kɛ pɑ lɑkɩ.
14 Kpiisi-wɛ nɑ pɑ́ɑ́nɑ́ nɑ pɑ́ tɑɑ tɑsɑ-wɛɣɛ nɑʋ.
Ɩlɛ ɑntulinyɑ tənɑ kɑ́ nyɩ sɩ
Ɩsɔ Sɔsɔ wɛ Ɩsɛɣɛlɩ tɑɑ.
15 Pɑɑ tɑɑnɑɣɑ ŋkɑɣɑ pɑ kɔŋ ɩsɩɩ hɑsɩ tintiɣile.
Pɑ cɑsəɣɩ kɑpusi nɑ pɑ́ cɔɔkənɑ ɩcɑtɛ.
16 Nɑ pɑ́ pɛɛkəɣɩ pɑɑ timpiɣi tɔɣɔnɑɣɑ.
Pɩɩ tɑkɩ-wɛɣɛ teu ɩlɛnɑ pɑ́ sʋʋ mɔlɑ.
17 Mɑɑ sɑ nyɑ́ toŋ kɛ́,
nɑ mɑ kpɑɑlɩ nyɑ́ kʋpɑntʋ kɛ tɑnɑŋ tɛɛ.
Mpi tɔ, n kɛ-m təcɔɔsəlɛ toŋ nyəntɛ kɛ́
nɑ mɑ kentulu kɛ lɑŋwɑkəllɛ wɑɑtʋ.
18 Mɑɑ sɑ mɑ kentulu nyɑɣɑ.
Hɑɩ, Ɩsɔ nyɑɣɑlɛ mɑ təcɔɔsəlɛ,