nyʋɣʋ tʋ yontunɑɑ tɑɑ tɔɣɔlɔ.

Yontu ntəɣɩ pɑ yookinɑ ɑlukuku wei ɩ wɛ

pooluŋ tɩɩŋ sɔsɔɔŋ tɔɔ tɔ ɩ luɣu.

Tə tɑɑ kɛ́ Tɑfiiti kɛɛsəɣɩ ɩsənɑ Filiisi nyə́mɑ

səŋsɑ-ɩ Kɑtɩ tɔ pə tɔm.

Yontu ntəɣəlɛ sɩ:

2 Hɑɩ, Ɩsɔ nyənɩ mɑ pətɔɔtəlɛ, pɑ huluɣu-m kɛ́.

Kʋyɛɛŋ tənɑ pɑ yookinɑ-m kɛ́, nɑ pɑ́ cɑɑləɣɩ-m.

3 Kʋyɛɛŋ tənɑɣɑ mɑ kolontunɑɑ wɛ mɑ wɑɑlɩ.

Pɑ wɛ pɑɣɑlɛ kɛ́, nɑ pɑ́ yookinɑ-m.

4 Ye kʋyɑkʋ ŋku sɔɣɔntʋ ɩ́ kpɑ-m,

nyɑɣɑ mɑ tʋɣɩ nɑɑni.

5 Mɑ sɑŋ Ɩsɔ kɛ́ ɩ tɔm kʋyɔɣɔtʋtʋ tɔɔ,

nɑ mɑ tʋ-ɩ nɑɑni nɑ sɔɣɔntʋ fɛɩ.

Pepeɣe yʋlʋ pəsəɣɩ nɑ ɩ́ lɑ-m?

6 Pɑɑ kʋyɑkʋ ŋkuɣu pɑ tʋɣʋ-m kʋnyɔŋ,

nɑ pɑ́ hʋʋkɩ mɑ tɔɔ kɛ́ ɩsɑɣɑtʋ.

7 Pɑ lɑpɑ nɔɣɔ kʋlʋmɑɣɑ sɩ pɑ cɛŋəɣɩ-m nɑ pɑ́ nɑɑsəɣɩ-m

nɑ pɑ́ huliɣi mɑ ɩkpɑtɛ kɛ pɑɑ timpi mɑ puki tɔ.

Mpi tɔ, pɑ cɑɑ mɑ weesuɣu ləsʋɣʋ tɔ.

8 Pɑ kɑɑ pəsɩ pɑ fitinɑ ɩsɑɣɑtʋ nti pɑ lɑkɩ tɔ.

Hɑɩ, Ɩsɔ, pɛtɩ yəlɑɑ mpɛɣɛ ɑtɛ nɑ pɑ́ɑ́nɑ́.

9 N tɛmɑ mɑ təkpɑɑlətʋ mpɑɑʋ kɛ cɛkənɑʋ

suu mɑ ɩsəlʋm kɛ nyɑ́ tɔnʋɣʋ huluɣu tɑɑ.

Nmɑɑ pə tɔm kɛ nyɑ́ tɑkəlɑɣɑ tɑɑ.

10 Ye mɑ mɑpɑ kɑpukɑ nɑ nyɑ́ tɔɔ,

mɑ kolontunɑɑ nɑ́ mələɣənɑ pɑ wɑɑlɩ kɛ́,

mɑ nyəmɑ sɩ Ɩsɔ nyɑ́, n wɛ mɑ tɔɔ.

11 Mɑ sɑŋ Ɩsɔ kɛ́ ɩ tɔm kʋyɔɣɔtʋtʋ tɔɔ.

Mɑ sɑmɑ Tɑcɑɑ kɛ ɩ tɔm tɔɔ.

12 Ɩnəɣɩ mɑ lɑkɩ nɑɑni, mɑɑ nyɑŋnɑ pʋlʋ.

Pepeɣe yəlɑɑ pəsəɣɩ nɑ pɑ́ lɑ-m?

13 Hɑɩ, Ɩsɔ pə wɛɛ sɩ mɑ́ lɑ ɩsɩɩ mɑ sɩɩʋ nɔɣɔ tɔ,

ɩlɛ nyɑnɑ təmlɛ kɔtɑɣɑ kɛ mɑɑ lɑ-ŋ.

14 Mpi tɔ, n wɑɑsɑ-m səm tɑɑ kɛ́,

sɩ mɑ tɔ nyɑ́ ɩsɛntɑɑ kɛ weesuɣu nyə́mɑ nyɑɑləm tɑɑ.

<- Yontu 55Yontu 57 ->