2
Wulɑʋ wei Ɩsɔ ləsɑɑ tɔ
1 Pepe tɔɔ kɛ́ piitimnɑɑ cʋkɑ pə tɑɑ,
nɑ yəlɑɑ nɑ́ɑ́ hʋʋkɩ hʋwɛɛ kpɑɩ nyənɑ kɛ mpʋ?
2 Nɑ ɑwulumpiyɑ nɑ́ɑ́ sɔɔsəɣɩ ɑtɛ ɑwulɑɑ tɔɔ sɩ, pɑ kʋləɣɩ
Tɑcɑɑ nɑ ɩ kʋləsʋ pɑ tɔɔ nɑ pɑ́ yoonɑ-wɛ.
3 Nɑ pɑ́ tɔŋ sɩ pɑ́ cɛ pɑ hɔkʋtʋ nɑ pɑ́ lɩɩ ŋmɑkəlʋɣʋ tɑɑ.
4 Amɑ Tɑcɑɑ nɑ́ wɛ ɩ kumte tɔɔ kɛ́
ɩsɔtɑɑ kɛ́ nɑ ɩ́ woŋiɣi-wɛ.
5 Nɑ ɩ́ nyɑɑsəɣɩ-wɛ nɑ ɩ pɑ́ɑ́nɑ́, nɑ ɩ́ kɑləɣɩ sɩ:
6 Mɑ ləsənɑ mɑ wulɑʋ nɑ mɑ́ kpɑ-ɩ Siyɔŋ pʋɣʋ nɑŋŋ nyəŋkʋ
tɑɑ.
7 Mɑɑ yɑsɩ nti Tɑcɑɑ sɩɩwɑ tɔ.
Ɩ heelɑ-m sɩ: Nyɑɣɑlɛ mɑ pəyɑlʋ,
sɑŋɑ kɛ mɑ lʋlɑ-ŋ.
8 Sɩ mɑ sələmɩ-ɩ piitimnɑɑ nɑ ɩ hɑ-m, nɑ ɑntulinyɑ tənɑ
pəsɩ mɑ nyəm.
9 Mɑɑ ŋmɑkəlɩ-wɛ nɑ nyəɣəlʋɣʋ kpɑ́tʋɣʋ, nɑ mɑ́ fɑɣɑ-wɛɣɛ
hɔɣɔlɑsɩ ɩsɩɩ hɛɛʋ.
10 Awulɑɑ ɩ́ kpɑɣɑ ləmɑɣɑsɛɛ, nɑ ɑtɛ sɔsɑɑ nɑ́ɑ́ nɩɩ
kpɑɑlʋɣʋ.
11-12 Sɩ pɑ́ pɛtɩ pɑ təɣɩ Tɑcɑɑ
nɑ pɑ́ nyɑŋnɑ-ɩ nɑ pɑ́ nyɩ ɩ sɔsɔɔntʋ tɔɔ,
nɑ pɑ́ wiliti nɑ pɑ́ həntɩ-ɩ ɑtɛ.
Pə́ tɑɑ kɔɔ nɑ ɩ́ mʋnɑ-wɛ nɑ pɑ́ɑ́nɑ́ nɑ pɑ́ le.
Mpi tɔ, ɩ pɑ́ɑ́nɑ́ ɩɩ lɑɑ kpɑʋ.